2nd Thessalonians Chapter 2 - Paipera Tapu 1868 | Te Paipera Tapu 1868

2nd Thessalonians Chapter 2 - Paipera Tapu 1868

1
Na, he mea tenei na matou ki a koutou, e aku teina, mo te taenga mai o to tatou ariki o Ihu Karaiti, mo to tatou huihuinga atu ano ki a ia;
2
Kei whakaoioia wawetia o koutou hinengaro, kei ohorere i ta te wairua ranei, i ta te kupu ranei, i ta te pukapuka ranei, e kiia ana na matou i tuhituhi, kei mea ka tata te ra o te Karaiti.
3
Kei tinihangatia koutou e te tangata ki tetahi mea: e kore hoki e tae wawe mai, kia mātua tae mai te takanga atu, kia whakakitea mai ano hoki te tangata o te hara, te tama a te whakangaromanga:
4
He hoa riri nei ia, e whakakake ana i a ia ki runga ake i nga mea katoa e karangatia ana he Atua, e karakiatia ana ranei, a ko ia ano hei Atua e noho ana i te whare o te Atua, e whakakite ana i a ia ko ia te Atua.
5
Kahore ranei koutou e mahara i a au ano i a koutou, i korerotia e ahau enei mea ki a koutou?
6
A e mātau ana ano koutou ki te mea e arai nei, kia whakakitea mai ra ano ia i tona taima ano.
7
Kei te mahi nei hoki inaianei te kino ngaro: otiia e arai ano tenei e arai nei, a, kia whakawateatia atu ra ano i waenganui.
8
Ko reira whakakitea mai ai taua tangata kino, e whakangaromia e te Ariki ki te ha o tona mangai, e whakakahoretia ki te putanga nui o tona taenga mai.
9
To tera taenga mai rite tonu ki te mahinga a Hatana, i runga i nga mahi kaha katoa, i nga tohu, i nga merekara teka,
10
I nga mahi tinihanga katoa ano o te hē, i roto i te hunga e whakangaromia ana; no te mea kihai i riro i a ratou te aroha o te pono, kia ora ai ratou.
11
Mo konei hoki ka tonoa e te Atua ki a ratou te mahi nui o te tinihanga, kia whakapono ai ratou ki te teka:
12
Kia tukua ai ki te hē te hunga katoa kahore i whakapono ki te pono, a e ahuareka ana ki te hē.
13
Tika tonu ia kia whakawhetai atu matou ki te Atua mo koutou i nga wa katoa, e aku teina e arohaina nei e te Ariki, he mea whiriwhiri na hoki koutou na te Atua no te timatanga ra ano mo te ora, i runga i te whakatapunga a te Wairua, i runga ano i te whakapono ki te pono;
14
Ko te mea tena i karangatia ai koutou e ia, he mea na to matou rongo pai, ara, kia whiwhi ki te kororia o to tatou Ariki o Ihu Karaiti.
15
Na, e aku teina, e tu koutou, kia mau ki nga whakarerenga iho i whakaakona ai koutou, e te kupu e ta matou pukapuka ranei.
16
Na, ma to tatou Ariki ma Ihu Karaiti pu ano, ma te Atua, ara ma to tatou Matua, i aroha mai nei ki a tatou, a homai ana i te whakamarietanga mutunga kore me te mea pai e tumanakohia atu nei, he meatanga na te aroha noa,
17
Māna e whakamarie o koutou ngakau, māna koutou e whakau ki runga ki nga kupu me nga mahi pai katoa.