Mark Chapter 5 - Paipera Tapu 1868 | Te Paipera Tapu 1868

Mark Chapter 5 - Paipera Tapu 1868

1
A to ratou whitinga atu ki tera taha o te moana, ki te whenua o nga Kararini.
2
Na, mahuta kau atu i te kaipuke, ka tutaki ki a ia tetahi tangata i roto i nga urupa, he wairua poke tona,
3
Kei nga urupa nei tona nohoanga; a, ahakoa he mekameka, kihai ia i taea te here e tetahi tangata:
4
He maha hoki ona herenga ki nga here waewae, ki nga mekameka, heoi motumotuhia ana e ia nga mekameka, mongamonga noa ano hoki nga here waewae: a kihai tetahi tangata i ahei te whakamarie i a ia.
5
I nga urupa tonu ia, i nga maunga, i te po i te ao, e hamama ana, e haehae ana i a ia ki te kohatu.
6
A, tona kitenga i a Ihu i tawhiti, oma ana ia, koropiko ana ki a ia,
7
A he nui tona reo ki te karanga, ka mea, He aha maua nāu, e Ihu, e te Tama a te Atua i runga rawa? Ko te Atua taku whakaoati mou, na, kaua ahau e whakamamaetia.
8
He meatanga hoki nāna ki a ia, Puta mai i tenei tangata, e te wairua poke.
9
Na, ka ui atu ia ki a ia, Ko wai tou ingoa? A ka whakahokia mai e tera, ka mea, Ko Rihiona toku ingoa: he tokomaha hoki matou.
10
A, nui atu tana inoi ki a ia kia kaua ratou e tonoa i taua whenua.
11
Na, kei reira ano kei nga maunga tetahi kahui poaka e kai ana, tona tini.
12
Na, ka inoi nga rewera katoa ki a ia, ka mea, Tonoa matou ki nga poaka, kia tomo atu matou ki a ratou.
13
Na, tukua tonutia ana ratou e Ihu. Heoi, te putanga mai o nga wairua poke, ka tomo ki roto ki nga poaka: te tino rerenga o te kahui ra te pari ki te moana, (me te mea e rua nga mano;) a paremo iho ki te moana.
14
Na, whati ana nga kai whangai o nga poaka, a korerotia atu ana ki te pa, ki aua whenua. Na, ka puta mai ratou kia kite i taua mea kua meatia nei.
15
A, to ratou taenga mai ki a Ihu, ka kite i te tangata i nohoia nei e nga rewera, tera hoki i te rihiona, e noho ana, kua oti te whakakakahu, kua tika nga whakaaro; a ka mataku ratou.
16
A ka korerotia ki a ratou e te hunga i kite, te meatanga ki te tangata i nga rewera, ki nga poaka hoki.
17
Na, ka anga ratou ka tohe ki a ia kia haere atu i o ratou wahi.
18
Ano ka eke ia ki te kaipuke, ka inoi ki a ia te tangata i nga rewera, kia waiho ia hei hoa mona.
19
Otira kihai a Ihu i tuku i a ia, i mea hoki ki a ia, Haere ki tou whare, ki ou whanaunga, ka korero atu ki a ratou i nga mea nui i meinga nei e te Ariki ki a koe, tana atawhaitanga ano hoki i a koe.
20
Na, ka haere ia ka anga ka korero ki Rekaporihi, i nga mea nui i mea ai a Ihu ki a ia: a miharo ana nga tāngata katoa.
21
A, te whitinga atu ano o Ihu ki tawahi i runga i te kaipuke, he tini te tangata i huihui mai ki a ia: a i te taha ano ia o te moana.
22
Na, ko te haerenga mai o tetahi o nga rangatira o te whare karakia, ko Hairuha tona ingoa; a ka kite i a ia, ka takoto ki ona waewae,
23
A he nui tana inoi ki a ia, ka mea, E whakahemohemo ana taku tamahine nohinohi: kia haere ake koe ki te whakapa i ou ringaringa ki a ia kia ora ai; a ka ora.
24
Na, haere tahi ana raua; a he tini te tangata i aru i a ia, popō tonu ki a ia.
25
Na, ko tetahi wahine e mate ana i te pakaruhanga toto, tekau ma rua nga tau,
26
A he maha nga meatanga mai a nga rata tokomaha ki a ia, hemo noa ana rawa katoa, tē matūtū ake tetahi wahi, heoi kake haere ana te mate;
27
A, tona rongonga ki a Ihu, ka haere mai ki muri, i roto i te mano, a pa ana ki tona kakahu.
28
I mea hoki, Ahakoa pa kau ahau ki ona kakahu, ka ora ahau.
29
A mimiti tonu ake te puna o ona toto; no ka mahara a roto o tona tinana kua ora ia i te mate.
30
Na, mohio tonu a Ihu kua puta he mana i roto i a ia, ka tāhurihuri i roto i te mano, ka mea, Ko wai tenei kua pa nei ki oku kakahu?
31
A ka mea ana akonga ki a ia, E kite ana koe i te mano e popō nei ki a koe, a e mea ana koe, Ko wai tenei kua pa mai ki a au?
32
Heoi tirotiro ana ia kia kite i te wahine i mea nei i tenei mea.
33
Na, ka haere mai te wahine me te wehi me te wiri, i mahara hoki ki te mea i meatia ki a ia, a takoto ana ki tona aroaro, korerotia katoatia atu ana e ia te tikanga ki a ia.
34
Ano ra hoki ko Ihu ki a ia, E ko, na tou whakapono koe i ora ai; haere marie, kia ora koe i tou mate.
35
I a ia ano e korero ana, ka haere mai etahi o nga tāngata o te rangatira o te whare karakia, ka mea mai, Kua mate to tamahine: hei aha ake māu te whakararuraru i te Kai whakaako?
36
A, rongo kau a Ihu i te korerotanga o taua kupu, ka mea ia ki te rangatira o te whare karakia, Kaua e mataku, ko te whakapono ia kia whakapono.
37
A kihai tetahi tangata i tukua kia haere tahi me ia, ko Pita anake, ratou ko Hemi, ko Hoani teina o Hemi.
38
A, te taenga atu ki te whare o te rangatira o te whare karakia, a ka kite ia i te ngangau, i te nui hoki o te tangi o te aue a etahi.
39
Tona tomokanga atu ki roto, ka mea ia ki a ratou, He aha koutou ka ngangau ai, ka tangi ai? kahore te kotiro i mate, engari e moe ana.
40
Na, kataina iho ia e ratou. Heoi ka oti katoa te pei ki waho, ka mau ia ki te pāpā me te whaea o te kotiro, ratou ko ona hoa, a tomo atu ana ki te wahi i takoto ai te kotiro.
41
Na, ka mau ia ki te ringa o te kotiro, a ka mea ki a ia, Tarita kumi; ko tona whakamaoritanga tenei, E ko, ko taku kupu tenei ki a koe, E ara.
42
Na, whakatika tonu ake te kotiro, a haere ana; kotahi tekau ma rua hoki ona tau. Na, ko te tino miharotanga i miharo ai ratou.
43
A he nui tana whakatupatoranga i a ratou, kia kaua tenei e mohiotia e tetahi tangata; a ka kī atu kia homai he kai māna.