- 1
- Na, ka whakatika atu ia i reira, a haere ana ki nga wahi o Huria ra tera taha o Horano: na, ka huihui mai ano nga mano ki a ia; a ka whakaako ano hoki ia i a ratou, ko tana hanga hoki ia.
- 2
- Na, ka haere mai nga Parihi, ka ui ki a ia, He mea tika ranei kia whakarere te tangata i tana wahine? he whakamatautau hoki mona.
- 3
- Na, ka whakahokia atu e ia, a ka mea ki a ratou, He aha ta Mohi i mea ai ki a koutou?
- 4
- Ka kī mai ratou, I tukua e Mohi kia tuhituhia he pukapuka whakarere, ka whakarere ai.
- 5
- Na, ka whakahokia atu e Ihu, a ka mea ki a ratou, Na te pakeke o o koutou ngakau i tuhituhia ai e ia tenei kupu ako ki a koutou.
- 6
- I te orokohanganga ia, i hangā raua e te Atua he tāne he wahine.
- 7
- Mo konei ka mahue i te tangata tona pāpā me tona whaea, a ka piri ki tana wahine;
- 8
- A hei kikokiko kotahi raua tokorua: na, heoi ano to raua tokoruatanga, engari kotahi ano kikokiko.
- 9
- Na, ā te Atua i hono ai, kaua e wehea e te tangata.
- 10
- A i te whare ka ui atu ano ana akonga ki a ia ki taua mea.
- 11
- A ka mea ia ki a ratou, Ki te whakarere tetahi i tana wahine, a ka marena i tetahi atu, e puremu ana ia, e hara ana ki tera.
- 12
- Ki te whakarere ano hoki te wahine i tana tāne, a ka marenatia ki tetahi atu, e puremu ana ia.
- 13
- Na, ka kawea mai ki a ia etahi tamariki nonohi, kia pa atu ai ia ki a ratou: otira ka riria e nga akonga te hunga nāna i kawe mai.
- 14
- A, te kitenga o Ihu, ka riri, a ka mea ki a ratou, Tukua nga tamariki nonohi kia haere mai ki a au, kaua hoki ratou e araia atu: no nga penei hoki te rangatiratanga o te Atua.
- 15
- He pono taku e mea nei ki a koutou, Ki te kahore e rite te tango a tetahi i te rangatiratanga o te Atua ki ta te tamaiti nohinohi, e kore ia e tomo ki roto.
- 16
- Na, okookona ana ratou e ia, whakapakia iho ona ringaringa ki a ratou, a manaakitia ana ratou.
- 17
- Na, i a ia e haere atu ana i te huarahi, ka oma mai tetahi, tukua iho ana nga turi ki a ia, ka ui ki a ia, E te Kai whakaako pai, me aha ahau ka whiwhi ai ki te oranga tonutanga?
- 18
- Na, ka mea a Ihu ki a ia, He aha ahau i kiia ai e koe he pai? kahore tetahi i pai, kotahi anake ko te Atua.
- 19
- E mātau ana koe ki nga ture, Kaua e puremu, Kaua e patu tangata, Kaua e tahae, Kaua e whakapae teka, Kaua e kaia, Whakahonoretia tou pāpā me tou whaea.
- 20
- Na, ka whakahokia mai e tera, a ka mea ki a ia, E te Kai whakaako, kua rite katoa enei mea i a au no toku tamarikitanga ake.
- 21
- Na, ka titiro mai a Ihu ki a ia, ka aroha ki a ia, ka mea ki a ia, Kotahi te mea kahore nei i a koe: haere, hokona ou mea, ka hoatu ki nga rawa-kore, a e whai taonga koe ki te rangi: katahi ka amo i te ripeka, ka aru i a au.
- 22
- Otira i mamae ia ki taua kupu, a haere pouri ana: he maha hoki ona taonga.
- 23
- Na, ka tirotiro mai a Ihu, ka mea ki ana akonga, Anō te whakauaua o te tapoko o te hunga taonga ki te rangatiratanga o te Atua!
- 24
- Na, ka miharo nga akonga ki ana kupu. A ka whakahokia atu ano e Ihu, ka mea ki a ratou, E tama ma, anō te whakauaua o te tapoko ki to te Atua rangatiratanga o te hunga e whakawhirinaki ana ki nga taonga!
- 25
- Erangi te haere o te kamera ra te kowhao o te ngira he mea takoto noa, he whakauaua rawa ia te haere o te tangata taonga ki roto ki te rangatiratanaga o te Atua.
- 26
- Na, rahi rawa to ratou miharo, a ka mea ki a ratou ano, Ko wai ra e ora?
- 27
- Na, ka titiro mai a Ihu ki a ratou, ka mea, E kore tenei e taea e te tangata, ki te Atua ia e taea ano: e taea hoki nga mea katoa e te Atua.
- 28
- Katahi ka anga a Pita ka mea ki a ia, Na, kua mahue nei i a matou nga mea katoa, kua aru nei i a koe.
- 29
- Na, ka whakahokia mai e Ihu, a ka mea, He pono taku e mea nei ki a koutou, Ki te whakarerea e tetahi tangata, he whare, he teina, he tuāhine, he pāpā, he whaea, he wahine, he tamariki, he māra, he whakaaro hoki nāna ki a au ki te rongo pai ano hoki,
- 30
- Ina, tataki rau nga mea e riro mai i a ia i tenei wa, he whare, he teina, he tuāhine, he whaea, he tamariki, he māra, me te whakatoinga; a i te ao meake puta mai, he oranga tonutanga.
- 31
- He tokomaha ia o mua e waiho ki muri; a ko o muri ki mua.
- 32
- Na, i te huarahi ratou e haere ana ki Hiruharama; me te haere ano a Ihu i mua i a ratou: na, e miharo ana ratou; e aru mataku atu ana. Heoi ka mau ano ia ki te tekau ma rua, ka anga ka korero ki a ratou i nga mea meake pa ki a ia,
- 33
- Nana, e haere ana tenei tatau ki Hiruharama; a ka tukua atu te Tama a te tangata ki nga tohunga nui, ki nga Karaipi; ka kiia ia e ratou kia mate, ka tukua hoki ia e ratou ki nga tauiwi:
- 34
- A ka tawaia ia, ka whiua, ka tuwhaina, ka whakamatea: a i te toru o nga ra ka ara.
- 35
- Na, ka haere atu ki a ia a Hemi raua ko Hoani, nga tamariki a Heperi, ka mea, E te Kai whakaako, e mea ana maua kia meatia e koe ta maua e inoi ai.
- 36
- Na, ka mea mai ia ki a raua, He aha ta korua e mea ai kia meatia e ahau ma korua?
- 37
- Ka mea raua ki a ia, Tukua ki a maua kia noho, tetahi ki tou matau, tetahi ki tou maui, i tou kororia.
- 38
- Na, ko te meatanga mai a Ihu ki a raua, Kahore korua e mātau ki ta korua e inoi nei; e ahei ranei korua te inu i te kapa ka inumia nei e ahau? kia iriiria ki te iriiringa ka iriiria nei ahau?
- 39
- Ka mea raua ki a ia, E ahei ano. Ka kī mai a Ihu ki a raua, E inu ano korua i te kapa ka inumia e ahau; e iriiria korua ki te iriiringa e iriiria ahau:
- 40
- Tena ko te noho ki taku matau, ki taku maui, ehara i te mea maku e hoatu, engari ka riro i te hunga i whakaritea nei mo ratou.
- 41
- A, te rongonga o te tekau, ka anga ka riri ki a Hemi raua ko Hoani.
- 42
- Na, ka karangatia ratou e Ihu, ka mea ia ki a ratou, E mahara ana koutou, ko te hunga e kiia ana he kawana no nga tauiwi, hei whakatupu rangatira ki a ratou; a ko o ratou tāngata rarahi hei akiaki i a ratou.
- 43
- Otira e kore e pera i roto i a koutou: engari ki te mea tetahi kia whakatupu tangata rahi i roto i a koutou, me whakatupu kai mahi ia ma koutou:
- 44
- A ki te mea tetahi o koutou kia whakatupu tino tangata, me whakatupu pononga ia ma te katoa.
- 45
- Kihai nei hoki te Tama a te tangata i haere mai kia mahia he mea māna, engari kia mahi ia, kia tuku hoki i a ia kia mate hei utu mo nga tāngata tokomaha.
- 46
- Na, ka tae ratou ki Heriko: a i a ia e haere atu ana i roto i Heriko, ratou ko ana akonga, ko te mano tini, e noho ana a Paratimiuha tama a Timiuha, he matapo, i te taha o te ara, ki te tono mea māna.
- 47
- A, tona ronganga ko Ihu o Nahareta tena, ka anga ia ka karanga, ka mea, E Ihu, e te Tama a Rawiri, kia aroha ki a au.
- 48
- A he tokomaha ki te riri i a ia kia noho puku: heoi tino rahi ake tana karanga, E te Tama a Rawiri, kia aroha ki a au.
- 49
- Na, ka tu a Ihu, ka mea kia karangatia ia. A karangatia ana e ratou te matapo, ka mea ki a ia, Kia maia, whakatika; e karanga ana ia ki a koe.
- 50
- Na, ka whakarerea e ia tona kakahu, a whakatika ana, haere ana ki a Ihu.
- 51
- Na, ka oho mai a Ihu, ka mea ki a ia, He aha tāu e hiahia na kia meatia e ahau māu? Ka kī te matapo ki a ia, E te Ariki, kia titiro ahau.
- 52
- Ka mea mai a Ihu ki a ia, Haere; na tou whakapono koe i ora ai. Na, titiro tonu iho ia, a aru ana i a Ihu i te ara.
Address: 
Phone: 
Email: