2nd Corinthians Chapter 13 - Paipera Tapu 1868 | Te Paipera Tapu 1868

2nd Corinthians Chapter 13 - Paipera Tapu 1868

1
Ko te toru tenei o aku haerenga atu ki a koutou. Ma te mangai o nga kai whakaatu tokorua tokotoru ranei ka u ai nga kupu katoa.
2
I korero wawe ahau i mua, a ka korero wawe nei ano, me te mea ko te rua tenei o oku wa i kona; heoi i a au ano e ngaro mai nei, ka tuhituhi atu nei ahau inaianei ki te hunga i hara i mua, ki era katoa ano hoki, na, ki te tae atu ano ahau, e kore e tohungia e ahau:
3
E rapu tohu na hoki koutou o te Karaiti e korero ana i roto i a au, kahore nei ia e ngoikore ki a koutou, engari e kaha ana i roto i a koutou.
4
Ina hoki, ahakoa i ripekatia ia i te mea e ngoikore ana, kei te ora ano ia, he mea na to te Atua kaha. He ngoikore nei hoki matou i roto i a ia, heoi ka ora tahi ano me ia he meatanga na to te Atua kaha ki a koutou.
5
Whakamatauria iho koutou, kei roto ranei koutou i te whakapono; tirohia iho o koutou tohu e koutou ano. Kahore oti koutou e mātau ki a koutou, kei roto i a koutou a Ihu Karaiti, ki te mea ehara koutou i te mea akiri?
6
Otira e u ana toku whakaaro, e mātau ano koutou ehara matou i te mea akiri.
7
Na, ko taku inoi tenei ki te Atua, kia kaua koutou e mea i tetahi kino; ehara i te mea mo matou kia kitea e paingia ana, engari mo koutou kia mahi i te pai, a ko matou hei mea akiri.
8
E kore hoki e taea e matou tetahi mea e hē ai te pono, engari te mea e u ai te pono.
9
E hari ana hoki matou ina ngoikore matou, a ko koutou e kaha ana: ko ta matou hoki tenei e inoi nei, ko koutou kia tino tika.
10
Koia ahau ka tuhituhi atu nei i enei mea, i a au e ngaro mai nei, kei tae atu au ki kona, a ka koi taku, kei rite ki te mana kua tukua mai nei e te Ariki ki a au hei hanga mo te whare, ehara i te mea hei wahi.
11
Heoi ra, e aku teina, kia koa, kia tino tika, kia marie te ngakau, kia kotahi te whakaaro, kia mau te rongo; a tera te Atua o te aroha, o te maunga rongo, e noho ki a koutou.
12
Oha atu tetahi ki tetahi hei te kihi tapu ano.
13
Tenei te hunga tapu katoa te oha atu nei ki a koutou.
14
Kia tau ki a koutou katoa te atawhai o te Ariki o Ihu Karaiti, me te aroha o te Atua, me te whiwhinga tahitanga ki te Wairua Tapu. Amine.