- 1
- A i te mea kua koroheketia a Ihaka, a kua atarua ona kanohi, i kore ai ia e kite, na, ka karangatia e ia a Ehau tana tamaiti kaumatua, ka mea ki a ia, E taku tamaiti, a ka mea mai ia ki a ia, Tenei ahau.
- 2
- Na, ka mea ia, Nana, ka koroheketia nei ahau, a e kore e mohio ki te ra e mate ai ahau:
- 3
- Na, tena, mauria atu o mea, to papa pere me to kopere, a haere ki te koraha, ki te hopu kai maku;
- 4
- Ka takā ai i tetahi kai reka maku: hei taku i pai ai, a ka mau mai ki a au hei kai maku; kia manaaki ai toku wairua i a koe i te mea kahore ano ahau kia mate noa.
- 5
- A i rongo ano a Ripeka i te kupu a Ihaka ki a Ehau ki tana tamaiti. Na, ko te haerenga o Ehau ki te koraha ki te hopu kai, hei maunga mai mana.
- 6
- Na, ka korero atu a Ripeka ki a Hakopa ki tana tamaiti, ka mea, Nana, kua rongo ahau i tou papa e korero ana ki a Ehau ki tou tuakana, e mea ana,
- 7
- Mauria mai maku tetahi kai, ka taka hoki i tetahi kai reka maku, hei kai maku, kia manaaki ai ahau i a koe i te aroaro o Ihowa keiwha mate ahau.
- 8
- Na, tena, whakarongo mai ki toku reo, e taku tamaiti, kia rite ki taku e whakahau atu nei ki a koe.
- 9
- Haere ra ki te kahui, tikina atu hoki i reira etahi kuao koati maku, kia rua, hei nga mea pai, a maku ena mea e taka hei kai reka ma tou papa, hei pera me tana e pai ai:
- 10
- A me kawe atu e koe ki tou papa, hei kai mana, kia manaaki ai ia i a koe keiwha mate ia.
- 11
- Na, ka mea mai a Hakopa ki a Ripeka ki tona whaea, Na, he tangata huruhuru a Ehau toku tuakana, ko au ia he tangata maenene:
- 12
- Tera pea toku papa e whawha mai ki a au, a ka rite ahau ki te tangata tinihanga ki tana whakaaro mai: a he kanga te mea e riro mai i a au, kahore hoki he manaakitanga.
- 13
- Na, ko te meatanga mai a tona whaea ki a ia, Hei runga i a au tou kanga, e taku tamaiti: kia whakarongo mai ia koe ki toku reo, a haere, tikina aua mea ki a au.
- 14
- Na, haere ana ia ki te tiki, a kawea mai ana ki tona whaea: a ka takā e tona whaea he kai reka, he pera hoki me to tona papa i pai ai.
- 15
- Na, ka tikina e Ripeka nga kakahu papai o Ehau o tana tamaiti kaumatua, i a ia hoki ena mea i roto i te whare; a whakakakahuria atu ana e ia ki a Hakopa ki tana tamaiti o muri:
- 16
- A i whakapiritia ano e ia nga hiako o nga kuao koati ki ona ringaringa, ki te wahi maenene hoki o tona kaki:
- 17
- Na, ka hoatu e ia te kai reka me te taro, i hangā e ia, ki te ringaringa o Hakopa o tana tamaiti.
- 18
- Na, ka haere ia ki tona papa, ka mea atu, E toku matua: a ka mea mai ia, Tenei ahau; ko wai koe, e taku tamaiti?
- 19
- Na, ka mea atu a Hakopa ki tona papa, Ko Ehau ahau, ko to matamua; kua oti i a au tau i ki mai ai ki a au: maranga ra, noho ake ki te kai i te kai i hopukia mai nei e ahau, kia manaaki ai tou wairua i a au.
- 20
- Na, ko te meatanga mai a Ihaka ki tana tamaiti, Na te aha i hohoro ai koe te kite, e taku tamaiti? A ka mea atu ia, Na Ihowa hoki na tou Atua i mea kia tupono mai ki toku aroaro.
- 21
- A ka mea mai a Ihaka ki a Hakopa, Neke mai nei, kia whawha atu ai ahau ki a koe, e taku tamaiti, ko Ehau ranei koe, ko taku tamaiti pu, kahore ranei.
- 22
- Na, ka neke atu a Hakopa ki a Ihaka ki tona papa, a ka whawha mai ia ki a ia, a ka mea, Ko te reo, no Hakopa te reo, ko nga ringaringa ia, no Ehau nga ringaringa.
- 23
- A kihai ia i mohio ki a ia, no te mea he huruhuru ona ringaringa, i rite ki nga ringaringa o Ehau o tona tuakana: na, ka manaaki ia i a ia.
- 24
- A ka mea, Ko taku tamaiti pu ranei koe ko Ehau? A ka mea atu ia, Ko au ra tenei.
- 25
- Na, ka mea mai ia, Kawea mai ki a au, kia kai ai ahau i te kai i hopukia mai e taku tamaiti, kia manaaki ai toku wairua i a koe. Na, kawea atu ana e ia ki a ia, a kai ana ia: a i kawea ano e ia he waina ki a ia, a inu ana ia.
- 26
- Katahi ka mea mai a Ihaka tona papa ki a ia, Neke mai nei ki te kihi i a au, e taku tamaiti.
- 27
- Na, ka neke atu ia, a ka kihi ia i a ia: a ka hongi ia i te haunga o ona kakahu, a ka manaaki i a ia, ka mea, Titiro hoki, rite tahi te haunga o taku tamaiti ki te haunga o te parae i manaakitia e Ihowa:
- 28
- A kia homai ano e te Atua ki a koe te tomairangi o te rangi, me te momonatanga o te whenua, kia nui ano hoki te witi me te waina:
- 29
- Kia mahi nga iwi ki a koe, kia piko iho hoki nga tauiwi ki a koe: kia waiho koe hei rangatira mo o teina, a kia piko iho ki a koe nga tamariki a tou whaea: kia kangā te tangata e kanga ana i a koe, a kia manaakitia te tangata e manaaki ana i a koe.
- 30
- A te mutunga o te manaakitanga a Ihaka i a Hakopa, a, puta kau atu a Hakopa i te aroaro o Ihaka o tona papa, na, ka tae mai a Ehau tona tuakana i tana hopu kirehe mohoao.
- 31
- Kua oti ano hoki i a ia tetahi kai reka te taka, a kawea mai ana ki tona papa, na ka mea mai ia ki tona papa, Kia ara ake toku papa, ki te kai i te mea i hopukia mai e tana tamaiti, kia manaaki ai tou wairua i a au.
- 32
- Na, ka mea mai a Ihaka tona papa ki a ia, Ko wai koe? A ka mea atu ia, Ko to tamaiti ahau, ko Ehau, ko to matamua.
- 33
- Na, tino wiri rawa ana a Ihaka, a ka mea, Ha, ko wai ra tenei i hopukia nei he kai e ia, a kawea mai ana ki a au, a kainga katoatia ana e ahau i te mea kahore ano koe i tae mai, a manaakitia ana ia e ahau? ae ra, ka manaakitia ano ia.
- 34
- A, te rongonga o Ehau i nga kupu a tona papa, na, ka tangi ia, he nui, he tiwerawera te tangi, a ka mea ki tona papa, Manaakitia ahau, ae ra, ahau ano hoki, e toku papa.
- 35
- A ka mea mai ia, I haere tinihanga mai tou teina, a riro ana tou manaakitanga i a ia.
- 36
- Na, ka mea ia, Ehara ianei a Hakopa i te ingoa e tika ana kia karangatia ki a ia? ka rua nei hoki ana mamingatanga i a au: ko taku matamuatanga kua riro i a ia; a, inaianei nei kua riro taku manaakitanga i a ia. A ka mea ano ia, Kahore ranei i mahue atu ki a koe tetahi manaakitanga moku?
- 37
- Na, ka whakahokia mai e Ihaka, a ka mea ki a Ehau, Na, kua waiho nei ia e ahau hei rangatira mou, kua hoatu ano hoki ona tuakana katoa ki a ia hei apa; a kua whakaukia ake ia e ahau ki te witi ki te waina: a ko te aha hoki taku e mea ai ki a koe, e taku tamaiti?
- 38
- Na, ka mea a Ehau ki tona papa, Kotahi ano ianei tau manaakitanga, e toku papa? manaakitia ahau, ae ra, ahau ano hoki, e toku papa. Na, nui atu te reo o Ehau ki te tangi.
- 39
- Na, ka whakahokia mai e Ihaka e tona papa, a ka mea ki a ia, Na, no te momonatanga o te whenua te nohoanga mou, no te tomairangi hoki o te rangi i runga;
- 40
- A ma to hoari e ora ai koe, a me mahi koe ki tou teina; a tenei ake, kei to kakenga hei rangatira, na, ka wahia atu e koe tana ioka i tou kaki.
- 41
- Na, ka mauahara atu a Ehau ki a Hakopa mo te manaakitanga i manaakitia ai ia e tona papa: a ka mea a Ehau i roto i tona ngakau, E tata ana nga ra e uhungatia ai toku papa; ko reira ahau patu ai i toku teina i a Hakopa.
- 42
- Na, ka korerotia mai ki a Ripeka nga kupu a Ehau a tana tamaiti kaumatua: a ka tono tangata atu ia, ki te karanga i a Hakopa i tana tamaiti o muri, ka mea ki a ia, Tenei a Ehau tou tuakana te whakamarie nei i a ia, te mea nei ki a koe kia patua e ia.
- 43
- Na, whakarongo mai aianei, e taku tamaiti, ki toku reo; whakatika, rere atu ki a Rapana ki toku tungane ki Harana;
- 44
- A hei a ia koe noho ai mo etahi rangi, kia tahuri atu ra ano te aritarita a tou tuakana;
- 45
- Kia tahuri atu ra ano i a koe te riri a tou tuakana, kia wareware ano hoki i a ia tau i mea ai ki a ia: katahi ahau ka tono tangata atu ki te tiki i a koe i reira: kia tangohia atu korua i a au i te rangi kotahi hei aha?
- 46
- Na, ka mea mai a Ripeka ki a Ihaka, E hoha ana ahau ki te ora i nga tamahine a Hete: ki te tango a Hakopa i tetahi wahine mana i roto i nga tamahine a Hete, i tetahi e penei ana me enei tamahine o te whenua nei, hei aha ake maku te ora?
Address: 
Phone: 
Email: