- 1
- Tangohia mai ano ki a koe a Arona tou tuakana, ratou ko ana tama i roto i nga tamariki a Iharaira, hei tohunga maku, a Arona, a Natapa, ratou ko Apihu, ko Ereatara, ko Itamara, nga tama a Arona.
- 2
- Me hanga ano e koe etahi kakahu tapu mo Arona mo tou tuakana, hei whakakororia, hei ahua pai.
- 3
- Me korero ano hoki e koe ki nga ngakau mohio katoa, ki aku i whakaki ai ki te wairua mohio, kia hangā e ratou nga kakahu mo Arona, mo tona whakatapunga, hei mahinga mana i nga mahi a te tohunga ki a au.
- 4
- A ko nga kakahu enei e hangā e ratou; he kouma, he epora, he koroka, he koti whakairo, he potae tohunga, he whitiki: me hanga hoki e ratou etahi kakahu tapu mo Arona mo tou tuakana, ratou ko ana tama, hei mahinga mana i nga mahi a te tohunga ki a au.
- 5
- Me tango hoki e ratou he koura, he puuru, he papura, he ngangana, he rinena pai.
- 6
- A ka hangā te epora ki te koura, ki te puuru, ki te papura, ki te ngangana, ki te rinena miro kia tohunga rawa te mahinga.
- 7
- Kia rua nga wahi i nga pokohiwi, he mea hono ki a raua i nga pito e rua; kia kotahi ai.
- 8
- A ko te epora raua ko te whitiki whakairo, e mau ana ki taua mea, kia kotahi ano te mea e hangā ai raua, kia rite hoki to raua hanganga; he mea koura, puuru, papura, ngangana, rinena miro pai.
- 9
- Me tango ano e koe nga kohatu onika e rua, ka tuhi ai i nga ingoa o nga tamariki a Iharaira ki aua mea:
- 10
- Kia ono nga ingoa o ratou ki tetahi kohatu, me era ingoa atu hoki e ono ki tetahi atu kohatu; kia rite ki o ratou whanautanga.
- 11
- Kia rite ki te mahi a te kai tuhi kohatu tau tuhi i nga ingoa o nga tamariki a Iharaira ki nga kohatu e rua, kia rite ki te tuhinga o te hiri: me mea e koe kia whakanohoia aua mea ki nga nohoanga koura.
- 12
- A me whakanoho e koe nga kohatu e rua ki nga pokohiwi o te epora, hei kohatu whakamahara mo nga tamariki a Iharaira: a ka mau o ratou ingoa ki runga ki nga pokohiwi e rua o Arona i te aroaro o Ihowa, hei whakamaharatanga.
- 13
- Me hanga ano e koe nga nohoanga kohatu ki te koura;
- 14
- Me nga mekameka koura para-kore e rua ki nga pito e rua; me whiri tau mahinga i aua mea, ka whakau ai i nga mekameka whiri ki nga nohoanga.
- 15
- Kia tohunga rawa te hanga o te kouma whakarite whakawa, kia rite tau mahinga ki te mahinga o te epora; me hanga e koe taua mea ki te koura, ki te puuru, ki te papura, ki te ngangana, ki te rinena miro pai.
- 16
- Kia wha ona taha, me rererua; kia kotahi whanganga a te ringa tona roa, kia kotahi whanganga hoki a te ringa tona whanui.
- 17
- Me whakanoho ano hoki e koe ki taua mea etahi nohoanga kohatu kia wha nga rarangi kohatu: mo te rarangi tuatahi he harariu, he topaha, he kapakara: ko te rarangi tuatahi tenei.
- 18
- Mo te rarangi tuarua he emerara, he hapaira, he raimona.
- 19
- Mo te rarangi tuatoru he rikuri, he akete, he ametihita.
- 20
- Mo te rarangi tuawha he perira, he onika, he hahapa: me whakanoho ki te koura hei nohoanga.
- 21
- Na, ka tekau ma rua nga kohatu me nga ingoa o nga tamariki a Iharaira, ka rite te maha ki o ratou ingoa, kia rite ki te tuhi o te hiri, tenei tangata me tona ingoa tenei tangata me tona ingoa, rite tonu ki nga iwi kotahi tekau ma rua.
- 22
- Me hanga ano e koe ki te koura para-kore etahi mekameka, he mahi whiri, mo te kouma, mo nga pito.
- 23
- Me hanga ano e koe etahi mowhiti koura kia rua mo te kouma, ka whakanoho ai i nga mowhiti e rua ki nga pito e rua o te kouma.
- 24
- Me whakau ano nga mekameka koura, nga mea whiri, ki nga mowhiti e rua i nga pito o te kouma.
- 25
- Ko era pito e rua hoki o nga mekameka whiri e rua me whakau e koe ki nga nohoanga kohatu e rua, ka whakanoho ai ki nga pokohiwi o te epora, ki te taha ki mua.
- 26
- Me hanga ano etahi mowhiti koura kia rua, ka whakanoho ai ki nga pito e rua o te kouma ki tona remu, ki te taha ki roto whaka-te-epora.
- 27
- Me hanga ano hoki e koe etahi atu mowhiti koura kia rua, ka whakanoho ai ki nga pokohiwi e rua o te epora ki te taha ki raro, ki te taha ki mua, ki te ritenga mai ano o tona hononga, ki runga ake o te whitiki whakairo o te epora.
- 28
- Me here ano e ratou te kouma, ko ona mowhiti ki nga mowhiti o te epora, ki tetahi miro puuru, kia mau ai ki runga ake o te whitiki whakairo o te epora, kei takoto ke hoki te kouma i te epora.
- 29
- A ka mau nga ingoa o nga tamariki a Iharaira ki te ngakau o Arona, ara, ki te kouma o te whakarite whakawa, ina haere ia ki te wahi tapu, hei whakamaharatanga ki te aroaro o Ihowa i nga ra katoa.
- 30
- Me whakanoho ano hoki e koe nga Urimi me nga Tumime ki te kouma whakarite whakawa; a hei te ngakau o Arona aua mea, ina haere ki te aroaro o Ihowa: a ka mau tonu ki te ngakau o Arona te whakaritenga whakawa o nga tamariki a Iharaira i te aroaro o Ihowa.
- 31
- Me hanga ano e koe te koroka o te epora, hei te puuru anake.
- 32
- Me whakatuwhera noa a runga, ara, a waenganui: me whakawhaiwhiri ano ki te mea whatu tona wahi tuwhera, a puta noa puta noa, kia rite ki te wahi tuwhera o te pukupuku, kei pakaru.
- 33
- A i te remu i raro me hanga e koe etahi pamekaranete ki te mea puuru, papura, ngangana, hei te remu, a puta noa puta noa; me etahi pere koura ki nga takiwa o aua mea, a puta noa puta noa:
- 34
- He pere koura me tetahi pamekaranete, he pere koura me tetahi pamekaranete ki te remu o te koroka, a puta noa puta noa.
- 35
- A me kakahu taua mea e Arona ina minita: a ka rangona tona tangi ina haere ki roto ki te wahi tapu, ki te aroaro a Ihowa, ina puta mai hoki ki waho, kei mate ia.
- 36
- Me hanga ano e koe tetahi paraharaha ki te koura para-kore, ka tuhi ai ki taua mea kia pera ano me nga tuhinga o te hiri, TAPU KI A IHOWA.
- 37
- A me whakanoho e koe ki te tau puuru, kia mau ai ki te potae tohunga; hei te taha ki mua o te potae.
- 38
- A ka mau tena mea ki te rae o Arona, kia mauria ai e Arona te kino a nga mea tapu e whakatapua ana e nga tamariki a Iharaira a ratou hoatutanga tapu katoa; a ka mau tonu tena mea ki tona rae, kia manakohia ai ratou i te aroaro o Ihowa.
- 39
- A me whakairo e koe te koti rinena pai, me hangā ano te potae tohunga ki te rinena pai, hei te mea i hangā, ki te ngira te mea e hangā ai e koe te whitiki.
- 40
- Me hanga ano e koe etahi koti mo nga tama a Arona, me hanga ano etahi whitiki mo ratou, me hanga hoki etahi potae mo ratou, hei whakakororia, hei whakaataahua.
- 41
- Ka whakakakahu atu ai e koe ki a Arona ki tou tuakana, ratou tahi ko ana tama; na ka whakawahi koe i a ratou, ka whakatohunga hoki i a ratou, ka whakatapu hoki i a ratou, kia mahi ai ratou i nga mahi a te tohunga ki a au.
- 42
- Me hanga ano e koe etahi tarautete rinena mo ratou, hei kakahu mo nga wahi takoto tahanga o ratau; mo te hope, a tae noa ki nga huha:
- 43
- A ka kakahuria aua mea e Arona, ratou ko ana tama, ina haere mai ratou ki roto ki te tapenakara o te whakaminenga, ina whakatata mai ranei ki te aata, ki te minita i roto i te wahi tapu; kei whai hara ratou, a ka mate: hei tikanga pumau tenei mona, mo ona uri hoki i muri i a ia.
Address: 
Phone: 
Email: