- 1
- No reira i waiata ai a Mohi ratou ko nga tamariki a Iharaira i tenei waiata ki a Ihowa, a ka whakahua, ka mea, Ka waiata atu ahau ki a Ihowa, he hira noa atu hoki tona kororia: ko te hoiho raua ko tona kai eke, kua pangā e ia ki te moana.
- 2
- Ko Ihowa toku kaha me taku waiata, ko ia ano hoki hei whakaora moku: ko toku Atua tenei, a maku ia e whakakororia; te Atua o toku papa, a maku ia e whakanui.
- 3
- He tangata whawhai a Ihowa: ko Ihowa tona ingoa.
- 4
- Nga hariata a Parao, me tana ope, kua makā e ia ki te moana: ana rangatira whiriwhiri toremi iho ki te Moana Whero.
- 5
- Taupokina iho ratou e nga wai hohonu; totohu iho ana ratou ki te rire, ano he kamaka.
- 6
- Ka whai kororia tou ringaringa matau, e Ihowa, mo te kaha: na tou ringaringa, e Ihowa, i kuru te hoa whawhai.
- 7
- Nui atu tou kaha ki te aki iho i te hunga i whakatika mai ra ki a koe: te whakaputanga mai o to riri, pau katoa ana ratou, me he tumutumu otaota.
- 8
- Na te hau hoki o tou ihu i haupu ai nga wai; i tu ake nga roma, ano he puranga, a whakatotoka ana te rire i te takere o te moana.
- 9
- I mea te hoa riri, Ka whai atu ahau, ka hopu, ka tuwha i nga taonga; ka na toku ngakau i a ratou; ka unuhia taku hoari, ma toku ringa ratou e huna.
- 10
- I pupuhi atu koe ki tau hau, taupokina iho ana ratou e te moana; totohu iho ratou, ano he māta, i nga wai nui.
- 11
- Ko wai o nga atua hei rite mou, e Ihowa? ko wai hei rite mou, e whakamoemititia nei mo te tapu, e wehingia nei, e whakapaingia nei, e mahi nei i nga mea whakamiharo?
- 12
- I totoro atu tou ringa matau, horomia ana ratou e te whenua.
- 13
- Na tou atawhai i arahina mai ai e koe tenei iwi kua hokona nei e koe; na tou kaha i aratakina ai ratou e koe ki tou nohoanga tapu.
- 14
- Ka rongo nga iwi, ka pawera: mau tonu te matapouri ki nga tangata o Parehetina.
- 15
- Ko reira ohorere ai nga rangatira o Eroma; ko nga tangata nunui o Moapa, mau tonu te wiri ki a ratou; ngohe noa nga tangata katoa o Kanaana.
- 16
- Tau ana ki a ratou te tuiri me te wehi: ma te nui o tou ringa e tu tonu ai ratou, ano he kohatu, kia pahemo ra ano tou iwi, e Ihowa, kia pahemo ra ano tenei iwi kua hokona nei e koe.
- 17
- Mau ratou e kawe atu, e whakatupu ki te maunga, ki tou kāinga o mua iho, ki te wahi, e Ihowa, i hangā e koe hei nohoanga mou, ki te wahi tapu, e te Ariki, i whakapumautia e ou ringa.
- 18
- Hei kingi a Ihowa, ake nei ake nei.
- 19
- I haere hoki te hoiho a Parao, me ana hariata, me ana hoia eke hoiho ki te moana, a na Ihowa i whakahoki nga wai o te moana ki runga ki a ratou: tena ko nga tamariki a Iharaira, i haere ra te wahi maroke, i waenganui o te moana.
- 20
- A ka tango a Miriama poropiti, tuahine o Arona, i te timipera ki tona ringa; a haere atu ana nga wahine katoa i muri i a ia me nga timipera, me te kanikani ano ratou.
- 21
- A i whakahokia e Miriama ta ratou, Waiata atu ki a Ihowa, he hira noa atu hoki tona kororia; nana hoki te hoiho, raua ko tona kai eke, i whiu ki te moana.
- 22
- A arahina atu ana e Mohi a Iharaira i te Moana Whero; a ka haere atu ratou ki te koraha o Huri: a e toru nga ra i haere ai ratou i te koraha, a kihai i kitea he wai.
- 23
- A ka tae mai ratou ki Mara, kihai hoki i ahei te inu i nga wai o Mara; he kawa hoki: no reira i huaina ai tona ingoa ko Mara.
- 24
- Na, ka amuamu te iwi ki a Mohi, ka mea, Ko te aha hei inu ma matou?
- 25
- Na, ka karanga ia ki a Ihowa; a ka whakakitea mai he rakau e Ihowa ki a ia, a pangā atu ana e ia ki nga wai, na, ka reka nga wai: i hoatu e ia he ture ki a ratou i reira, me tetahi ritenga; i whakamatauria ratou e ia ki reira.
- 26
- I mea hoki ia, Ki te whakarongo marie koe ki te reo o Ihowa o tou Atua, a ka mahi i te mea e tika ana ki tana titiro, a ka whai taringa ki ana whakahaunga, ka pupuri hoki i ana tikanga katoa e kore rawa tetahi o aua matenga i whakapangia ki nga Ihipiana e ahau, e whakapangia atu e ahau ki a koe; ko Ihowa hoki ahau e whakaora nei i a koe.
- 27
- Na, ka tae mai ratou ki Erimi, a kotahi tekau ma rua nga puna wai i reira, me nga nikau e whitu tekau; a ka noho ratou ki reira, ki te taha o nga wai.
Address: 
Phone: 
Email: