- 1
- Katahi nga poropiti, a Hakai poropiti, raua ko Hakaraia, tama a Iro, ka poropiti ki nga Hurai i Hura, i Hiruharama, i runga i te ingoa o te Atua o Iharaira, he mea hoki ki a ratou.
- 2
- Na, ko te marangatanga ake o Terupapere tama a Hearatiere, raua ko Hehua tama a Iohereke, timataia ana e raua te hanga i te whare o te Atua i Hiruharama: i a raua ano hoki nga poropiti o te Atua hei hoa mo raua.
- 3
- I taua wa ano ka tae mai ki a ratou a Tatanai kawana o tenei taha o te awa, raua ko Hetara-potonai, me o raua hoa, a ka mea ki a ratou, Na wai koutou i whakahau kia hangā tenei whare, kia whakaotia tenei taiepa?
- 4
- Na, he penei ta matou kupu ki a ratou, Ko wai nga ingoa o nga kai hanga o tenei whare?
- 5
- Heoi i runga i nga kaumatua o nga Hurai te kanohi o to ratou Atua, i kore ai ta ratou i whakamutua, kia tae atu ra ano taua mea ki a Tariuha: katahi ka whakahokia mai e ratou te kupu mo tenei mea, he mea tuhituhi.
- 6
- Ko nga kupu tenei o te pukapuka i tukua atu e Tatanai, e te kawana o tenei taha o te awa, raua ko Hetara-potonai, me ona hoa, me nga Aparahaki i tenei taha o te awa, ki a Kingi Tariuha.
- 7
- I tukua atu e ratou he pukapuka ki a ia; a, ko nga mea tenei i tuhituhia; Ki a Kingi Tariuha. Tena nga pai katoa.
- 8
- Kia mohiotia tenei e te kingi, I haere atu matou ki te whenua o Hura, ki te whare o te Atua nui e hangā mai nei ki nga kohatu nui, a, e whakatakotoria ana he rakau ki nga taha: hohoro tonu, tere tonu tenei mahi a o ratou ringaringa.
- 9
- Katahi matou ka ui atu ki aua kaumatua; he penei ta matou kupu ki a ratou, Na wai koutou i whakahau kia hangā tenei whare, kia whakaotia enei taiepa?
- 10
- I uia ano e matou o ratou ingoa, kia whakaaturia atu ai ki a koe, kia tuhituhia ai e matou nga ingoa o o ratou tino tangata.
- 11
- Na, ko ta ratou kupu tenei i whakahokia mai ki a matou, He pononga matou na te Atua o te rangi, o te whenua, a, e hanga ana i te whare i hangā i mua noa atu, ka maha nei nga tau; he nui te kingi o Iharaira nana nei i hanga, i whakaoti.
- 12
- Heoi, i te mea ka whakaoho o matou mātua i te Atua o te rangi kia riri, ka hoatu ratou e ia ki te ringa o Nepukaneha Karari kingi o Papurona: nana tenei whare i wahi, a whakaraua atu ana e ia te iwi ki Papurona.
- 13
- I te tuatahi ia o nga tau o Hairuha kingi o Papurona, ka whakapuakina he tikanga e Kingi Hairuha kia hangā tenei whare o te Atua.
- 14
- Na, nga oko, nga mea koura, hiriwa, o te whare o te Atua, i tangohia nei e Nepukaneha i roto i te temepara i Hiruharama, a, kawea atu ana e ia ki te temepara o Papurona, i tangohia mai ano era e Kingi Hairuha i roto i te temepara o Papurona, a, hoatu ana ki tetahi tangata, tona ingoa ko Hehepatara, i meinga nei e ia hei kawana.
- 15
- I mea ano ia ki a ia, Tangohia atu enei mea, haere, kawea atu ki te temepara i Hiruharama; kia hangā hoki te whare o te Atua ki tona wahi.
- 16
- Na, ko te haerenga mai o taua Hehepatara, whakatakotoria ana e ia te turanga mo te whare o te Atua i Hiruharama: ko te hanganga ano tenei o te temepara, o reira na ano, a mohoa noa nei; heoi kahore ano kia oti noa.
- 17
- Na, ki te mea e pai ana ki ta te kingi, kia rapu tetahi i roto i te whare taonga o te kingi i kona i Papurona, koia ranei? i whakatakotoria ranei he tikanga e Kingi Hairuha kia hangā tenei whare o te Atua ki Hiruharama? kia meatia mai ano hoki e te kingi tana e pai ai mo tenei mea ki a matou.
Address: 
Phone: 
Email: