- 1
- A ka taka mai te ra o te Petekoha, e noho tahi ana ratou katoa, kotahi ano hoki te whakaaro.
- 2
- Na, puta whakarere mai ana he harurutanga no te rangi, ano he hau whakaharahara e keri ana, a kī katoa te whare i noho ai ratou.
- 3
- Heoi puta mai ana ki a ratou etahi arero he mea manganga, ano he ahi, a tau iho ana ki runga ki tetahi ki tetahi o ratou.
- 4
- Na, kī katoa ratou i te Wairua Tapu, a ka timata te korero, rereke ana nga reo, rite tonu ki ta te Wairua i hoatu ai ki a ratou kia korerotia.
- 5
- A i Hiruharama e noho ana etahi Hurai, he hunga whakaaro, no nga iwi katoa i raro o te rangi.
- 6
- Na, ka haere te rongo o tenei, ka whakarapopoto te mano, ka pororaru, no te mea ka rangona e tera e tera tona reo e korerotia ana e ratou.
- 7
- Na, ka oho ratou katoa, ka miharo, ka mea tetahi ki tetahi, Na, ehara ianei enei katoa e korero nei i te hunga no Kariri?
- 8
- A na te aha tatou ka rongo nei ia tangata ia tangata i o tatou reo o to tatou whanautanga?
- 9
- Te hunga o Patia, o Miria, o Erama, nga mea e noho ana i Mehopotamia, i Huria, i Kaparokia, i Ponoto, i Ahia,
- 10
- I Perukia, i Pamapuria, i Ihipa, i nga wahi o Ripia e patata ana ki Hairini, me nga manuhiri o Roma, nga Hurai, nga porohiraiti,
- 11
- Nga Kariti, nga Arapi, e rongo ana tatou i a ratou e whakapuaki ana i nga mahi nui a te Atua, a no tatou ano nga reo.
- 12
- A miharo katoa ana ratou, pohehe ana, ka mea tetahi ki tetahi, He aha tenei?
- 13
- Ko etahi i whakamanumanu, i mea, E kī ana ratou i te waina reka.
- 14
- Otira ka whakatika a Pita me te tekau ma tahi, ka karanga ake, ka mea ki a ratou, E nga tāngata o Huria, koutou katoa e noho ana i Hiruharama, kia mohio koutou ki tenei, kia whai taringa mai ki aku kupu:
- 15
- Kahore hoki o enei haurangi me ta koutou e whakaaro nei, ko te toru hoki tenei o nga haora o te ra.
- 16
- Engari ko te mea tenei i korerotia e Hoera poropiti;
- 17
- A tenei ake kei nga ra whakamutunga, e ai ta te Atua; ka ringihia e ahau taku Wairua ki nga kikokiko katoa: a e poropiti a koutou tamariki, a koutou tamahine, e kite ano hoki a koutou taitamariki i nga kitenga, a ka moemoea o koutou kaumatua:
- 18
- I aua ra ano hoki ka ringihia e ahau taku Wairua ki aku pononga tāne, ki aku pononga wāhine, a ka poropiti ratou:
- 19
- Ka hoatu ano e ahau nga mea whakamiharo i te rangi i runga, me nga tohu ki te whenua i raro; he toto, he kapura, he paoa pongere:
- 20
- Ko te ra ka rere ke ka pouri, ko te marama ka whakatoto, i te mea kiano i puta noa mai taua ra nui o te Ariki e rahi nei te rongo:
- 21
- Na, ko reira ano ora ai te hunga katoa e karanga ana ki te ingoa o te Ariki.
- 22
- E nga tāngata o Iharaira, kia rongo koutou ki enei kupu; Ko Ihu o Nahareta, he tangata i whakakitea nuitia e te Atua ki a koutou, i runga i nga merekara i nga mea whakamiharo i nga tohu, i mea te Atua kia mahia e ia i waenganui o koutou, e mahara ana ano ra koutou:
- 23
- Ko tenei tangata i tukua atu, he whakaaro i whakatakotoria, he mea hoki i mohiotia noatia ake e te Atua, tangohia ana e koutou, whakamatea iho, he mea titi e nga ringaringa kino;
- 24
- Na te Atua ia i whakaara ake, nāna i wewete nga mamae o te mate: no te mea e kore ia e taea te pupuri e taua mate.
- 25
- Ko ta Rawiri korero hoki tenei mona, Kua kite noa ake ahau i te Ariki i mua tonu i toku aroaro; kei toku ringa matau nei ia; a e kore ahau e whakakorikoria:
- 26
- Koia i koa ai toku ngakau, i whakamanamana ai hoki toku arero; e takoto tumanako ai ano hoki oku kikokiko:
- 27
- No te mea e kore e waiho e koe toku wairua i te po, e kore ano hoki e tukua to Mea Tapu kia kite i te pirau.
- 28
- Kua whakakitea mai e koe ki a au nga huarahi o te ora; purena tonu toku koa i tou aroaro.
- 29
- E hoa ma, e aku teina, e tika ana kia korerotia nuitia te tupuna a Rawiri e ahau ki a koutou, kua mate ia, kua tanumia, kei a tatou ano hoki tona urupa, a taea noatia tenei ra.
- 30
- He poropiti ano hoki ia, a i mahara ano kua oati te Atua i te oati ki a ia, ka whakaputaina ake a te Karaiti he hua no tona hope, he mea hoki no te kikokiko, hei noho ki runga ki tona torona;
- 31
- I kite wawe ia i tenei, a korerotia ana te aranga mai o te Karaiti, ara tona wairua kihai i waiho i te po, kihai ano hoki tona kikokiko i kite i te pirau.
- 32
- Kua whakaarahia ake tenei Ihu e te Atua: ko matou katoa nga kai whakaatu.
- 33
- Na, ka oti nei ia te whakaikeike e te ringaringa matau o te Atua, a ka homai ki a ia e te Matua te Wairua Tapu i korerotia i mua, kua ringihia mai e ia tenei, e kite nei e rongo nei koutou.
- 34
- Kahore hoki a Rawiri i kake ki runga ki te rangi; heoi e mea ana ia, I mea te Ariki ki toku Ariki, Hei toku ringa matau koe noho ai,
- 35
- Kia meinga ra ano e ahau ou hoa riri hei turanga waewae mou.
- 36
- Mo reira ra kia mātau pu te whare katoa o Iharaira, kua meinga e te Atua hei Ariki hei Karaiti, taua Ihu na ano i ripekatia na e koutou.
- 37
- To ratou rongonga ai, ka pawerawera o ratou ngakau, a ka mea ki a Pita ratou ko era atu apotoro, E hoa ma, e nga tuakana, me aha matou?
- 38
- Na, ko te meatanga atu a Pita ki a ratou, Ripeneta, kia iriiria tena tangata tena tangata o koutou i runga i te ingoa o Ihu Karaiti, hei murunga hara; a ka riro mai i a koutou te homaitanga o te Wairua Tapu.
- 39
- Ki a koutou hoki ki a koutou tamariki te kupu homai, ki te hunga katoa ano hoki o tawhiti, ki nga mea e karanga ai te Ariki to tatou Atua.
- 40
- A he maha ke atu era kupu i korero ai, i kauwhau ai ia, i mea ia, Kia ora koutou i tenei whakatupuranga tutū.
- 41
- Na, nga mea i tango hari i tana kupu i iriiria, a tata tonu ki te toru o nga mano nga wairua i honoa mai i taua ra.
- 42
- A u tonu ratou ki te ako a nga apotoro, ki te whakaaro tahi, ki te whawhati taro, ki nga inoinga.
- 43
- A tau ana te wehi ki nga wairua katoa; he maha hoki nga mea whakamiharo me nga tohu i meinga e nga apotoro.
- 44
- I noho tahi ano te hunga whakapono katoa, i huihuia katoatia ano hoki a ratou mea;
- 45
- A hokoa ana e ratou nga kāinga, me nga taonga, a tuwhaina ana ma te katoa, rite tonu ki te mate o tetahi o tetahi.
- 46
- Noho tonu ano hoki ratou i tenei ra i tenei ra i te temepara, kotahi tonu ano te ngakau, a whawhati taro ana i ia whare i ia whare, kai ana i a ratou kai i runga i te koa, i te ngakau tapatahi;
- 47
- E whakamoemiti ana ki te Atua, e paingia ana hoki e te iwi katoa. Honoa ana hoki e te Ariki i nga ra katoa ki te hahi te hunga e whakaorangia ana.
Address: 
Phone: 
Email: