Hosea Chapter 6 - Paipera Tapu 1868 | Te Paipera Tapu 1868

Hosea Chapter 6 - Paipera Tapu 1868

1
Haere mai, tatou ka hoki ki a Ihowa: nana hoki i haehae, a mana tatou e rongoa, nana i patu, mana ano tatou e takai.
2
Kia rua nga ra ka whakaorangia tatou e ia; i te toru ano hoki o nga ra ka whakaarahia tatou e ia, a ka ora tatou i tona aroaro.
3
Ko reira tatou mohio ai, ki te whaia tonutia e tatou te mohiotanga ki a Ihowa: tona putanga ake tūturu tonu, koia ano kei to te ata, tona taenga mai ki a tatou rite tonu ki to te ua, ka rite ki to muri, ki to mua ua i runga i te whenua.
4
Me pehea koe e ahau, e Eperaima? Me pehea koe e ahau, e Hura? rite tonu hoki to koutou aroha ki te kapua o te ata, ki te tomairangi o te atatu, kua riro.
5
Na reira taku hahaunga i a ratou ki nga poropiti, tukitukia ana ratou e ahau ki nga kupu a toku mangai: rite tonu ano hoki o whakaritenga whakawa ki te putanga ake o te māramatanga.
6
Ko taku hoki i pai ai ko te tohu-tangata, hāunga te patunga tapu; te mātauranga ki te Atua, pai ake i nga tahunga tinana.
7
Ta ratou nei, rite tonu ki ta Arama, kua whakatakā e ratou te kawenata: tinihanga ana ratou ki a au i reira.
8
He pa a Kireara no nga kai mahi o te he, poke tonu i te toto.
9
Rite tonu hoki ki ta nga taua pahua e whanga ana ki te tangata, ta te ropu o nga tohunga kua ngakau tahi nei ki te kohuru ki te huarahi; kei te mahi hoki ratou i nga whakaaro he.
10
He hanga whakawehi taku i kite ai ki te whare o Iharaira: he puremutanga kei a Eperaima, kua poke a Iharaira.
11
Kua rite ano hoki i a ia he tapahanga witi ki a koe, e Hura, i te mea e whakatahuritia ana e ahau te whakaraunga o toku iwi.