- 1
- Na, ka huihuia e nga Pirihitini a ratou taua katoa ki Apeke, a i te noho ano a Iharaira ki te puna i Ietereere.
- 2
- A, i nga rangatira o nga Pirihitini e haere atu ana me a ratou rau, me a ratou mano, na, ka haere tahi atu ano a Rawiri, ratou ko ana tangata, ko Akihi, i te hiku.
- 3
- Katahi ka mea ake nga rangatira o nga Pirihitini, He aha ta enei Hiperu? Ano ra ko Akihi ki nga rangatira o nga Pirihitini, Ehara ianei tenei i a Rawiri i te tangata a Haora kingi a Iharaira i noho nei ki a au i enei ra, i enei tau ranei, a kahore ahau i kite i tetahi he āna, o te ra ano i riro mai ai ia ki a au, a mohoa noa nei?
- 4
- Na, ka riri mai nga rangatira o nga Pirihitini ki a ia, a ka mea nga rangatira o nga Pirihitini ki a ia, Whakahokia atu tenei tangata, kia hoki ki te wahi i whakaritea e koe mona; kaua ano hoki ia e haere tahi tatou ki te whawhai; kei whawhai ia ki a tatou i roto i te tatauranga; he aha hoki tana mea hei whakamarie mo tona rangatira? he teka ianei ko nga upoko o enei tangata?
- 5
- Ehara ianei tenei i a Rawiri i waiatatia ra, i a ratou e kanikani ana, i a ratou i mea ra, Na Haora ana mano, na Rawiri ana tekau o nga mano i patu.
- 6
- Katahi a Akihi ka karanga ki a Rawiri, a ka mea ki a ia, E ora ana a Ihowa, tika tonu tau, pai tonu hoki ki taku titiro atu tou haerenga atu me tou haerenga mai i a taua nei i te ope; kahore nei hoki i mau i a au tetahi he au, o te rangi ano i haere mai ai koe ki a au, a taea noatia tenei ra: otiia ki te titiro mai a nga rangatira, kahore ou pai.
- 7
- Na, hoki atu aianei, haere hoki i runga i te rangimarie; kei kino tau mahi ki te titiro iho a nga rangatira o nga Pirihitini.
- 8
- Na, ko te meatanga mai a Rawiri ki a Akihi, I aha hoki ahau? ko te aha hoki a to pononga i kitea e koe, o te rangi ano i noho ai ahau ki tou aroaro, a taea noatia tenei ra, ka kore ai ahau e haere ki te whawhai ki nga hoa riri a toku ariki, a te kingi.
- 9
- Na, ka whakahokia atu e Akihi, a ka mea ki a Rawiri, E mohio ana ano ahau e pai ana koe ki taku titiro atu, rite tonu ano ki te anahera a te Atua: otiia ko nga rangatira o nga Pirihitini hei ki mai, Kaua tenei e haere tahi tatou ki runga ki te whawhai.
- 10
- Na, maranga wawe koe i te ata, me nga tangata ano hoki a tou ariki i haere tahi mai nei koutou, a ka maranga wawe koutou i te ata, ka mārama, haere.
- 11
- Na, ka maranga wawe a Rawiri, ratou ko ana tangata, a haere ana i te ata, hoki ana ki te whenua o nga Pirihitini. Ko nga Pirihitini ia i haere ki runga ki Ietereere.
Address: 
Phone: 
Email: