- 1
- Na, ko Iehorama tama a Ahapa te kingi o Iharaira i Hamaria i te tekau ma waru o nga tau o Iehohapata kingi o Hura, a, kotahi tekau ma rua nga tau i kingi ai ia.
- 2
- I mahi kino ano ia i te aroaro o Ihowa; otiia kihai i rite ki ta tona pāpā, ki ta tona whaea. I whakakahoretia atu hoki e ia te pou o Paara i hangā e tona pāpā.
- 3
- Heoi i piri ano ia ki nga hara o Ieropoama tama a Nepata i mea nei i a Iharaira kia hara: kihai era i whakarerea e ia.
- 4
- Na, he kai tiaki hipi a Meha kingi o Moapa: a, tana takoha ki te kingi o Iharaira, kotahi rau mano nga reme, kotahi rau mano ano hoki nga hipi toa, me te huruhuru ano hoki.
- 5
- A, te matenga o Ahapa, ka whakakeke te kingi o Moapa ki te kingi o Iharaira.
- 6
- Na, haere atu ana a Kingi Iehorama i taua wa ano i Hamaria, a, taua ana e ia a Iharaira katoa.
- 7
- Na, haere ana ia, a unga tangata ana ki a Iehohapata kingi o Hura hei ki atu, Kua whakaeke te kingi o Moapa ki a au: kia haere taua ki Moapa ne? ki te whawhai? Na, ko te meatanga mai a tera, Ka haere ahau; ahau, a koe, rite tonu; toku iwi, tou iwi, rite tonu; oku hoiho, ou hoiho, rite tonu.
- 8
- I mea ano ia, Me na tehea ara taua? A ka mea tera, Me na te ara i te koraha o Eroma.
- 9
- Na, haere ana te kingi o Iharaira, ratou ko te kingi o Hura, ko te kingi o Eroma. He ara awhio to ratou, e whitu nga ra. Heoi kahore he wai mo te ope, me nga kararehe ano hoki e whai ana i a ratou.
- 10
- Na, ko te meatanga a te kingi o Iharaira, Aue, kua karangatia nei e Ihowa enei kingi tokotoru kia hoatu ai ratou ki te ringa o Moapa!
- 11
- Na, ka mea mai a Iehohapata, Kahore ianei i konei tetahi poropiti a Ihowa hei uinga atu ma tatou i ta Ihowa? Na, ka whakahokia mai e tetahi o nga tangata a te kingi o Iharaira, i mea ia, Ko Eriha tama a Hapata tenei, tera i riringi ra i te wai ki runga ki nga ringa o Iraia.
- 12
- Na, ka mea a Iehohapata, Kei a ia te kupu a Ihowa. Na, haere ana te kingi o Iharaira ratou ko Iehohapata ko te kingi o Eroma ki a ia.
- 13
- Na, ko te meatanga mai a Eriha ki te kingi o Iharaira, He aha ahau nau? Haere ki nga poropiti a tou pāpā, ki nga poropiti ano hoki a tou whaea. A ka mea te kingi o Iharaira ki a ia, Kati ra: kua karangatia nei hoki enei kingi e toru e Ihowa kia hoatu ai ratou ki te ringa o Moapa.
- 14
- Ano ra ko Eriha, E ora ana a Ihowa o nga mano e tu nei hoki ahau ki tona aroaro, ina, me i kahore taku whakaaro ki te mate o Iehohapata kingi o Hura, e kore ahau e titiro atu ki a koe, e kore ano hoki e kite i a koe.
- 15
- Na, tikina atu ki a au aianei tetahi kai whakatangi hāpa. A, te whakatangihanga a te kai whakatangi, na, kua tae iho ki a ia te ringa o Ihowa.
- 16
- Na, ko tana meatanga ake, Ko te kupu tenei a Ihowa, Kia kapi te raorao nei i te waikeri.
- 17
- Ko te kupu hoki tenei a Ihowa, E kore e kitea e koutou he hau, e kore ano hoki e kitea he ua, heoi ka ki tenei raorao i te wai; a ka inu koutou me a koutou kahui, me a koutou kararehe.
- 18
- Na, he mea noa ake tenei ki ta Ihowa titiro iho: ka homai ano hoki nga Moapi ki o koutou ringa.
- 19
- Ka patua ano hoki e koutou nga pa taiepa katoa, me nga pa pai katoa, ka tuaina hoki nga rakau pai katoa, ka tanumia nga poke wai katoa, a ka kino nga mara pai i a koutou, ka meatia ki te kohatu.
- 20
- Na, i te ata i te whakaekenga o te whakahere toto-kore, na, he wai te puta mai ana i te ara o Eroma! a, kapi ana te whenua i te wai.
- 21
- A, te rongonga o nga Moapi katoa kua tae mai aua kingi ki te whawhai ki a ratou, na, ka huihuia e ratou nga mea whitiki i te whitiki, me te hunga ano i kaumatua ake; a, tu ana i te rohe.
- 22
- A, to ratou marangatanga ake i te ata, na, e whiti mai ana te ra ki runga ki te wai; na, te tirohanga atu a nga Moapi i tenei taha ki te wai, mura tonu, ano he toto.
- 23
- Ki tonu ake ratou, he toto tera! Koia rawa ano! kua tukitukia nga kingi: he mea patu ratou na ratou ano. Na, Ki te muru taonga, e Moapa!
- 24
- Na, haere mai ana ratou ki te puni o Iharaira. Te tino whakatikanga o Iharaira: patua iho nga Moapi; a, rere ana ratou i to ratou aroaro. Na, haere tonu atu ratou, patu tonu atu i nga Moapi i to ratou whenua.
- 25
- Pakarukarua ana hoki e ratou nga pa; makā ana e ratou tana kohatu, tana kohatu, ki nga wahi pai katoa, a, kapi iho; tanumia ana e ratou nga puna wai katoa, tuakina ana hoki e ratou nga rakau pai katoa; toe rawa ake, ko nga kohatu o Kiri-harahete: otiia i taiawhiotia ano tera e nga kai piu kohatu, patua iho.
- 26
- A, te kitenga o te kingi o Moapa kahore ia e kaha ki te whawhai, ka mau ia ki etahi tangata e whitu rau, he hunga unu hoari, hei hoa mona, hei wahi atu ki te kingi o Eroma. Otiia kihai i taea.
- 27
- Katahi ia ka mau ki tana tamaiti matamua, ko ia nei hei kingi i muri i a ia, a, whakaekea ana hei whakahere ki runga ki te taiepa. Na, nui atu te morikarika ki a Iharaira. Katahi ratou whakarere i a ia, a, hoki ana ki to ratou whenua.
Address: 
Phone: 
Email: