- 1
- Te taenga mai o Rawiri, ratou ko ana tangata ki Tikiraka i te toru o nga ra, na, kua huaki mai nga Amareki ki te taha ki te tonga ki Tikiraka ano hoki, patua ana a Tikiraka e ratou, tahuna ake ki te ahi;
- 2
- Whakaraua atu ana hoki e ratou nga wahine o reira, kihai i whakamatea tetahi tangata, te iti, te rahi; engari i kahakina atu, a haere ana i ta ratou haere.
- 3
- Heoi te taenga mai o Rawiri ratou ko ana tangata ki te pa, na, kua oti te tahu ki te ahi, kua whakaraua atu ano hoki a ratou wahine, a ratou tamariki, a ratou tamahine.
- 4
- Na, ka puaki te reo o Rawiri ratou ko ana tangata, tangi ana ratou, a kahore noa o ratou kaha ki te tangi.
- 5
- I riro ano hoki nga wahine tokorua a Rawiri, a Ahinoama o Ietereere, raua ko Apikaira ko te wahine a Napara o Karamere.
- 6
- Na, mamae rawa a Rawiri, no te mea i kupukupu te nuinga kia akina ia ki te kohatu; i mamae hoki te ngakau o te iwi katoa o ia tangata, o ia tangata, ki a ratou tamariki ki a ratou tamahine: otiia i u a Rawiri ki a Ihowa ki tona Atua a whai kaha ana ia.
- 7
- Na, ka mea a Rawiri ki a Apiatara tohunga, tama a Ahimereke, Tena, maua mai te epora ki a au. Na, mana ana te epora e Apiatara ki a Rawiri.
- 8
- Katahi a Rawiri ka ui atu ki a Ihowa, ka mea, Me whai ranei tenei taua e ahau? e mau ranei ratou i a au? Na, ko tana meatanga mai, Whaia; ta te mea ka mau pu ratou i a koe, a ka riro katoa mai au i a koe.
- 9
- Na, haere ana a Rawiri ratou ko ana tangata e ono rau, kua tae ki Awa Pehoro, a mahue ana i a ratou etahi ki reira noho ai.
- 10
- Na, whai tonu ana a Rawiri ratou ko nga tangata e wha rau: e rua hoki nga rau i noho; i ruha rawa hoki ratou, tē whiti ai i Awa Pehoro.
- 11
- Na, kua tupono atu ratou ki tetahi tangata o Ihipa i te parae, a kawea mai ana ia ki a Rawiri. Na, ka homai e ratou he taro mana, a kai ana ia: whakainu ano hoki ratou i a ia ki te wai.
- 12
- I homai ano hoki e ratou he maramara no tetahi papa piki me etahi tautau karape e rua, na, ka kai ia, a, ka hoki mai tona wairua ki a ia; e toru hoki nga ra, e toru nga po ona kihai nei ia i kai i te kai, kihai i inu i te wai.
- 13
- Na, ko te meatanga atu a Rawiri ki a ia, Na wai koe? no hea hoki koe? Ano ra ko ia, He tamaiti ahau no Ihipa, he pononga na tetahi Amareki; i whakarerea ahau e toku ariki, no te mea i mate ahau, ka toru enei ra.
- 14
- I huakina e matou te taha ki te tonga o nga Kereti, me te wahi i Hura, me te taha ki te tonga o Karepe; tahuna ake hoki e matou a Tikiraka ki te ahi.
- 15
- Na, ka mea a Rawiri ki a ia, E taea ranei ahau te kawe e koe ki raro ki te taua ra? Ano ra ko ia, Oatitia mai te Atua ki a au, e kore ahau e whakamatea e koe, e kore ano hoki e tukua ki roto ki nga ringa o toku rangatira, a ka kawea koe e ahau ki raro ki taua taua nei.
- 16
- A, tana kawenga i a ia ki raro, na, kua wawa noa atu ratou ki te mata o te whenua katoa; e kai ana, e inu ana, e kanikani ana, mo nga taonga nui katoa i riro mai i a ratou i te whenua o nga Pirihitini i te whenua hoki o Hura.
- 17
- Na, patua iho ratou e Rawiri i te puaotanga, a taea noatia te ahiahi o te aonga ake: kihai hoki tetahi o ratou i mawhiti, heoi ano ko etahi taitamariki e wha nga rau i eke ki nga kamera, a rere ana.
- 18
- I riro mai ano hoki i a Rawiri nga mea katoa i tangohia e nga Amareki: i riro mai ano hoki i a Rawiri ana wahine tokorua.
- 19
- Kihai hoki i ngaro tetahi o a ratou mea; te iti, te rahi, nga tamariki me nga tamahine, nga taonga, me nga mea katoa i tangohia e ratou; i hoki katoa mai ki a Rawiri.
- 20
- I mau ano hoki i a Rawiri nga hipi katoa me nga kahui; arahina atu ana e ratou i mua i era atu kararehe, i mea ano ratou, Ko te taonga parakete tenei a Rawiri.
- 21
- Te taenga mai o Rawiri ki nga tangata e rua rau i ruha nei, a kihai i aru i a Rawiri, i meinga hoki e ratou kia noho ki Awa Pehoro: na, ka puta mai ratou ki te whakatau i a Rawiri, ki te whakatau ano hoki i ona hoa: a ka tata mai a Rawiri ki aua tangata, na, ka owha atu ia ki a ratou.
- 22
- Katahi ka oho ake te hunga kino katoa, nga tangata o Periara i roto i nga tangata i haere tahi ratou ko Rawiri, ka mea, Kihai ratou i haere tahi tatou, na, e kore e hoatu e tatou ki a ratou etahi o nga taonga i riro mai i a tatou, heoi ano ko te wahine me nga tamariki a tenei, a tenei, na, ma ratou e arahi atu, e haere.
- 23
- Na, ko te meatanga atu a Rawiri, Kaua e pena, e aku teina, ki ta Ihowa i homai ai ki a tatou; nāna nei hoki tatou i tiaki, a homai ana e ia ki o tatou ringa taua ope i haere ake ra ki a tatou.
- 24
- Ko wai hoki hei whakarongo atu ki tenei mea a koutou? engari kia rite ki te wahi a te tangata e haere atu ana ki te whawhai te wahi a te tangata noho ki nga mea: kia rite tonu te wahi ma ratou.
- 25
- Na, waiho tonu iho e ia taua mea hei tikanga, hei ritenga ma Iharaira, no taua rangi ano, a tuku iho ki tenei ra.
- 26
- A, te taenga mai o Rawiri ki Tikiraka, na, ka tonoa e ia etahi o nga taonga ki nga kaumatua o Hura, ki ona hoa, a ka mea, Tena tetahi manaakitanga mo koutou no nga taonga o nga hoa riri o Ihowa.
- 27
- Ki nga tangata hoki o Pete-ere, ki o Hamoto ki te tonga, ki era hoki i Iatiri.
- 28
- Ki o Aroere ano hoki, ki o Hipimoto, ki o Ehetemoa.
- 29
- Ki o Hakara, ki o nga pa ano hoki o nga Ierameeri, ki o nga pa ano hoki o nga Keni,
- 30
- Ki o Horema, ki o Korahana, ki o Ataka,
- 31
- Ki o Heperona ano hoki, ki nga wahi katoa ano hoki i haereere ai a Rawiri ratou ko ana tangata.
Address: 
Phone: 
Email: