- 1
- Na, i te tekau ma rua o nga marama, ara, i a Marama Arara, i te tekau ma toru o nga ra o taua marama, i te mea ka tata te mahia te kupu a te kingi, me tana ture, i te ra ano i ki ai nga hoa riri o nga Hurai ka taea e ratou; (otiia i puta ke ano, no te mea i taea e nga Hurai te hunga i kino ki a ratou;)
- 2
- Ka huihui nga Hurai ki o ratou pa puta noa i nga kawanatanga katoa a Kingi Ahahueruha, he mea kia pa ai nga ringa ki te hunga e whai ana kia mate ratou; a, kihai tetahi tangata i tu ki to ratou aroaro; kua tau hoki to ratou wehi ki runga ki nga iwi katoa.
- 3
- A, ko nga rangatira katoa o nga kawanatanga, ratou ko nga kawana, ko nga kawana iti, ko nga kai mahi ano i te mahi a te kingi, hei awhina i nga Hurai; no te mea kua tau te wehi o Mororekai ki runga ki a ratou.
- 4
- He nui hoki a Mororekai i roto i te whare o te kingi, a, i paku ano tona rongo ki nga kawanatanga katoa: kua nui haere hoki taua tangata a Mororekai.
- 5
- Na, patua iho e nga Hurai o ratou hoa riri katoa, he patunga ki te hoari, he parekura, he whakangaromanga; meatia ana e ratou ta ratou i pai ai ki te hunga i kino ki a ratou.
- 6
- I Huhana ano hoki i te whare kingi e rima rau nga tangata i patua, i whakangaromia e nga Hurai.
- 7
- Ko Parahanarata ano hoki, ko Rarepono, ko Ahapata,
- 8
- Ko Porata, ko Araria, ko Arirata,
- 9
- Ko Paramahata, ko Arihai, ko Arirai, ko Waietata,
- 10
- Ko nga tama kotahi tekau a Hamana tama a Hamerata, a te hoa riri o nga Hurai, patua iho e ratou; kihai ia o ratou ringa i pa ki nga taonga.
- 11
- I taua rangi ka kawea mai ki te kingi te tokomaha o te hunga i patua ki Huhana ki te whare kingi.
- 12
- Na, ko te meatanga atu a te kingi ki a Kuini Ehetere, E rima rau nga tangata kua patua nei e nga Hurai, huna rawa ki Huhana ki te whare kingi, me nga tamariki kotahi tekau ano hoki a Hamana; i pehea ra ratou i era atu kawanatanga o te kingi? he aha hoki tau e mea nei mau? ka hoatu hoki ki a koe. He aha ake tau e tono ai? a ka meatia.
- 13
- Ano ra ko Ehetere, Ki te mea e pai ana ki te kingi, kia tukua ano hoki nga Hurai i Huhana apopo kia mea i nga mea o te ture o tenei ra, kia whakairihia ano nga tama kotahi tekau a Hamana ki runga ki te rakau.
- 14
- Na, ka mea te kingi kia meatia tenei, a ka homai te ture i Huhana. Na, whakairihia ana e ratou nga tama kotahi tekau a Hamana.
- 15
- I huihui ano hoki nga Hurai i Huhana i te tekau ma wha o nga ra o Marama Arara, a, e toru rau nga tangata i patua e ratou i Huhana; kihai ia o ratou ringa i pa atu ki nga taonga.
- 16
- Na, era atu Hurai o nga kawanatanga o te kingi, i huihui ratou, a tu ana ki runga, kia ora ai ratou. Na, ka ta o ratou manawa i a ratou hoa riri, a, patua iho e ratou o te hunga i kino ki a ratou e whitu tekau ma rima nga mano; kihai ano ia o ratou ringa i pa atu ki nga taonga,
- 17
- I te tekau ma toru ano o nga ra o Marama Arara; i te tekau ma wha ano hoki ka ta te manawa, waiho iho e ratou hei rangi mo te kai hakari, mo te hari.
- 18
- Ko nga Hurai i Huhana, i huihui ratou i te tekau ma toru o nga ra o taua marama, i te tekau ma wha ano, a, no te tekau ma rima i ta ai o ratou manawa; waiho iho e ratou hei ra mo te kai hakari, mo te hari.
- 19
- No reira, nga Hurai e noho ana i nga pa koraha, i nga pa taiepa-kore, i mea ai ko te tekau ma wha o nga ra o Marama Arara hei ra mo te hari, mo te kai hakari, hei rangi pai, e tukua atu ai e ratou he tahua ki tetahi, ki tetahi.
- 20
- Na, ka tuhituhia e Mororekai enei mea katoa, a, tukua atu ana e ia nga pukapuka ki nga Hurai katoa o nga kawanatanga katoa o Kingi Ahahueruha, ki nga mea e tata ana, ki nga mea i tawhiti,
- 21
- Kia whakapumautia te tikanga ma ratou, kia whakaritea e ratou te tekau ma wha o nga ra o Marama Arara, me te tekau ma rima ano o nga ra o taua marama, i ia tau, i ia tau,
- 22
- Kia rite ki nga ra i ta ai te manawa o nga Hurai i o ratou hoa riri, ki te marama ano hoki i puta ke ai to ratou tangihanga hei haringa, to ratou pouritanga hei rangi pai, kia meinga hei ra kai hakari, hei ra hari, e tukua atu ai etahi wahi ma tetahi, ma tetahi, me etahi mea ano ma nga rawa-kore.
- 23
- A, i whakaae ano nga Hurai kia mahia nga mea i timataia nei e ratou, nga mea ano hoki i tuhituhia mai e Mororekai ki a ratou.
- 24
- He mea mo ta Hamana tama a Hamerata Akaki; ko te hoa riri nei ia o nga Hurai katoa; whakaaroa ana e ia he hē mo nga Hurai, kia hunā ratou; a makā ana e ia he puri, ara, he rota mo ratou kia whakamotitia, kia hunā.
- 25
- A, te taenga atu o Ehetere ki te aroaro o te kingi, ka ki mai ia, (he mea pukapuka nana,) kia hoki te whakaaro kino i whakaaroa e ia mo nga Hurai ki runga ki tona pane ake, a taronatia ana ia, ratou ko ana tama, ki runga ki te tarawa.
- 26
- No reira i karangatia ai aua ra e ratou ko Purimi, no te ingoa nei, no Puri. No reira ano, no nga kupu katoa o tenei pukapuka, no ta ratou ano i kite ai o tenei mea, no nga mea ano i pa mai ki a ratou,
- 27
- I whakapumau ai nga Hurai i te tikanga, i whakaae ano hei mea ma ratou, ma o ratou uri, ma te hunga ano hoki e honoa ki a ratou, hei mea hoki e kore e whakatakā, kia whakaritea e ratou enei rangi e rua, kia pera ano ratou, me te mea i tuhituhia, i te wa ano e tika ai i tenei tau, i tenei tau.
- 28
- Kia maharatia ano hoki enei rangi, kia mahia e nga whakatupuranga katoa, e nga hapu katoa, e nga kawanatanga katoa, e nga pa katoa, kia kaua ano hoki enei ra o Purimi e ngaro i roto i nga Hurai, me te maharatanga ano ki aua ra kia kaua e mahue i o ratou uri,
- 29
- A, i tuhituhi ano a Kuini Ehetere ta Apihaira tamahine, a Mororekai Hurai ano hoki, whakapau rawa ano hoki o raua mana, kia whakapumautia tenei pukapuka tuarua o Purimi.
- 30
- I tukua atu ano e ia he pukapuka ki nga Hurai katoa, ki nga kawanatanga kotahi rau e rua tekau ma whitu o te kingitanga o Ahahueruha, no te rangimarie nga kupu, no te pono.
- 31
- Kia whakapumautia enei ra o Purimi, i nga wa e tika ai, kia pera ano ratou me ta Mororekai Hurai raua ko Kuini Ehetere i whakatakoto ai ma ratou; me ta ratou ano i whakatakoto ai hei tikanga ma ratou, ma o ratou uri, ara, nga meatanga i te noho puku i to ratou tangihanga.
- 32
- Heoi whakapumautia ana enei meatanga Purimi e te kupu a Ehetere, tuhituhia iho ki te pukapuka.
Address: 
Phone: 
Email: