- 1
- A i tona haerenga ki te whare o tetahi o nga rangatira, he Parihi, ki te kai taro i te hapati, na, titiro pu mai ana ratou ki a ia.
- 2
- Na, he tangata kopu tetere tera i tona aroaro.
- 3
- Na, ka oho mai a Ihu, ka korero ki nga kai whakaako o te ture, ki nga Parihi, ka mea, He mea tika ranei te whakaora i te hapati?
- 4
- A kihai ratou i kīkī. Na, ka mau ia ki a ia, a whakaorangia ana, tukua ana kia haere;
- 5
- Na, ka whakahokia mai e ia ki a ratou, ka mea, Ki te taka te kaihe, te kau ranei, o tetahi o koutou ki te poka, e kore ianei e hutia ake e ia i reira pu ano i te ra hapati?
- 6
- A kihai i taea e ratou te utu enei kupu ana.
- 7
- Na, ka korerotia e ia tetahi kupu whakarite ki te hunga i karangatia, i tona kitenga i a ratou e whiriwhiri ana i nga nohoanga rangatira; i mea ia ki a ratou,
- 8
- Ki te karangatia koe e tetahi ki te marenatanga, kaua e noho ki te nohoanga rangatira; kei karangatia hoki e ia tetahi e nui atu ana i a koe;
- 9
- A ka haere mai te tangata i karangatia ai korua, ka mea ki a koe, Tukua he nohoanga mo tenei; a ka whakama koe, ka haere ki to muri nohoanga noho ai.
- 10
- Engari ka karangatia koe, haere, e noho ki to muri nohoanga; mo te tae rawa mai o te tangata nāna koe i karanga, na, ka mea ki a koe, E hoa, neke ake koe: ko reira hoki koe whai kororia ai i te aroaro o nga tāngata e noho tahi ana koutou.
- 11
- Ki te whakanui hoki tetahi i a ia, ka whakaititia; a ki te whakaiti tetahi i aia, ka whakanuia.
- 12
- I mea ano ia ki te tangata nāna nei ia i karanga, E taka koe i te tina, i te hapa ranei, kaua e karangatia ou hoa, kaua hoki ou teina, kaua hoki ou whanaunga, kaua ano hoki nga tāngata taonga e noho tata ana; kei karangatia ano hoki koe, a ka whai utu koe.
- 13
- Engari ka tuku hakari koe, karangatia nga rawa-kore, nga ngongengonge, nga kopa, nga matapo:
- 14
- A ka koa koe; kahore hoki a ratou utu ki a koe: engari ka utua koe a te aranga o te hunga tika.
- 15
- Ano ka rongo ki enei mea tetahi o te hunga e noho tahi ana ki te kai, ka mea ki a ia, Ka koa te tangata kai taro i te rangatiratanga o te Atua.
- 16
- Na, ka mea ia ki a ia, I takā he hapa nui e tetahi tangata, a he tokomaha i karangatia:
- 17
- A ka tonoa tana pononga i te haora o te hapa, hei mea ki te hunga i karangatia, Haere mai; kua rite nei hoki nga mea katoa.
- 18
- Na, ka anga ratou katoa, ka whakakahore ngatahi. Ka mea to mua ki a ia, Kua hokona e ahau he māra, me haere ahau kia kite: e mea ana ahau ki a koe, kia tukua ahau kia whakakahore.
- 19
- Na, ko te meatanga mai a tetahi, E rima takirua nga okiha kua hokona e ahau, ka haere ahau ki te whakamatau: e mea ana ahau ki a koe, kia tukua ahau kia whakakahore.
- 20
- A i mea mai ano tetahi, Kua marenatia ahau ki te wahine, a he mea tenei e kore ai ahau e ahei te haere.
- 21
- Na, te haerenga mai o taua pononga, ka korerotia enei mea ki tona rangatira. Na, ka riri te tangata i te whare, a ka mea ki tona pononga, Hohoro te haere ki nga ara ki nga huarahi o te pa, arahina mai ki konei nga rawakore, nga ngongengonge, nga kopa, me nga matapo.
- 22
- Na, ka mea te pononga, E kara, kua rite tau i mea ai, a tenei ano he wahi takoto noa.
- 23
- A ka mea te rangatira ki te pononga, Haere ki nga huarahi ki nga taiepa, toia hoki kia haere mai, kia kī ai toku whare.
- 24
- Ko taku kupu hoki tenei ki a koutou, E kore tetahi o aua tāngata i karangatia ra e kai i taku hapa.
- 25
- Na, he tini te tangata i haere tahi me ia: ka tahuri ia, ka mea ki a ratou,
- 26
- Ki te haere mai tetahi ki a au, a ka kore e whakakino ki tona pāpā, whaea, wahine, tamariki, teina, tuahine, ae ra ki te ora ano hoki mona ake, e kore ia e ahei hei akonga maku.
- 27
- A ki te kore tetahi e mau ki tona ripeka, e haere mai i muri i a au, e kore ia e ahei hei akonga maku.
- 28
- Ko wai hoki o koutou, ki te mea ia ki te hanga taumaihi, e kore e mātua noho ki te tatau i nga utu, ara, e ranea ana āna mea hei whakaoti?
- 29
- Kei whakatakoto rawa ake ia i te turanga, na, e kore e taea te whakaoti, ka tawai ki a ia te hunga katoa e titiro ana,
- 30
- Ka mea, I timata te tangata nei te hanga whare, a kihai i taea te whakaoti.
- 31
- Ko tehea kingi ranei e haere ana ki te whawhai ki tetahi atu kingi, a e kore e mātua noho, e whakaaro, e ahei ranei ia me nga mano kotahi tekau, te tu ki te riri i tetahi atu, e haere mai ana ki a ia me nga mano e rua tekau?
- 32
- A ki te kahore, i a ia ano kei tawhiti, ka tukua he karere, ka mea kia houhia te rongo.
- 33
- Whaihoki, ko nga tāngata katoa o koutou e kore e whakarere i a ratou mea katoa, e kore e ahei hei akonga maku.
- 34
- He mea pai te tote: otira ki te hemo te ha o te tote, ma te aha ka whai ha ai?
- 35
- E kore e pai mo te whenua, e kore ano hoki hei whakawairakau; a ka akiritia ki waho. Ko ia he taringa ona hei whakarongo, kia rongo ia.
Address: 
Phone: 
Email: