- 1
- Me koutou ano hoki, e nga wāhine, kia ngohengohe ki a koutou tāne ake; a ki te turi etahi ki te kupu, na, i kore i te kupu, ko te whakahaere a nga wāhine hei mea e riro mai ai ratou;
- 2
- I a ratou e titiro ana ki te hē-kore o ta koutou whakahaere ki te hopohopo.
- 3
- Te whakapaipai mo koutou, kauaka hei to waho, kauaka hei te makawe i whiria, kauaka hei te whakapiritanga mai o nga mea koura, kauaka hei te whakakakahuranga o nga kakahu;
- 4
- Engari hei te tangata ngaro o te ngakau, hei te mea e kore e pirau, hei to te wairua māhaki to te wairua rangimarie, he mea utu nui hoki tenei i te aroaro o te Atua.
- 5
- He penei hoki i mua ta nga wāhine tapu whakapaipai mo ratou, a te hunga i whakaaro ki te Atua, ngohengohe tonu ratou ki a ratou tāne:
- 6
- Me Hera hoki i ngohengohe ki a Aperahama, ko te ariki hoki tana ingoa mona: nāna hoki koutou tamariki, i a koutou e mahi pai ana, a kahore e mataku i tetahi whakapawera.
- 7
- Me nga tāne ano hoki, kia rite ki to koutou matauranga ta koutou noho ki a ratou, whakawhiwhia te wahine ki te honore, ko te mea kahakore hoki ia, ka uru tahi nei ano hoki korua ki te oranga ka homai noa nei; he mea kei araia a korua inoi.
- 8
- Na, te whakamutunga nei o taku, kia kotahi te whakaaro o koutou katoa, kia kotahi te ngakau, kia rite te aroha ki to te tuakana ki to te teina, kia pai te ngakau, kia ngawari:
- 9
- Kaua e utua he kino ki te kino, he taunu ki te taunu: engari me manaaki; me te mahara ano kua karangatia koutou ki tenei, ara kia whiwhi koutou ki te manaakitanga.
- 10
- Ki te mea hoki tetahi kia aroha ki te ora, kia kite i nga ra pai, me pēhi e ia tona arero kei kino, ona ngutu hoki kei korero tinihanga:
- 11
- Me peka ke atu i te kino, me mahi pai; ko te rangimarie hei rapunga māna, hei whainga atu māna.
- 12
- No te mea hoki kei runga i te hunga tika nga kanohi o te Ariki, me ona taringa hoki ina inoi ratou: e hē mai ana ia te mata o te Ariki ki te hunga e mahi ana i te kino.
- 13
- Ko wai hoki hei homai i te hē ki a koutou, ki te aru koutou i te pai?
- 14
- Otiia ki te mea na te whakaaro ki te tika i whakamamaetia ai koutou, ka hari koutou: aua ra e mataku ki ta ratou whakamataku, kaua e pawera;
- 15
- Engari whakatapua te Ariki te Atua i roto i o koutou ngakau: a kia rite tonu te kupu i a koutou i nga wa katoa, hei whakahokinga atu ma koutou ki nga tāngata katoa e ui ana ki a koutou ki te mea e tumanakohia atu nei e koutou, kia māhaki ano ia te ngakau kia wehi:
- 16
- Kia pai o koutou hinengaro; mo ta ratou ngautuara ki a koutou, he kai mahi koutou i te kino, kia whakama taua hunga e whakapae teka ra ki ta koutou whakahaere pai i roto i a te Karaiti.
- 17
- Ki te mea hoki i a tatou e mahi ana i te pai ka takoto i te Atua he mamae mo tatou, erangi tera i te mamae i a tatou e mahi ana i te kino.
- 18
- Kotahi hoki whakamamaetanga o te Karaiti mo nga hara, te tika mo te hē, kia arahina ai tatou e ia ki te Atua, i whakamatea hoki ko te kikokiko, he mea whakaora ia na te Wairua:
- 19
- Ko tana ano tena i tona haerenga i mua ki te kauwhau ki nga wairua i te whare herehere:
- 20
- I turi nei i mua, i te mea e tatari ana te manawanui o te Atua i nga ra i a Noa, i te mea e hangā ana te āka, te mea i ora ai etahi wairua torutoru nei, ara, tokowaru, he mea na te wai.
- 21
- He mea whakarite ki tenei te mea e whakaora nei i a tatou inaianei, ara, te iriiri, (ehara i te whakarerenga atu i te poke o te kikokiko, engari he whakaaenga ake na te hinengaro pai ki te Atua,) he meatanga na te aranga mai o Ihu Karaiti:
- 22
- Kua riro nei ki te rangi, a kei te ringa matau nei ano ia o te Atua; kei raro ano i a ia nga anahera, nga rangatiratanga, nga kaha.
Address: 
Phone: 
Email: