- 1
- Inaianei ia e kataina mai ana ahau e te hunga e tamariki rawa ana i a au, e te hunga e kore nei ahau e whakaae kia uru o ratou mātua ki roto ki nga kuri o toku kahui.
- 2
- Te kaha ano hoki o o ratou ringaringa, hei aha maku tena? he hanga pirau nei hoki to ratou koroheketanga?
- 3
- He hunga mokemoke i mua, na te rawa-kore hoki, na te hemo-kai; rere ana ratou i mua ake nei ki te koraha, ki te wahi tuhea, ki te ururua.
- 4
- He hutihuti nei to ratou i nga marou i roto i nga rakau ririki, i nga pakiaka ano hoki o nga hunipa hei kai ma ratou.
- 5
- He mea pei atu ratou i roto i nga tangata; i karangarangatia ratou ano he tahae.
- 6
- Noho rawa atu i nga kapiti, i nga awaawa, i nga ana o te whenua, i nga kamaka.
- 7
- Tangi a kaihe ana ratou i roto i nga rakau ririki; huihuia ana ratou ki roto ki nga ongaonga,
- 8
- He tamariki na te kuare, he hunga ingoa kore, he hunga i patua atu i runga i te whenua.
- 9
- Inaianei ia kua waiho ahau hei waiata ma ratou, hei whakatauki ano ahau ma ratou.
- 10
- E whakarihariha mai ana ratou ki a au, e neke rawa atu ana i a au; kahore e kaiponuhia mai e ratou te huwhare ki toku mate.
- 11
- E whakaaro ana kua oti taku te wewete mai e ia, a e whakatupuria kinotia ana ahau e ia, koia i tukua mai ai e ratou te paraire i toku aroaro.
- 12
- I te taha ki matau ka ara nga taitamariki; taia ana e ratou oku waewae, e whakanekehia ake ana e ratou nga ara o o ratou whakangaromanga ki a au.
- 13
- E wawahi ana ratou i toku ara, e whakatupu ana i te he moku; kahore he hoa mahi mo ratou.
- 14
- Rite tonu ki te wai nui e pakaru mai ana to ratou haerenga mai: i taua whakangaromanga nei, huri mai ana ratou ki runga ki a au:
- 15
- Kua tahuri mai nga whakawehi ki a au: e aru ana i toku wairua ano he hau: te whakahauora moku, pahemo ke ana ano he kapua.
- 16
- Inaianei ano kua maringi toku wairua i roto i a au; mau pu ahau i nga ra o te tangihanga.
- 17
- I te po e werohia ana oku wheua i roto i a au; kahore hoki he okiokinga mo oku uaua.
- 18
- He kaha nui no toku mate i ahua ke ai toku kakahu: e awhi nei i a au, e penei ana me te remu o toku koti.
- 19
- Kua makā ahau e ia ki te paru, kua rite ahau ki te puehu, ki te pungarehu.
- 20
- E tangi ana ahau ki a koe, heoi kahore koe e whakao mai ki a au; e tu ana ahau, heoi kahore koe e whai whakaaro mai ki a au.
- 21
- Kua puta ke tau mahi ki a au, kua nanakia; hei hoa riri to ringa kaha ki a au.
- 22
- Kua hapainga ake nei ahau e koe ki te hau; meinga ana tera e koe hei hoiho moku, a moti ake i a koe toku mana.
- 23
- E mohio ana hoki ahau tera ahau e whakahokia iho e koe ki te mate, ki te whare i whakaritea mo te hunga ora katoa.
- 24
- E kore ano ia tona ringa e totoro iho ki te urupa; he tangi ano ranei ta ratou i to reira whakangaromanga?
- 25
- Kihai ianei ahau i tangi ki te tangata he mate nei tona? kihai ranei toku wairua i pouri ki te rawa-kore?
- 26
- Na, tatari ana ahau ki te pai, heoi kua tae mai te kino; tumanako atu ana ahau ki te māramatanga, heoi kua tae mai te pouri.
- 27
- Oku whekau, me te mea e koropupu ana, tē ata takoto; haukotia mai ana ahau e nga ra o te tangihanga.
- 28
- I haereere pouri ahau, kahore hoki he ra; taku whakatikanga ake i roto i te whakaminenga, tangi ana ahau.
- 29
- Hei teina ahau ki nga tarakona, hei hoa mo nga ruru.
- 30
- Toku kiri o toku tinana mangu tonu; wera ana oku wheua i te mahana.
- 31
- Hei mea mo te tangihanga taku hāpa, mo te reo o te hunga e uhunga ana taku okana.
Address: 
Phone: 
Email: