- 1
- A, te takanga mai o te tau, te wa ano e haere ai nga kingi ki te whawhai, na, ka arahina atu he taua maia e Ioapa; a, huna iho e ratou te whenua o nga tamariki a Amona; haere mai ana ratou, kei te whakapae i Rapa. Ko Rawiri ia i noho ki Hiruharama. Na, ka patua a Rapa e Ioapa, whakangaromia ana e ia.
- 2
- Tangohia mai ana e Rawiri te karauna o to ratou kingi i tona mātenga, tona taimaha i kitea e ia, kotahi taranata koura, he kohatu utu nui ano hoki o taua karauna; potaea iho ki te mātenga o Rawiri. I whakaputaina mai ano hoki e ia nga taonga o te pa, tona tini noa iho.
- 3
- Na, nga tangata i roto, whakaputaina mai ana e ia ki waho, a haehaea iho ratou e ia ki nga kani, ki nga harou rino, ki nga toki. Ko ta Rawiri tenei i mea ai ki nga pa katoa o nga tamariki a Amona. Na, hoki ana a Rawiri ratou ko te iwi katoa ki Hiruharama.
- 4
- A, muri iho ka tupu te whawhai ki nga Pirihitini ki Ketere. I reira ano ta Hipekai Huhati patunga i a Hipai, he uri no Rapa. Na, kua riro ratou ki raro.
- 5
- Na ka whawhai ano ki nga Pirihitini, a, patua iho e Erehanana tama a Iaare a Rahami teina o Koriata o Kata, te kakau o tana taoroa, rite tonu ki te rakau a te kai whatu.
- 6
- A, i whawhai ano ki Kata. Na, ko tetahi tangata roa, e rua tekau ma wha nei ona maikara, takiono, takiono; he uri ano hoki ia no Rapa.
- 7
- I tana whakataranga i a Iharaira, na, patua ana ia e Honatana tama a Himea tuakana o Rawiri.
- 8
- I whanau enei a Rapa ki Kata, a, hinga ana i te ringa o Rawiri, i te ringa ano hoki o ana tangata.
Address: 
Phone: 
Email: