- 1
- E rua tekau ma rima nga tau o Amatia i tona kingitanga ai, a, e rua tekau ma iwa nga tau i kingi ai ia ki Hiruharama. Na, te ingoa o tona whaea, ko Iehoarana, no Hiruharama.
- 2
- A, he tika tana mahi ki ta Ihowa titiro; kihai ia i tapatahi te ngakau.
- 3
- A ka pumau tona kingitanga, na, patua iho e ia ana tangata i patu nei i tona pāpā i te kingi,
- 4
- Ko a raua tama ia kihai i whakamatea e ia; engari i rite tana ki te mea i tuhituhia i roto i te ture i te pukapuka a Mohi, ki ta Ihowa i whakahau ra, i ki ra, Kaua nga mātua e mate mo ta nga tamariki; kaua hoki nga tamariki e mate mo ta nga mātua; engari mate iho tenei mo tana hara, tenei mo tana hara.
- 5
- Na, ka huihuia mai a Hura e Amatia, a, meinga ana ratou e ia hei rangatira mo nga mano, hei rangatira mo nga rau, he mea whakarite tonu ki nga whare o o ratou mātua, puta noa i a Hura raua ko Peniamine. Na, ka taua ratou e ia, te hunga e rua tekau, he maha ake hoki, nga tau, a ka kitea e toru rau mano ratou, whiriwhiri rawa, he hunga haere ki te whawhai, he hunga hapai i te tao, i te whakangungu rakau.
- 6
- Na, utua ana e ia etahi o Iharaira, kotahi rau nga mano, he hunga marohirohi, he maia, kotahi rau nga taranata hiriwa.
- 7
- Na, ko te haerenga mai o tetahi tangata a te Atua ki a ia, ka mea, E te kingi, kaua te taua a Iharaira e haere tahi koutou, no te mea kahore a Ihowa i a Iharaira, ara, i nga tamariki katoa a Eperaima.
- 8
- Na, ki te haere koe, e mahi, kia kaha ki te whawhai; ma Ihowa ano koe e turaki i te aroaro o te hoa riri; he kaha hoki to te Atua ki te awhina, ki te turaki.
- 9
- Na, ko te kianga atu a Amatia ki te tangata a te Atua, Ha, me pehea nga taranata kotahi rau i hoatu e ahau ki te taua a Iharaira? Ano ra ko te tangata a te Atua, Rahi ake i tenei ta Ihowa hei homai ki a koe.
- 10
- Katahi ratou ka wehea atu e Amatia, ara, te taua i haere mai ki a ia i Eperaima, kia haere ai ratou ki to ratou wahi. Na, mura rawa ta ratou riri ki a Hura, a, hoki ana ratou ki to ratou wahi, mura tonu hoki te riri.
- 11
- Na, ka whakakaha a Amatia i a ia, a, arahina atu ana e ia tona iwi, haere ana ki Raorao Tote, patua iho e ia nga tamariki a Heira, kotahi tekau nga mano.
- 12
- Na, era atu mano, kotahi tekau, i ora nei, whakarautia ana ratou e nga tamariki a Hura, kawea ana ki te tihi o te kamaka, makā atu ana e ratou i te tihi o te kamaka, a mongamonga noa ratou katoa.
- 13
- Na, nga tangata o te taua i whakahokia atu nei e Amatia, kei haere tahi ratou ki te whawhai, whakaekea ana e ratou nga pa o Hura, o Hamaria mai ano, a tae noa ki Pete-horono, patua iho etahi o ratou, e toru nga mano, nui atu hoki te taonga i pahuatia e ratou.
- 14
- A, i muri nei i te hokinga mai o Amatia i te patunga i nga Eromi, a ka kawea mai ano e ia nga atua o nga tamariki a Heira, na, ka whakaturia aua atua e ia hei atua mona, koropiko ana ia ki mua i a ratou, tahuna ana e ia he whakakakara ki a ratou.
- 15
- Katahi ka mura te riri a Ihowa ki a Amatia, a, ungā mai ana e ia he poropiti ki a ia, hei ki mai ki a ia, He aha koe i rapu ai i ta nga atua o te iwi na? kihai na hoki to ratou iwi i whakaorangia e ratou i tou ringa.
- 16
- Na, tana korerotanga atu ki a ia, ka mea te kingi ki a ia, Kua waiho ranei koe hei kai whakatakoto whakaaro mo te kingi? Kati tau; mo te aha koe kia patua? Na, mutu ake ta te poropiti; otiia i ki ano ia, E mohio ana ano ahau kua takoto ta te Atua whakaaro kia whakangaromia koe, mo to meatanga i tenei, mou hoki kihai i whakarongo ki taku whakaaro.
- 17
- Katahi a Amatia kingi o Hura ka whakatakoto whakaaro, a, unga tangata atu ana ia ki a Ioaha tama a Iehoahata tama a Iehu kingi o Iharaira, hei ki atu, Tena, taua ka titiro ki o taua kanohi.
- 18
- Na, ka unga tangata atu a Ioaha kingi o Iharaira ki a Amatia kingi o Hura, hei ki atu, I tono karere atu te tataramoa i Repanona ki te hita i Repanona, hei ki atu, Homai to tamahine hei wahine ma taku tamaiti. Na, ko te haerenga atu o tetahi kirehe i Repanona, takahia iho e ia taua tataramoa.
- 19
- E ki ana koe, kua patua na e koe nga Eromi; a, kua whakanekehia ake koe e tou ngakau kia whakapehapeha. E noho ra ki tou whare: he aha koe ka whakapataritari ai e kino ai koe, e hinga ai koutou tahi ko Hura?
- 20
- Heoi kihai a Amatia i rongo; he mea hoki tenei na te Atua, kia hoatu ai ratou e ia ki te ringa o o ratou hoa riri, mo ratou i rapu tikanga i nga atua o Eroma.
- 21
- Na, haere mai ana a Ioaha kingi o Iharaira, a ka titiro raua ko Amatia kingi o Hura ki o raua kanohi ki Pete-hemehe o Hura?
- 22
- Na, kua patua a Hura i te aroaro o Iharaira, a, rere ana ratou ki tona teneti, ki tona teneti.
- 23
- A, i mau ano a Amatia kingi o Hura, tama a Ioaha, tama a Iehoahata i a Ioaha kingi o Iharaira ki Pete-hemehe, kawea mai ana ia ki Hiruharama,wawahia ana e ia te taiepa o Hiruharama, i te kuwaha atu ano o Eperaima, taea noatia te kuwaha o te koki, e wha rau nga whatianga.
- 24
- Na, te koura katoa, te hiriwa, me nga oko katoa i kitea ki te whare o te Atua, ki a Opere-eroma, me nga taonga ano o te whare o te kingi, me etahi tangata hei mea kia mau ai te pai, tangohia ake e ia, a, hoki ana ki Hamaria.
- 25
- A, tekau ma rima nga tau i kingi ai a Amatia tama a Ioaha kingi o Hura i muri i te matenga o Ioaha tama a Iehoahata kingi o Iharaira.
- 26
- Na, era atu meatanga a Amatia, o mua me o muri, nana, kahore ianei i tuhituhia ki te pukapuka o nga kingi o Hura, o Iharaira?
- 27
- Na, no muri nei i te wa i mahue ai i a Amatia te whai i a Ihowa, ka whakatupuria he hē mona ki Hiruharama, a, rere ana ia ki Rakihi. Na, ka unga tangata atu ratou ki te whai i a ia ki Rakihi, a, whakamatea iho ia ki reira.
- 28
- A, kawea mai ana ia e ratou i runga i nga hoiho, tanumia ana ia e ratou ki te taha o ona mātua ki te pa o Hura.
Address: 
Phone: 
Email: