- 1
- Na Paora, na te Apotoro a Ihu Karaiti, ta te Atua hoki i pai ai, na te teina hoki na Timoti, ki te hahi a te Atua i Koriniti, ratou ko te hunga tapu katoa i Akaia katoa:
- 2
- Kia tau ki a koutou te aroha noa me te rangimarie, he mea na te Atua na to tatou Matua, na te Ariki hoki na Ihu Karaiti.
- 3
- Kia whakapaingia te Atua, te Matua o to tatou Ariki o Ihu Karaiti, te Matua o nga mahi tohu, te Atua o te whakamarietanga katoa;
- 4
- Ko ia nei te kai whakamarie i a matou i o matou paweratanga katoatanga, e taea ai e matou te whakamarie te hunga e pēhia ana e te aha ranei e te aha ranei, ara, te whakamarie ki ta te Atua whakamarietanga i a matou.
- 5
- I te mea hoki ka hira tonu nei nga mamae o te Karaiti i roto i a matou, ka meinga ano hoki e te Karaiti kia hira ake to matou whakamarietanga.
- 6
- Na ki te tukinotia matou, he mea ano ia e whakamarietia ai e whakaorangia ai koutou, koia tena ka mahia na, i a koutou ka whakaririka kau na ki aua maemae nei ano e mamae nei matou: ki te whakamarietia matou, he mea ano ia e whakamarietia ai, e whakaorangia ai koutou.
- 7
- A e u ana ta matou whakaaro ki a koutou, e mātau ana hoki, na, kua uru na koutou ki nga mamae, ka uru ano hoki ki te whakamarietanga.
- 8
- Kahore hoki matou e pai kia ngaro i a koutou, e aku teina, i pawera matou ki Ahia, nui atu te pehi i a matou, kihai hoki matou i kaha, a poroporoaki ana matou ki te ora:
- 9
- I roto ano i a matou te kupu mo te mate, kia kore ai e u o matou whakaaro ki a matou ano, engari ki te Atua ki te kai whakaara i te hunga mate:
- 10
- Nāna nei matou i whakaora i taua mate nui, a e whakaora nei ano: e u ana ano o matou whakaaro ki a ia, tera ano ia e whakaora;
- 11
- I a koutou ka mahi tahi na mo matou, ara ka inoi, a ka tokomaha nei nāna i riro mai ai tenei arohatanga noatanga i a matou, kia tokomaha ano hei whakawhetai atu mo te meatanga ki a matou.
- 12
- Ko ta matou hoki tenei e whakamanamana nei, ko te whakaaenga ake o to matou hinengaro, kei runga i te tapatahi i te hianga kore o te Atua, ehara i te mea kei runga i to te kikokiko mohiotanga, engari kei runga i to te Atua aroha noa, to matau whakahaere i te ao, ki a koutou rawa ano ia.
- 13
- Ehara hoki ta matou e tuhituhi nei ki a koutou i te mea ke atu, i ta koutou e korero na i te pukapuka e whakaae na; ina e u ana ano toku whakaaro, tera e whakaaetia e koutou taea noatia te mutunga;
- 14
- Me koutou na hoki i whakaae mai, ko tetahi wahi ki a matou, ko matou ta koutou e whakamanamana ai, pera hoki me koutou ta matou, i te ra o te Ariki o Ihu.
- 15
- Na i toku whakaaro e u ana ki tenei, i mea ahau kia haere atu ki a koutou ki mua, kia tuaruatia ai te pai e riro i a koutou;
- 16
- Kia tika ano ma kona ki Makeronia, kia hoki atu ano i Makeronia ki a koutou, a kia arahina e koutou ki Huria.
- 17
- Na, i a au e whakaaro ana i tenei, he ngakau māmā ranei toku? he whakaaro ranei no te kikokiko oku whakaaro, e mea ai ahau, Ae, ae, kahore, kahore?
- 18
- Otira pono tonu ta te Atua, ehara ta matou kupu ki a koutou i te ae, i te kahore.
- 19
- Ko te Tama hoki a te Atua ko Ihu Karaiti, i kauwhautia nei e matou i roto i a koutou, ara, e ahau e Hiriwanu e Timoti, ehara ia i te ae i te kahore, engari he ae ano i roto i a ia.
- 20
- He ae hoki nga kupu homai katoa a te Atua i roto a ia, he amine ano i roto i a ia, hei kororia mo te Atua i runga i ta tatou nei mahi.
- 21
- Na, te kai whakau i a matou, ia koutou i roto i a te Karaiti, te kai whakawahi i a tatou, ko te Atua;
- 22
- Nāna nei tatou i hiri, a homai ana e ia te wahi tuatahi, ara, te Wairua ki roto ki o tatou ngakau.
- 23
- Na, he karanga tenei naku ki te Atua hei kai titiro mo toku wairua, he tohu naku i a koutou tē tae wawe ai ahau ki Koriniti.
- 24
- Ehara hoki i te mea hei rangatira matou mo to koutou whakapono, engari he hoa mahi matou i te hari mo koutou: na te whakapono hoki koutou i tu ai.
Address: 
Phone: 
Email: