- 1
- A, i mea ano a Ahitopere ki a Apoharama, Tena kia whiriwhiria etahi tangata e ahau, kia kotahi tekau ma rua nga mano, kia whakatika atu ahau ki te whai i a Rawiri i te po nei.
- 2
- A ka huakina atu ia e ahau i a ia e ngenge ana, i nga ringa e kaha-kore ana; na, ka whakaoho ahau i a ia, a ka rere tona nuinga katoa, ko reira ahau patu ai i te kingi, i a ia anake.
- 3
- Katahi ka whakahokia mai e ahau te iwi katoa ki a koe: ko te hokinga mai tenei o te katoa, ki te mau te tangata e whaia nei e koe; penei ka ata noho te iwi katoa.
- 4
- A, tika tonu taua kupu ki te whakaaro iho a Apoharama, ki te whakaaro ano hoki a nga kaumatua katoa o Iharaira.
- 5
- Na ka mea a Apoharama, Tena karangatia ano hoki a Huhai Araki, kia rongo ai tatou ki tana kupu.
- 6
- A, te taenga mai o Huhai ki a Apoharama, ka korero atu a Apoharama ki a ia, ka mea, Ko te kupu tenei i korero ai a Ahitopere: me mea ranei e tatou tana i korero ai? ki te kahore, korero mai.
- 7
- Na, ko te meatanga atu a Huhai ki a Apoharama, E kore e pai i tenei wa te whakaaro i whakaaro ai a Ahitopere.
- 8
- I mea hoki a Huhai, E mohio ana koe ki tou pāpā, ratou ko ana tangata, he toa ratou, e mamae ana hoki o ratou ngakau, e rite tonu ana ki te pea kua tangohia nei nga kuao i te parae; he tangata whawhai ano hoki tou pāpā; e kore e moe i roto i nga tangata.
- 9
- Nana, kei te piri tera i roto i tetahi rua, i tetahi atu wahi ranei, na, akuanei, te hinganga o etahi o ratou i te timatanga, a ka rangona e etahi, ka ki ia, Kua pa te patu ki te hunga e whai ana i a Apoharama.
- 10
- Na, te toa ano hoki, e rite tonu nei tona ngakau ki te ngakau raiona, ka ngohe noa iho: e mohio ana hoki a Iharaira katoa he marohirohi to pāpā, he toa ano hoki ana tangata.
- 11
- Koia ahau ka mea ai, Me ata kohikohi ki a koe a Iharaira katoa, o Rana, a tae noa ki Peere-hepa; kia rite ki te onepu i te moana te tini; me haere ano hoki koe ki te tatauranga.
- 12
- Na, ka whakaekea atu ia e tatou ki tetahi wahi e kitea ai ia; a ka tau iho ki runga ki a ia, ka pera ano me te tomairangi e tau ana ki runga ki te oneone: a, kore ake ia, kore ake tetahi o ana tangata e toe.
- 13
- A, ki te rere ia ki roto ki tetahi pa, na, ka mau taura atu a Iharaira katoa ki taua pa, a ka toia atu taua pa e tatou ki roto ki te awa, kia kore ra ano e kitea tetahi kohatu, ahakoa ririki, ki reira.
- 14
- Na, ko te meatanga a Apoharama ratou ko nga tangata katoa o Iharaira, Pai atu te whakaaro a Huhai Araki i te whakaaro a Ahitopere. Na Ihowa hoki te tikanga kia whakatakā te whakaaro pai a Ahitopere, he mea kia kawea ai he kino e Ihowa ki runga ki a Apoharama.
- 15
- Katahi a Huhai ka mea ki nga tohunga, ki a Haroko raua ko Apiatara, Ko nga whakaaro tenei a Ahitopere ki a Apoharama ratou ko nga kaumatua o Iharaira; ko aku whakaaro ano hoki enei i whakatakoto atu ai.
- 16
- Na, kia hohoro te tono tangata ki te whakaatu ki a Rawiri. Mea atu, Kaua e moe i tenei po ki nga mānia o te koraha; engari kia hohoro te whiti atu; kei horomia ake te kingi ratou ko tona nuinga katoa.
- 17
- Na, i Ene-rokere a Honatana raua ko Ahimaata e tatari ana; kihai hoki i ahei kia kitea e haere mai ana ki te pa: na, ka haere atu tetahi pononga wahine, a, korerotia atu ana ki a raua, a, haere ana raua ki te whakaatu ki a kingi Rawiri.
- 18
- Otiia, i kitea raua e tetahi taitamariki, a, korerotia atu ana e ia ki a Apoharama: heoi hohoro tonu raua, a ka tae ki te whare o tetahi tangata i Pahurimi. Na, he poka wai tana, i tona marae, a, heke iho ana raua ki reira.
- 19
- Katahi ka tikina tetahi hipoki e te wahine, taupokina ana e ia ki runga ki te poka, na, horahia ana e ia he witi tuki ki runga, a, kihai taua mea i mohiotia.
- 20
- Na, te taenga mai o nga tangata a Apoharama ki te wahine, ki te whare, ka mea, Kei hea a Ahimaata raua ko Honatana? Na, ko te meatanga atu a te wahine ki a ratou, Kua whiti atu raua i te awa wai. Na ka rapu ratou, a, kihai i kitea, a, hoki ana ki Hiruharama.
- 21
- A, i muri i to ratou haerenga ka piki ake raua i roto i te poka, a, haere ana, whakaaturia atu ana ki a Kingi Rawiri; i mea hoki raua ki a Rawiri, Whakatika, hohoro koutou te whiti atu i te wai nei; ko te whakaaro hoki tenei a Ahitopere mo koutou.
- 22
- Na, whakatika ana a Rawiri ratou ko tona nuinga katoa, a, whiti atu ana i Horano ao rawa ake te ra, kihai tetahi i mahue i te whitinga atu i Horano.
- 23
- A, te kitenga o Ahitopere kihai i meatia tana i whakaaro ai, na, whakanohoia ana e ia tana kaihe, a, whakatika ana, haere ana ki tona whare ki tona pa, na, kei te whakariterite i nga mea o tona whare, tarona ana ia i a ia, a, mate ake, tanumia iho ki roto ki te tanumanga o tona pāpā.
- 24
- Na, haere ana a Rawiri ki Mahanaimi. A, i whiti ano a Apoharama i Horano ratou tahi ko nga tangata katoa o Iharaira.
- 25
- A, meatia ana a Amaha e Apoharama hei whakakapi mo Ioapa, hei rangatira mo te ope: na, he tama a Amaha na tetahi tangata, ko Itira tona ingoa, no Iharaira, i haere nei ki roto ki a Apikaira tamahine a Nahaha, ki te teina o Teruia whaea o Ioapa.
- 26
- Na, noho ana a Iharaira ratou ko Apoharama ki te whenua o Kireara.
- 27
- A, te taenga atu o Rawiri ki Mahanaimi, na ka kawea mai e Hopi tama a Nahaha o Rapa o nga tamariki a Amona, e Makiri tama a Amiere o Ro-tepara, ratou ko Paratirai Kireari o Ro-kerimi,
- 28
- He moenga, he peihana, he oko oneone, he witi, he parei, he paraoa, he witi pahuhu, he pine, he pi, me etahi atu, he mea pahuhu,
- 29
- He honi, he pata, he hipi, me te waiu kau, he mea maro, hei kai ma Rawiri ratou ko tonu nuinga: i mea hoki ratou, E mate-kai ana te iwi, e ngenge ana, e mate-wai ana i te koraha.
Address: 
Phone: 
Email: