2nd Corinthians Chapter 5 - Paipera Tapu 1868 | Te Paipera Tapu 1868

2nd Corinthians Chapter 5 - Paipera Tapu 1868

1
E mātau ana hoki tatou, na, ki te wahia to tatou whare wharau te mea whenua nei, he whare ano to tatou he mea hanga na te Atua, ehara i te whare hanga e te ringa, he mea mau tonu i nga rangi.
2
I tenei hoki he aue ta tatou, e hiahia ana ki to tatou whare o te rangi hei kakahu mo tatou:
3
Ki te whai kakahu hoki tatou, e kore tatou e rokohanga mai e noho tahanga ana.
4
Kei te aue hoki tatou te hunga i tenei whare wharau i te taimaha: ehara i te mea e hiahia ana kia unuhia o tatou nei, engari kia kakahuria iho, kia horomia ai te mea matemate e te ora.
5
Na te kai hanga i a tatou mo taua mea nei ano ko te Atua, nāna nei hoki i homai ki a tatou te wahi tuatahi, ara, te Wairua.
6
Koia hoki tatou ka maia tonu ai, e mātau ana hoki, i a tatou e noho nei i te tinana, he mea motu ke mai i te Ariki ta tatou noho:
7
Ta tatou haere nei hoki kei runga i te whakapono, a kahore i runga i te titiro;
8
E maia ana ano tatou, a ta tatou e tino pai ai kia noho motu ke i te tinana, kia noho ai ki te Ariki.
9
Koia hoki tatou ka whai nei, ahakoa i konei e noho ana, ahakoa e noho ke ana, kia ahuarekaina mai tatou e ia.
10
Kua takoto hoki te tikanga, kia kitea katoatia tatou ki mua i te nohoanga whakawa o te Karaiti; kia riro mai ai i tenei i tenei nga meatanga a te tinana, kia rite ki tana hoki i mahi ai, ahakoa pai ahakoa kino.
11
Na, ka mātau nei matou ki te wehi o te Ariki, ka kukume matou i nga tāngata; kua kitea ano ia matou e te Atua; e u ana ano toku whakaaro kua kitea ano matou e o koutou hinengaro.
12
Ehara hoki i te mea e whakapai ana ano hoki matou i a matou ki a koutou, engari e hoatu ana i te take ki a koutou e whakamanamana ai koutou ki a matou, kia whai kupu ai koutou ki te hunga e whakamanamana nei ki to te kanohi, a kahore ki to te ngakau.
13
Ahakoa porangi matou, hei mea ia mo te Atua: ki te tika nga mahara, hei mea ano mo koutou.
14
E akiakina ana hoki matou e te aroha o te Karaiti; i a matou e whakaaro ana i tenei, i te matenga o te kotahi mo te katoa, he hunga mate ano te katoa:
15
A i mate ai ia mo te katoa, kia kaua ai te hunga e ora ana e ora mo ratou ake a muri ake nei, engari mo tenei i mate nei mo ratou, a i ara ake ano.
16
Na, i te wa e takoto ake nei kahore o matou matauranga ki tetahi, ara, ki tona kikokiko, ae ra, ahakoa mātau matou ki a te Karaiti, ara ki tona kikokiko, kahore o matou matauranga ki a ia i nga wa e takoto ake nei.
17
Na, ki te mea kei roto i a te Karaiti tetahi, he mahinga hou ia: kua pahemo nga mea tawhito; na, kua hou nga mea katoa.
18
A te putake o nga mea katoa, ko te Atua, i hohou nei i ta tatou rongo ki a ia i runga i a Ihu Karaiti, a homai ana e ia ki a matou te minitatanga o te houhanga rongo;
19
Ara, i roto te Atua i a te Karaiti e hohou ana i ta te ao rongo ki a ia, kore ake e whakairia ki a ratou o ratou hē; a kua tukua mai ki a matou te kupu mo te houhanga rongo.
20
Na, he karere matou na te Karaiti, me te mea ano ko te Atua tenei kei roto i a matou e karanga ana: ko matou hei whakakapi mo te Karaiti ki te tohe atu, kia houhia ta koutou rongo ki te Atua.
21
Tera hoki kihai nei i mātau ki te hara, meinga ana ia hei hara mo tatou; kia meinga ai tatou ko te tika o te Atua i roto i a ia.