- 1
- A ka rongo a Ietero, tohunga o Miriana, hungawai o Mohi, ki nga mea katoa i meatia e te Atua ki a Mohi, ki a Iharaira hoki, ki tona iwi; ki a Ihowa ano hoki kua whakaputa mai i a Iharaira i Ihipa;
- 2
- Katahi a Ietero, hungawai o Mohi, ka tango i a Hipora, wahine a Mohi, i muri nei i tana tononga i a ia kia hoki,
- 3
- Me ana tamariki tokorua, (te ingoa o tetahi ko Kerehoma, i mea hoki ia, He manene ahau i te whenua ke:
- 4
- Te ingoa hoki o tetahi ko Erietera; moku hoki i awhinatia mai e te Atua o toku papa, nana hoki ahau i whakaora i te hoari a Parao;)
- 5
- Na, ka haere mai a Ietero, te hungawai o Mohi, ratou ko ana tamariki, ko tana wahine, ki a Mohi, ki te koraha i noho ai ia, ki te maunga o te Atua:
- 6
- A ka korero atu ia ki a Mohi, Ko ahau, ko Ietero, ko tou hungawai, kua tae mai ki a koe, me to wahine ano, ratou tahi ko ana tamariki tokorua.
- 7
- Na, ka haere atu Mohi ki te whakatau i tona hungawai, a ka tuohu atu, ka kihi hoki i a ia; a ka ui raua ki a raua ki te pai i tetahi i tetahi; a haere mai ana raua ki te teneti.
- 8
- Na, ka korerotia atu e Mohi ki tona hungawai nga mea katoa i meatia e Ihowa ki a Parao, ratou ko nga Ihipiana, mo Iharaira, me nga matenga katoatanga hoki i pono ki a ratou i te ara, me ratou hoki kua whakaorangia nei e Ihowa.
- 9
- Na, ka hari a Ietero mo nga mea pai katoa i meatia e Ihowa ki a Iharaira, mo ratou hoki i whakaorangia e ia i te ringa o nga Ihipiana.
- 10
- A ka mea atu a Ietero, Kia whakapaingia a Ihowa nana nei koutou i whakaora i te ringa o nga Ihipiana, i te ringaringa hoki o Parao; nana hoki te iwi nei i whakaora ake i raro i te ringaringa o nga Ihipiana.
- 11
- Katahi ahau ka mohio he nui a Ihowa i nga atua katoa; i te mea hoki ka whakapehapeha ratou, hira ake ana ano ia i a ratou.
- 12
- Katahi a Ietero, te hungawai o Mohi, ka tango i tetahi tahunga tinana me nga patunga tapu ma te Atua: a haere mai ana a Arona, me nga kaumatua katoa o Iharaira, ki te hungawai o Mohi, ki te kai taro ki te aroaro o te Atua.
- 13
- A i te aonga ake o te ra ka noho a Mohi ki te whakarite whakawa ma te iwi: a ka tu te iwi i te taha o Mohi no te ata, a, ahiahi noa.
- 14
- A te kitenga o te hungawai o Mohi i nga mea katoa i mea ai ia ki te iwi, ka mea ia, He aha tenei mea e mea nei koe ki te iwi? he aha koe i noho ai, ko koe anake, i tu ai hoki te iwi katoa i tou taha no te ata, a, tae noa ki te ahiahi?
- 15
- A ka mea mai a Mohi ki tona hungawai, E haere mai ana hoki te iwi ki a au, ki te rapu tikanga i te Atua:
- 16
- Ka ai he mea ki a ratou, na, ka haere mai ratou ki a au; a maku e whakarite te whakawa a tetahi ki tetahi; e whakaatu hoki nga tikanga a te Atua, me ana ture.
- 17
- Katahi ka mea mai te hungawai o Mohi ki a ia, Ehara tenei i te mea pai e mea nei koe.
- 18
- Ka honia noatia iho koe, koutou tahi ko tenei iwi i a koe nei; he pehi rawa hoki tenei mea i a koe: e kore e taea e koe anake.
- 19
- Na, whakarongo mai ki toku reo, maku koe e tohutohu: a ko te Atua hei hoa mou: Hei te aroaro o te Atua koe mo te iwi, a mau e kawe nga korero ki te Atua:
- 20
- A mau ratou e whakaako ki nga tikanga me nga ture, e whakaatu hoki ki a ratou te huarahi e haere ai ratou, me nga mahi e mahi ai ratou.
- 21
- Mau ano hoki e titiro i roto i te iwi katoa etahi tangata maia, e wehi ana i te Atua; hei te hunga pono, e kino ana ki te apo; ka waiho ai hei rangatira mo ratou, hei rangatira mo nga mano, hei rangatira mo nga rau, hei rangatira mo nga rima tekau, hei rangatira mo nga tekau:
- 22
- A ma ratou e whakarite whakawa mo te iwi i nga wa katoa: a ko nga mea nui katoa, me kawe mai ki a koe; ko nga mea nohinohi katoa ia, ma ratou e whakarite: penei ka māmā koe, a ma koutou tahi te pikaunga.
- 23
- Ki te mea koe i tenei mea, a ka ki mai te Atua ki a koe, katahi koe ka matatu ake, a ka haere marie tenei iwi katoa ki o ratou kāinga.
- 24
- A whakarongo tonu a Mohi ki te kupu a tona hungawai, a meatia katoatia iho e ia nga mea i korero ai ia.
- 25
- A whiriwhiria ana e Mohi etahi tangata maia i roto i a Iharaira katoa, a waiho iho ratou e ia hei upoko mo te iwi, hei rangatira mo nga mano, hei rangatira mo nga rau, hei rangatira mo nga rima tekau, hei rangatira hoki mo nga tekau.
- 26
- A na ratou i whakarite whakawa mo te iwi i nga wa katoa: te mea pakeke ia i kawea mai e ratou ki a Mohi; a nga mea nohinohi katoa na ratou ano i whakarite.
- 27
- A tukua atu ana e Mohi tona hungawai kia haere; a haere atu ana ia ki tona whenua.
Address: 
Phone: 
Email: