- 1
- I te toru o nga tau o te kingitanga o Iehoiakimi kingi o Hura ka tae mai a Nepukaneha kingi o Papurona ki Hiruharama, whakapaea ana e ia.
- 2
- Na, ka homai e te Ariki a Iehoiakimi kingi o Hura ki tona ringaringa, me etahi ano o nga oko o te whare o te Atua, a kawea ana e ia ki te whenua o Hinara ki te whare o tona atua; i kawea atu ano nga oko e ia ki roto ki te whare taonga o tona atua.
- 3
- Na, ka ki mai te kingi ki a Ahapenata rangatira o ana unaka kia kawea mai etahi o nga tamariki a Iharaira, o nga uri ano o te kingi, o nga rangatira ano hoki;
- 4
- Etahi tamariki kahore nei o ratou koha, e pai ana te ahua, e mātau ana ki nga whakaaro nui katoa, e mohio ana ki nga tikanga, e mātau ana ki nga whakaaro mohio, he hunga e pai ana hei tu ki te whare o te kingi, he hunga e whakaakona e ratou ki nga pukapuka, ki te reo ano o nga Karari.
- 5
- I whakaritea ano hoki e te kingi tetahi wahi o ta te kingi kai ma ratou; he mea mo ia rangi, mo ia rangi, me tetahi wahi ano o te waina i inumia e ia: nga tau e whakatupuria ai ratou, e toru; a ka taka, me tu ratou ki te aroaro o te kingi.
- 6
- Na, i roto i enei ko etahi o nga tamariki a Hura, ko Raniera, ko Hanania, ko Mihaera, ko Ataria.
- 7
- Na, ka tapā he ingoa mo ratou e te rangatira unaka: tana ingoa mo Raniera, ko Peretehatara; tana mo Hanania, ko Hataraka; mo Mihaera, ko Mehaka; mo Ataria, ko Apere-neko,
- 8
- Na, kua takoto ta Raniera whakaaro i roto i tona ngakau, kia kaua ia e poke i ta te kingi kai, i te waina ranei i inumia e ia. Na, ka tono ia ki te rangatira unaka kia kaua ia e whakapoke i a ia.
- 9
- Kua oti ano hoki a Raniera te mea e te Atua kia manakohia, kia arohaina e te rangatira unaka.
- 10
- Na, ko te meatanga mai a te rangatira unaka ki a Raniera, E wehi ana ahau i toku ariki i te kingi, nāna nei hoki i whakarite ta koutou e kai ai, ta koutou e inu ai: hei aha hoki i tirohia mai ai e ia o koutou mata e kino iho ana i o nga tamariki e pena ana me koutou te kaumatua? pena ka tukua atu e koutou toku upoko ki te kingi.
- 11
- Ano ra hoki ko Raniera ki a Meretara, ki ta te rangatira unaka i whakarite ai hei kai tirotiro mo Raniera, ratou ko Hanania, ko Mihaera, ko Ataria,
- 12
- Tena ra, whakamātauria o pononga, kia kotahi tekau nga ra, kia homai ano hoki he pīni hei kai ma matou, he wai ano hoki hei inu ma matou.
- 13
- A, ka tirohia mai o matou mata i tou aroaro, me te mata ano o nga taitamariki e kai ana i te kai a te kingi, na, kia rite ki tau e kite ai tau e mea ai ki o pononga.
- 14
- Na, ka whakaaetia e ia tenei mea a ratou, a kotahi tekau nga ra i whakamātauria ai ratou e ia.
- 15
- Na, i te mutunga o nga ra kotahi tekau ka kitea o ratou mata, pai atu, tetere atu i o nga tamariki katoa i kai i ta te kingi kai.
- 16
- Katahi ka tangohia atu e Meretara te wahi kai ma ratou, me te waina ano hei inu ma ratou, a homai ana e ia he pīni ma ratou.
- 17
- Na, aua tamariki tokowha, i homai e te Atua ki a ratou he matauranga, he mohiotanga ki nga pukapuka katoa, ki nga whakaaro nui: mohio tonu ano a Raniera ki nga whakakitenga katoa, ki nga moemoea.
- 18
- Na, te takanga o nga ra i ki ai te kingi kia kawea atu ratou, ka kawea atu ratou e te rangatira unaka ki te aroaro o Nepukaneha.
- 19
- Na, ka korerorero te kingi ki a ratou, a kihai i kitea tetahi o ratou e rite ana ki a Raniera ratou ko Hanania, ko Mihaera, ko Ataria: na, tu ana ratou i te aroaro o te kingi.
- 20
- Na, i nga mea katoa o te whakaaro nui, o te matauranga i ui ai te kingi ki a ratou, ka kitea e ia tekau noa atu to ratou pai i to nga tohunga maori katoa, i to nga kai titiro whetu puta noa i tona kingitanga.
- 21
- I tutuki ano a Raniera ki te tuatahi o nga tau o kingi Hairuha.
Address: 
Phone: 
Email: