- 1
- I muri iho i enei mea, i te kingitanga o Arataherehe kingi o Pahia, na, ko Etera tama a Heraia, tama a Ataria, tama a Hirikia,
- 2
- Tama a Harumu, tama a Haroko, tama a Ahitupu,
- 3
- Tama a Amaria, tama a Ataria, tama a Meraioto,
- 4
- Tama a Terahia, tama a Uti, tama a Puki,
- 5
- Tama a Apihua, tama a Pinehaha, tama a Ereatara, tama a Arona a te tino tohunga:
- 6
- I haere mai tenei Etera i Papurona. He karaipi hohoro ano ia ki te ture a Mohi i homai nei e Ihowa, e te Atua o Iharaira. I runga ano i a ia te ringa o Ihowa, o tona Atua, a hoatu ana e te kingi ki a ia nga mea katoa i tonoa e ia.
- 7
- I haere mai ano hoki etahi o nga tamariki a Iharaira, o nga tohunga ano hoki, o nga Riwaiti, o nga kai waiata, o nga kai tiaki keti, o nga Netinimi, ki Hiruharama i te whitu o nga tau o Kingi Arataherehe.
- 8
- Na, kua tae mai ia ki Hiruharama i te rima o nga marama o te whitu o nga tau o te kingi.
- 9
- No te tuatahi hoki o nga ra o te marama tuatahi i timata ai ia te haere mai i Papurona, a, no te tuatahi o nga ra o te rima o nga marama i tae mai ai ki Hiruharama, i runga hoki i a ia te ringa pai o tona Atua.
- 10
- I whakatikaia hoki e Etera tona ngakau, mea tonu ia kia rapua te ture a Ihowa, kia mahia ano hoki, kia whakaakona ano a Iharaira ki nga tikanga me nga whakaritenga whakawa.
- 11
- Na, ko nga kupu tenei o te pukapuka i hoatu e Kingi Arataherehe ki te tohunga, ki a Etera; he karaipi ano ia, he karaipi no nga kupu o nga whakahaunga a Ihowa, no ana tikanga ano hoki ki a Iharaira.
- 12
- Na Arataherehe kingi o nga kingi ki te tohunga, ki a Etera, ki te karaipi o te ture a te Atua o te rangi: kia mau pu te rongo, i taua wa nei ano.
- 13
- Ko taku tikanga tenei ka whakatakotoria atu nei; Na, te hunga katoa o te iwi o Iharaira, o ona tohunga ano hoki, o nga Riwaiti i toku kingitanga e whai ngakau ana kia haere ki Hiruharama, me haere tahi ano koutou.
- 14
- He mea unga na hoki koe na te kingi, ratou ko ona kai whakatakoto whakaaro tokowhitu, ki te ui i nga mea o Hura, o Hiruharama, kia rite ai ki te ture a tou Atua i tou ringa na.
- 15
- Ki te kawe ano hoki i te hiriwa, i te koura i hoatu noa atu nei e te kingi, ratou ko ona kai whakatakoto whakaaro ki te Atua o Iharaira, kei Hiruharama nei tona nohoanga,
- 16
- I te hiriwa katoa ano hoki, me te koura e kitea e koe ki te kawanatanga katoa o Papurona, i nga mea homai noa ano hoki a te iwi, a nga tohunga, a te hunga e homai noa mai ana mo te whare o to ratou Atua i Hiruharama.
- 17
- Kia hohoro ai te hoko e koe ki tenei moni nga puru, nga hipi toa, nga reme, nga whakahere toto-kore, me nga ringihanga o aua mea, ka whakaeke ai ki runga ki te aata o te whare o to koutou Atua i Hiruharama.
- 18
- Na, ta koutou ko ou teina e pai ai hei meatanga mo te toenga o te hiriwa, o te koura, meatia e koutou kia rite ki ta to koutou Atua e pai ai.
- 19
- Na, nga oko ka hoatu nei ki a koe mo nga mahi o te whare o tou Atua, me hoatu e koe ki te aroaro o te Atua i Hiruharama.
- 20
- Na, era atu mea e meatia ana mo te whare o tou Atua, a ka hoatu ano e koe, hoatu i roto i to te kingi whare taonga.
- 21
- Na, tenei ahau a Kingi Arataherehe te whakatakoto nei i te tikanga ki nga kai tiaki taonga katoa i tera taha o te awa, na, nga mea katoa e tonoa i a koutou e Etera tohunga, e te karaipi o te ture o te Atua o te rangi, kia hohoro te meatia.
- 22
- Ahakoa kotahi rau nga taranata hiriwa, ahakoa kotahi rau nga mehua witi, ahakoa kotahi rau nga pati waina, ahakoa kotahi rau nga pati hinu; me te tote ano, e kore tona taimaha e tuhituhia.
- 23
- Nga mea katoa e kiia mai ana e te Atua o te rangi, me ata mahi marie mo te whare o te Atua o te rangi: he aha hoki i whai take ai, e riria mai ai te kingitanga o te kingi, ratou ko ana tama?
- 24
- Kia mohio mai ano hoki koutou, Ko nga tohunga katoa, ko nga Riwaiti, ko nga kai waiata, ko nga kai tiaki keti, ko nga Netinimi, ko nga kai mahi o tenei whare o te Atua, e kore e tika kia tangohia he takoha taonga, he takoha tangata, he takoha huarahi i a ratou.
- 25
- Na, mau ano, e Etera, (kei a koe na hoki to te Atua mohiotanga,) mau e whakarite nga kai whakarite whakawa, nga kai whakarongo totohe, hei whakarite whakawa mo nga iwi katoa i tera taha o te awa, hei te hunga katoa e mohio ana ki nga ture a tou Atua: na, te hunga kahore e mohio, ma koutou e whakaako.
- 26
- Na, te tangata e kore e mahi i te ture a tou Atua, i te ture ano hoki a te kingi, kia hohoro te whakapa o te whiu ki a ia, te whakamate ranei, te pei atu ranei he whenua ke, me tango ranei ana taonga, me here ranei.
- 27
- Kia whakapaingia a Ihowa te Atua o o tatou mātua, nana nei i homai te whakaaro penei ki roto ki te ngakau o te kingi, ara, kia whakapaipaia te whare o Ihowa i Hiruharama;
- 28
- Nana hoki i whakaputa aroha mai ki a au i te aroaro o te kingi, ratou ko ana kai whakatakoto whakaaro, o nga rangatira rarahi ano hoki a te kingi. Na, kua whai kaha ahau; i runga hoki i a au te ringa o Ihowa, o toku Atua, Na, ka huihuia e ahau etahi tino tangata i roto i a Iharaira, hei hoa haere moku ki runga.
Address: 
Phone: 
Email: