- 1
- Na, kua tata nga ra o Rawiri e mate ai; a ka ako iho ia i tana tama a Horomona, ka mea,
- 2
- E haere ana tenei ahau i te ara o te whenua katoa: na, kia kaha koe, kia whakatangata?
- 3
- Kia mau ki nga mea a Ihowa a tou Atua; haere i ana ara; kia mau ki ana tikanga, ki ana whakahaunga, ki ana whakariteritenga, ki ana whakaaturanga ki nga mea kua oti te tuhituhi ki te ture a Mohi, kia tika ai tau i nga mea katoa e mea ai koe, i nga wahi katoa e tahuri atu ai koe.
- 4
- Kia mana ai i a Ihowa tana kupu i korero ai ia moku, i mea ai, Ki te tupato iho o tamariki ki to ratou ara, ki te whakapaua katoatia o ratou ngakau, o ratou wairua, ki te haere i toku aroaro i runga i te pono, e kore e whakakorea, (e ai ki tana) tetahi tangata mau mo runga i te torona o Iharaira.
- 5
- E mohio ana ano hoki koe ki ta Ioapa tama a Teruia i mea ai ki a au, ki tana hoki i mea ai ki nga rangatira ope tokorua o Iharaira, ki a Apanere tama a Nere, ki a Amaha tama a Ietere, i patua na e ia, a whakahekea ana nga toto o te whawhai ki runga ki te rangimarie, whakahekea ana nga toto o te whawhai ki runga ki tona whitiki e mau ana ki tona hope, ki runga ki ona hu e mau ana ki ona waewae.
- 6
- Na, kia rite tau e mea ai ki tau i matau ai, kaua ano hoki e tukua tona upoko hina kia heke atu i runga i te rangimarie ki te rua.
- 7
- Kia puta ano hoki tou aroha ki nga tama a Paratirai Kireari kia uru hoki ratou ki te hunga e kai ana ki to tepu: i pera hoki ratou, i whakatau ki a au i toku rerenga i tou tuakana i a Apoharama.
- 8
- Kei a koe na ano hoki a Himei tama a Kera o Peniamine, o Pahurimi, tera i kanga ra ki a au, kino whakaharahara te kanga, i te ra i haere ai ahau ki Mahanaima: otiia i haere mai ano ki a au ki raro ki Horano ki te whakatau i a au, a, oatitia atu ana a Ihowa e ahau ki a ia; i mea ahau, E kore ahau e whakamate i a koe ki te hoari.
- 9
- Na, kaua ia e whakaharakoretia e koe, he tangata mohio hoki koe, a, e matau ana ki tau e mea ai ki a ia; engari kia heke atu tona upoko hina i runga i te toto ki te rua.
- 10
- Na, moe ana a Rawiri ki ona mātua, a, tanumia ana ki te pa o Rawiri.
- 11
- Na, nga ra i kingi ai a Rawiri ki a Iharaira, e wha tekau nga tau: e whitu nga tau i kingi ai ia ki Heperona, a, e toru tekau ma toru nga tau i kingi ai ki Hiruharama.
- 12
- Na, noho ana a Horomona i runga i te torona o Rawiri o tona pāpā, a u rawa tona kingitanga.
- 13
- Na, ko te haerenga mai o Aronia tama a Hakiti ki a Pate-hepa whaea o Horomona. A ka mea atu tera, I haere mai ranei koe i runga i te pai? A ka mea ia, I runga ano i te pai.
- 14
- I mea ano ia, He kupu taku ki a koe. A ka mea tera, Korero.
- 15
- Na, ko tana meatanga mai, E mohio ana ano koe, i a au te kingitanga, a, i anga mai nga kanohi o Iharaira katoa ki a au hei kingi: heoi kua kauparea ketia nei te kingitanga, a, riro ana i toku teina: na Ihowa hoki i tika ai mana.
- 16
- Na, kotahi tenei tono aku ki a koe: kaua e whakakahoretia taku. A ka mea tera ki a ia, Korero.
- 17
- Na, ko tana meatanga mai, Tena, korero atu ki a Kingi Horomona, (e kore hoki ia e whakakahore ki tau,) kia homai e ia a Apihaka Hunami hei wahine maku.
- 18
- Katahi a Pate-hepa ka mea atu, E pai ana, me korero atu tau e ahau ki te kingi.
- 19
- Na, haere ana a Pate-hepa ki a Kingi Horomona ki te korero i ta Aronia ki a ia. A, whakatika atu ana te kingi ki te whakatau ki a ia, piko iho ana ki a ia, a ka noho iho ano ki runga ki tona torona; i meinga ano hoki e ia kia whakaturia he nohoanga mo te whaea o te kingi, a, noho ana tera ki tona ringa matau.
- 20
- Na, ka mea ia, Kotahi tenei mea iti hei toronga maku ki a koe: kaua taku e whakakahoretia. A ka mea te kingi ki a ia, Tonoa mai, e toku whaea; e kore hoki ahau e whakakahore ki tau.
- 21
- A ka mea ake tera, Kia hoatu a Apihaka Himami hei wahine ma to tuakana ma Aronia.
- 22
- Na, ko te whakahokinga mai a Kingi Horomona, ka mea ki tona whaea, He aha i tonoa ai a Apihaka Hunami e koe ma Aronia? Tonoa ano hoki te kingitanga mona; ko toku tuakana hoki ia; mona, mo Apiatara tohunga, mo Ioapa tama a Teruia.
- 23
- Katahi ka oatitia a Ihowa e Kingi Horomona; i mea ia, Kia meatia mai tenei e te Atua ki a au, me tetahi atu mea ano hoki, ina, he kupu whakamate mona tenei i korerotia nei e Aronia.
- 24
- Na, e ora ana a Ihowa i whakapumau nei i a au, i whakanoho ano hoki i a au ki runga ki te torona o Rawiri o toku pāpā, a, i mea ano i tetahi whare moku, i te pera me tana i korero ai, ko aianei mate ai a Aronia.
- 25
- Katahi ka tonoa e Kingi Horomona a Penaia tama a Iehoiara; a, rere ana tera ki runga ki a ia; na, kua mate.
- 26
- Na, ka mea te kingi ki te tohunga ki a Apiatara, Haere ki to mara ki Anatoto, kua takoto hoki te mate mou: otiia e kore ahau e whakamate i a koe i tenei ra, no te mea nau i mau te aaka o te Ariki, o Ihowa, i mua i a Rawiri i toku pāpā, a, i mate ano hoki i nga matenga katoa o toku pāpā.
- 27
- Na, peia ana a Apiatara e Horomona, whakakahoretia iho hei tohunga ma Ihowa; i rite ai te kupu a Ihowa i korerotia e ia ki Hiro mo te whare o Eri.
- 28
- A, te taenga o te rongo ki a Ioapa: (i anga hoki a Ioapa ki te whai i a Aronia; otiia kihai i anga ki te whai i a Apoharama;) na, rere ana a Ioapa ki te tapenakara o Ihowa; kei te pupuri i nga haona o te aata.
- 29
- A ka korerotia atu ki a Kingi Horomona, Kua rere a Ioapa ki te tapenakara o Ihowa, kei te taha ano tera o te aata. Na, ka ungā atu a Penaia tama a Iehoiara e Horomona; i ki ia, Haere, e rere ki runga ki a ia.
- 30
- A, te taenga atu o Penaia ki te tapenakara o Ihowa, ka mea atu ki a ia, Ko te kupu tenei a te kingi, Puta mai ki waho. Ano ra ko tera, Kahore, engari kia mate ahau ki konei. Katahi ka whakahokia atu te korero e Penaia ki te kingi; i mea ia, Ko te kupu tenei a Ioapa, ko tana hoki tenei i whakahoki mai ai ki a au.
- 31
- Ano ra ko te kingi ki a ia, Meatia ano tana i korero ai; rere atu ki runga ki a ia, ka tanu i a ia; whakakahoretia atu i a au, i te whare ano hoki o toku pāpā, nga toto hara-kore i whakahekea nei e Ioapa.
- 32
- Na, ka whakahokia iho e Ihowa ana toto ki runga ki tona mātenga, nana hoki i rere ki runga ki nga tangata tokorua, ki nga tangata e tika ake ana, e pai ake ana i a ia, patua iho ki te hoari kihai ano hoki toku pāpā a Rawiri i mohio, ara, ki a Apanere tama a Nere, ki te rangatira o te ope a Iharaira, raua ko Amaha tama a Ietere, rangatira o te ope a Hura.
- 33
- Na, ka hoki iho o raua toto ki runga ki te mātenga o Ioapa, ki runga ano hoki ki te mātenga o ona uri, a, ake ake ake; ki a Rawiri ia, ratou ko ona uri, ko tona whare, ko tona torona, ka mau ta Ihowa rongo, a ake ake ake.
- 34
- Na, haere ana a Penaia tama a Iehoiara ki runga, a, rere ana ki runga ki a ia, whakamatea iho, tanumia iho ki tona whare ki te koraha.
- 35
- A, meinga ana e te kingi a Penaia tama a Iehoiara hei rangatira ope i muri i a ia; i meinga ano hoki e te kingi a Haroko te tohunga hei whakakapi mo Apiatara.
- 36
- Katahi te kingi ka tono tangata atu ki te karanga i a Himei, a ka mea ki a ia, Hangā he whare mou ki Hiruharama, hei reira ano hoki koe noho ai; kaua ano hoki e haere atu i reira ahakoa ki hea, ki hea.
- 37
- I te ra hoki e puta ai koe ki waho, e whiti ai i Awa Kitirono, kia tino mohio koe, ko te mate kau mou; hei runga ano i tou mātenga ou toto.
- 38
- Na, ko te meatanga mai a Himei ki te kingi, He pai te kupu na; ka pena ano to pononga me ta toku ariki, me ta te kingi i korero na. Na, he maha nga ra i noho ai a Himei ki Hiruharama.
- 39
- A, i te mutunga o nga tau e toru ka tahuti atu nga pononga tokorua a Himei ki a Akihi ki te tama a Maaka kingi o Kata, a ka korerotia te korero ki a Himei, O pononga ra, kei Kata.
- 40
- Na, whakatika ana a Himei, whakanohoia ana e ia tona kaihe, a, haere ana ki Kata ki a Akihi ki te rapu i ana pononga: heoi haere ana a Himei, a, kawea mai ana e ia ana pononga i Kata.
- 41
- A, te korerotanga ki a Horomona, Kua haere atu a Himei i Hiruharama ki Kata, a, kua hoki mai ano.
- 42
- Na, ka tono tangata atu te kingi ki te karanga i a Himei, a ka mea ki a ia, Kahore ianei koe i whakaoatitia e ahau ki a Ihowa, me taku whakaatu ano ki a koe; me taku ki atu ano, Te ra e puta ai koe ki waho, e haere ai ki hea ranei, ki hea ranei, kia ata mohio koe, ko te mate kau mou? a, i mea mai ano koe ki a au, E pai ana te kupu i rongo ai ahau.
- 43
- Na, he aha koe tē pupuri ai i te oati a Ihowa, i te whakahaunga i whakahaua ai koe e ahau?
- 44
- I mea ano te kingi ki a Himei, E mohio ana koe ki te kino katoa, e mohio ana ano ra tou ngakau, ki tau i mea ai ki toku pāpā ki a Rawiri. Na, ka whakahokia nei e Ihowa to kino ki runga ki tou mātenga.
- 45
- A ka manaakitia a Kingi Horomona, ka pumau tonu ano hoki te torona o Rawiri i te aroaro o Ihowa, a, ake ake ake.
- 46
- Katahi te kingi ka whakahau atu ki a Penaia tama a Iehoiara, haere ana tera ki waho, rere ana ki runga ki a ia, na, kua mate. Na, kua pumau te kingitanga i te ringa o Horomona.
Address: 
Phone: 
Email: