- 1
- Na, ka korerotia e Ahapa ki a Ietepere nga mea katoa i mea ai a Iraia, me nga meatanga katoatanga i tana whakamatenga i nga poropiti katoa ki te hoari.
- 2
- Katahi a Ietepere ka tono tangata mai ki a Iraia hei ki mai, Kia meatia mai tenei ki a au e nga atua, me etahi atu mea ano hoki, ki te kahore ahau e mea i a koe i te penei apopo kia pera ano te mate me tetahi o ratou i mate ra.
- 3
- A ka kite ia, na whakatika ana, a haere ana, he mea kei mate, a tae tonu atu ki Peere-hepa o Hura, a, whakarerea ana e ia tana tangata ki reira.
- 4
- Na, haere ana ia ki te koraha, kotahi te ra ki te ara; a, te tukunga atu, ka noho ki raro i tetahi hunipa, a ka inoi kia mate ia; i mea ia, Heoi ra, e Ihowa, tangohia toku wairua, kahore hoki ahau i pai ake i oku mātua.
- 5
- I a ia ano e takoto ana, e moe ana i raro i tetahi hunipa, na, ko tetahi anahera e papaki ana i a ia, e mea ana ki a ia, Maranga ki te kai.
- 6
- Na, titiro rawa ake ia, ko tetahi keke, he mea tunu ki te pungarehu, me tetahi ipu wai i tona urunga. Na, kai ana ia, inu ana, a takoto iho ana ano.
- 7
- Na, ka hoki mai ano te anahera a Ihowa, a ka papaki i a ia ka mea, Maranga ki te kai, he roa hoki te ara, e kore e taea e koe.
- 8
- Na, maranga ana ia, a kai ana, inu ana, a, haere ana (me te mau ano te mana o taua kai,) e wha tekau nga ra e wha tekau nga po, a, tae noa ki Horepa ki te maunga o te Atua.
- 9
- Na, haere ana ia ki reira ki tetahi ana, a moe ana i reira. Na, ko te putanga mai o te kupu a Ihowa ki a ia; i mea ia, E aha ana koe i konei, e Iraia?
- 10
- A ka mea tera, Nui atu toku hae, he whakaaro hoki ki a Ihowa ki te Atua o nga mano; kua whakarerea hoki to kawenata e nga tamariki a Iharaira; ko o aata, wahia iho e ratou, patua iho hoki e ratou o poropiti ki te hoari, a mahue iho ko ahau nei anake, e rapu ana hoki ratou i a au kia whakamatea.
- 11
- Na, ka mea ia, Puta mai, ka tu ki te maunga ki te aroaro o Ihowa. Na, ko te haerenga atu o Ihowa, he nui ano hoki te hau, he kaha, e whakakoara ana i nga maunga, e wahi ana i nga kohatu i te aroaro o Ihowa. Heoi kahore a Ihowa i roto i te rau. A muri iho i te hau ko te ru: heoi kahore a Ihowa i roto i te ru.
- 12
- A i muri iho i te ru ko te ahi: heoi kahore a Ihowa i roto i te ahi, A i muri iho i te ahi ko te reo ngawari, he mea ririki.
- 13
- A, te rongonga o Iraia, ka hipokina e ia tona mata ki tona koroka, a haere mai ana, tu ana i te kuwaha o te ana. Na, ko te putanga mai o tetahi reo ki a ia, ka mea, E aha ana koe i konei, e Iraia?
- 14
- Ano ra ko tera, Nui atu toku hae, he whakaaro hoki ki a Ihowa ki te Atua o nga mano, kua whakarerea hoki to kawenata e nga tamariki a Iharaira, ko o aata wahia iho e ratou, patua iho hoki e ratou o poropiti ki te hoari, a, ko ahau anake kua mahue, e rapu ana hoki ratou i a au kia whakamatea.
- 15
- Na, ko te meatanga mai a Ihowa ki a ia, Haere, hoki atu: tou ara ra kei te koraha o Ramahiku. A ka tae atu koe, whakawahia a Hataere hei kingi mo Hiria.
- 16
- Whakawahia ano hoki a Iehu tama a Nimihi hei kingi mo Iharaira; me whakawahi ano hoki e koe a Eriha tama a Hapata o Apere-mehora hei poropiti i muri i a koe.
- 17
- Na, te hunga e mawhiti atu i te hoari a Hataere, ma Iehu e whakamate. A, te hunga e mawhiti atu i te hoari a Iehu ma Eriha e whakamate.
- 18
- Otiia e whitu enei mano kua whakatoea nei e ahau i roto i a Iharaira, nga turi katoa kihai nei i koropiko atu ki a Paara, me nga mangai katoa kihai nei i kihi i a ia.
- 19
- Na, haere atu ana ia i reira, a, tupono rawa atu ko Eriha tama a Hapata; e parau ana ia, me nga kau i nga ioka kotahi tekau ma rua i tona aroaro, ko ia i te tekau ma rua: na, haere ana a Iraia i tona taha, a, makā ana e ia tona koroka ki runga ki a ia.
- 20
- Na, whakarerea ake e tera nga kau, a, rere ana, ki te whai i a Iraia, a ka mea, Kia kihi ahau i toku pāpā, i toku whaea, ne? ka haere ai ki te whai i a koe. Ano ra ko tera ki a ia, Haere, e hoki: i aha hoki ahau ki a koe?
- 21
- Na, hoki ana tera i te whai i a ia, a ka mau ki nga kau o tetahi ioka, patua iho, kohuatia iho o raua kikokiko ki nga mea o nga okiha, hoatu ana e ia te kikokiko ki nga tangata, a kainga ana e ratou. Na, whakatika ana ia, haere ki te whawhai i a Iraia, a, mahi ana ki a ia.
Address: 
Phone: 
Email: