- 1
- Aue te mate mo te hunga e noho humarie ana i Hiona, e whakawhirinaki atu ana ki te maunga o Hamaria, e karangatia nei ko te tuatahi o nga iwi, era i tae atu nei te whare o Iharaira ki a ratou.
- 2
- Haere tonu ki Karane titiro ai, haere atu ano i reira ki Hamata-nui; haere tonu atu i reira ki Kata o nga Pirihitini: he pai atu ranei i enei kingitanga? e nui atu ana ranei ta ratou rohe i ta koutou rohe?
- 3
- E te hunga e whakamatara atu ana i te rangi kino, a e mea ana i te nohoanga o te tutū kia tata mai;
- 4
- E takoto ana i runga i nga moenga rei, e wharoro ana i runga i o ratou takotoranga, e kai ana i nga reme o te kahui, i nga kuao kau ano hoki i waenganui i te turanga-kau,
- 5
- E waiata nei, a, no te hatere te rangi, e whakaaroa ana hoki e ratou nga mea whakatangi, e pera ana me Rawiri;
- 6
- E inu waina ana i roto i nga peihana, a e whakawahi ana i a ratou ki nga hinu pai whakaharahara, kahore ia o ratou pouri mo te pakaru o Hohepa.
- 7
- Mo reira ka whakaraua atu ratou aianei, ratou tahi ano ko te hunga e whakaraua ana i te tuatahi, ka whakakahoretia ano hoki te hakari a te hunga i wharoro ra.
- 8
- Kua oatitia te Ariki a Ihowa e ia ano, e ai ta Ihowa Atua o nga mano, E whakarihariha ana ahau ki te nui o Hakopa, e kino ana ahau ki ona whare kingi: mo reira ka tukua atu e ahau te pa me nga mea ano i roto.
- 9
- Na, ki te toe nga tangata kotahi tekau i roto i te whare kotahi, ka mate ratou.
- 10
- A, ka tangohia ake te tangata e tona matua kēkē, e te tangata ano hoki hei tahu i a ia, he mea kia kawea atu ai nga wheua i roto i te whare, a ka mea ki te tangata i nga taha o te whare, He tangata ano ranei tera i a koe? a ka mea ia, Kahore. Katahi tera ka ki mai, Whakarongoa: e kore hoki e whakahuatia te ingoa o Ihowa.
- 11
- No te mea, nana, kei te whakahau a Ihowa, a ka patua e ia te whare, to te mea nui he pakaru, to te whare iti he ngatata.
- 12
- E rere ranei nga hoiho i runga i te kamaka? e parautia ranei a reira ki nga kau? kua puta ke hoki i a koutou te whakarite whakawa hei au, nga hua ano hoki o te tika hei womawori;
- 13
- E te hunga e koa ana ki te kahore noa iho, e mea ana, He teka ianei kua riro mai etahi haona i a tatou, he mea na to tatou uaua?
- 14
- Otiia, nana, ka ara i a au tetahi iwi ki a koutou, e te whare o Iharaira, e ta Ihowa Atua o nga mano, a ka whakatupuria kinotia koutou e ratou i te tapokoranga atu ano ki Hamata, a tae noa ki te awa i te koraha.
Address: 
Phone: 
Email: