- 1
- E aku teina, ki te haukotia te tangata e tetahi hē, ma koutou ma te hunga i te Wairua, e whakaara ake taua tangata pera, kia māhaki hoki te wairua; me te titiro iho ano ki a koe, kei whakamatautauria ano hoki koe.
- 2
- Pikaua e tetahi nga whakataimaha o tetahi, hei whakaritenga ma koutou i ta te Karaiti ture.
- 3
- Ki te ki hoki tetahi ki a ia ano he mea nui ia, i te mea he kore noa iho ia, e nuka ana ia ki a ia ano.
- 4
- Engari kia whakamatauria tana mahi ake e tetahi e tetahi, katahi ka ai he whakamanamananga mana ki tana anake, e kore ano e ahu ki ta tetahi.
- 5
- Ko tana ake pikaunga, hoki hei kawenga ma tetahi ma tetahi.
- 6
- Te tangata ano e whakaakona ana ki te kupu, me whakawhiwhi e ia tona kai whakaako ki nga mea pai katoa.
- 7
- Kei whakapohehetia koutou; kahore te Atua e tinihangatia: ko ta te tangata hoki e rui ai, ko tenei tana e kokoti ai.
- 8
- Na, te tangata e rui ana, he whakaaro ki tona kikokiko, tana o te kikokiko e kokoti ai he pirau; te tangata hoki e rui ana, he whakaaro ki te Wairua, tana o te Wairua e kokoti ai he oranga tonutanga.
- 9
- I a tatou e mea ana i te pai, kaua tatou e ngakaukore: i te wa hoki e rite ai, ka kokoti tatou, ki te kahore tatou e ngoikore.
- 10
- Na, i te mea e whai takiwa ana tatou, kia mahi tatou i te pai ki nga tāngata katoa, tera noa ake ia, ki te hunga o te whare o te whakapono.
- 11
- Ka kite na koutou i te nui o taku reta ki a koutou, he mea tuhituhi na toku ringaringa ake.
- 12
- Te hunga e hiahia ana ko te ahua o te kikokiko kia pai, ko ratou hei mea i a koutou kia kotia; he mea kau kei whakatoia ratou mo te ripeka o te Karaiti.
- 13
- Kahore hoki taua hunga na ano i kotia e mau ki te ture; engari e hiahia ana ratou kia kotia koutou, kia whakamanamana ai ratou ki to koutou kikokiko.
- 14
- Ki a au ia kaua rawa he whakamanamana, ko te ripeka anake o to tatou Ariki o Ihu Karaiti, i ripekatia ai te ao ki a au, me ahau hoki ki te ao.
- 15
- I roto hoki i a Karaiti Ihu kahore he aha o te kotinga, kahore hoki o te kotinga kore, engari ko te mea hanga hou.
- 16
- Na, te hunga e haere ana i runga i tenei ruri, kia tau te rangimarie me te mahi tohu kia ratou, ki te Iharaira hoki a te Atua.
- 17
- A muri ake nei kaua tetahi e whakararuraru i a au e mau ana hoki ki toku tinana nga tohu a te Ariki a Ihu.
- 18
- E aku teina, kia tau te aroha noa a to tatou Ariki a Ihu Karaiti ki o koutou wairua. Amine.
Address: 
Phone: 
Email: