2nd Peter Chapter 3 - Paipera Tapu 1868 | Te Paipera Tapu 1868

2nd Peter Chapter 3 - Paipera Tapu 1868

1
Ko te rua tenei o aku pukapuka, e aku hoa aroha, ka tuhituhia atu nei e ahau ki a koutou; hei whakaoho i o koutou hinengaro tinihanga kore kia mahara:
2
Kia mahara ai koutou ki nga kupu i korerotia i mua e nga poropiti tapu, ki to matou hoki ki ta nga apotoro a te Ariki a te Kai whakaora:
3
Ko tenei ta koutou e mātau ai i te tuatahi, tera e puta mai etahi kai whakamanu manu i nga ra whakamutunga, e haere ana i runga i nga ritenga o o ratou hiahia ake,
4
E mea ana, Kei hea te korero o tona haerenga mai? mau tonu hoki nga mea katoa no te moenga ra ano o nga mātua, pera tonu me to te orokohanganga.
5
E pai ana hoki ratou kia kuare ki tenei, na te kupu a te Atua nga rangi i mua, me te whenua ano he mea hanga no roto i te wai, i roto ano i te wai.
6
He hurihanga na enei i ngaro ai i te wai te ao o era wa.
7
Ko nga rangi onaianei ia me te whenua, he mea rongoa na taua kupu ra ano, he mea waiho marire mo te ahi, ina taea te ra e whakaritea ai te whakawa, e whakangaromia ai nga tāngata karakia kore.
8
Na, kei kuare koutou, e aku hoa aroha, ki tenei mea kotahi, ki ta te Ariki he ra kotahi rite tonu ki nga tau kotahi mano, a nga tau kotahi mano rite tonu ki te ra kotahi.
9
E kore te Ariki e whakaroa ki tana kupu whakaari, e kore e rite ki ta etahi e ki nei he whakaroa; engari e manawanui ana ki a tatou, kahore hoki ona hiahia kia mate etahi, engari kia tae katoa mai ki te ripeneta.
10
E puta mai hoki te ra o te Ariki, ano he tahae i te po; ko reira pahemo atu ai nga rangi, tona nui hoki o te tangi; na, ka ngiha nga mea timatanga i te ahi ka rewa; a pau ake i te ahi te whenua me ana mahi.
11
Na, mo te rewa nei enei mea katoa, kia pehea ra he tikanga ma koutou i runga i te whakahaere tapu i te karakia;
12
Me te tumanako atu me te takare atu ano koutou ki te taenga mai o te ra o te Atua, e rewa ai nga rangi i te ahi, e ngika ai nga mea timatanga e memeha ai?
13
Heoi kei te tumanako atu nei tatou ki nga rangi hou ki te whenua hou, ki tana i whakaari mai ai, ko reira noho ai te tika.
14
Mo konei ra, e aku hoa aroha, i a koutou ka tumanako atu na ki enei mea, kia puta o koutou uaua kia rokohina ai koutou e ia i runga i te rangimarie, tē whai ira, tē whai koha.
15
Kia mahara ano koutou ki te manawanui o to tatou Ariki he whakaoranga; ko te mea hoki ia i tuhituhia ki a koutou e to tatou teina aroha e Paora, he mea i rite tonu ki te matauranga kua homai nei ki a ia;
16
I pera hoki i ana pukapuka katoa, i korerotia hoki enei mea ki reira; kei reira ano hoki etahi mea e pakeke ana ki te whakaaro, whakawiria ketia ake e te hunga kuare e te hunga kahore ano i u, ko ta ratou hanga ano ia ki era atu Karaipiture, a ngaro iho ratou.
17
Na, e aku hoa aroha, ka mātau wawe nei koutou, kia tupato kei kahakina atu koutou e te hē o te hunga kino, kei taka atu, kei kore e u.
18
Engari kia peke ake i runga i te aroha noa, i te matauranga o to tatou Ariki, ara o te Kai whakaora o Ihu Karaiti. Waiho atu i a ia te kororia, aianei a ake tonu atu. Amine.