- 1
- I runga i taku moenga i te po i rapua e ahau ta toku wairua i aroha ai: i rapua e ahau, heoi kihai i kitea e ahau.
- 2
- Ka whakatika ahau aianei, ka kopikopiko i roto i te pa, i nga huarahi, i nga waharoa, ka rapu i ta toku wairua i aroha ai: rapua ana ia e ahau, heoi kihai i kitea.
- 3
- I tutaki ki a au nga kai tiaki e kopikopiko nei i roto i te pa: ano ra ko ahau, I kite ranei koutou i ta toku wairua e aroha ai?
- 4
- Pahemo kau atu ratou, kua tutaki ahau ki ta toku wairua e aroha ai. Kei te pupuri ahau i a ia; kihai hoki ia i tukua atu e ahau: kawea tonutia atu ia e ahau ki te whare o toku whaea, ki te ruma o te wahine i whanau ai ahau.
- 5
- He tohe tenei naku ki a koutou, e nga tamahine o Hiruharama, i te aroaro o nga aneterope, o nga hatā o te parae, kaua e whakaoho, kaua e whakaara i taku e aroha ai, kia pai ra ano ia.
- 6
- Ko wai tenei e haere mai nei i te koraha, ano ko nga pou paowa, kakara tonu i te maira, i te parakihe, i nga puehu katoa a te kai hoko?
- 7
- Nana, tona moenga, ara, to Horomona; e toru tekau nga tangata marohirohi i tetahi taha, i tetahi taha, no nga marohirohi o Iharaira.
- 8
- He hunga mau hoari ratou katoa, he mea whakaako ki te whawhai; kei tona huwha ano te hoari a tenei, a tenei, i te wehi hoki i te po.
- 9
- I hangā e Kingi Horomona he hariata mona, no Repanona te rakau.
- 10
- Nga pou o taua mea he mea hanga nana ki te hiriwa, he koura a raro, he papura tona hipoki iho, he mea whariki a waenganui ki te aroha, mo nga tamahine o Hiruharama.
- 11
- Haere atu, e nga tamahine o Hiona, tirohia atu a Kingi Horomona, me te karauna ano i karaunatia ai ia e tona whaea i te ra o tona marenatanga, i te ra ano hoki i koa ai tona ngakau.
Address: 
Phone: 
Email: