- 1
- I Te rua o nga tau o Kingi Tariuha, te ono o nga marama, i te ra tuatahi o te marama ka puta mai te kupu a Ihowa, he mea whakapuaki mai na Hakai poropiti, ki a Terupapere tama a Hearatiere, kawana o Hura, raua ko te tino tohunga ko Hohua tama a Iohereke; i mea ia,
- 2
- Ko te kupu tenei a Ihowa o nga mano, e mea ana ia, E ki ana tenei iwi, Kahore ano kia taea noatia te wa, te wa e hānga ai to Ihowa whare.
- 3
- Na, ka puta te kupu a Ihowa, he mea whakapuaki na Hakai poropiti; i ki ia,
- 4
- Ko ta koutou wa ranei tenei, e mea ma, e noho ai koutou i o koutou whare kua oti nei to roto hipoki, i te mea kua ururuatia tenei whare?
- 5
- Na, ko te kupu tenei a Ihowa o nga mano, Whakaaroa o koutou ara.
- 6
- He nui ta koutou i whakato ai, he iti ta koutou i mau mai ai; e kai ana, heoi kahore e makona; e inu ana, tē ngata te mate-wai; e kakahu ana i a koutou, tē mahana tetahi; e riro mai ana i te kai mahi te moni mo tana mahi, a whaowhina ana e ia ki roto ki te putea koputaputa.
- 7
- Ko te kupu tenei a Ihowa o nga mano, Whakaaroa o koutou ara.
- 8
- Pikitia te maunga, maua mai he rakau, hangā hoki te whare; a ka manakohia atu e ahau, ka whakakororiatia ano hoki ahau, e ai ta Ihowa.
- 9
- Ki ta koutou i whakaaro ai ka maha, heoi kua iti, ta koutou kawenga mai ki te whare, na, kua puhipuhia e ahau. Mo te aha? e ai ta Ihowa o nga mano, Mo toku whare kua ururuatia nei, a e rere na koutou ki tona whare, ki tona whare.
- 10
- No reira i kaiponuhia ai te tomairangi o te rangi ki a koutou; no reira ano i kaiponuhia ai nga hua o te whenua.
- 11
- A karangatia atu ana e ahau te kore-wai ki runga ki te whenua, ki runga ki nga maunga, ki runga ki te witi, ki runga ki te waina hou, ki runga ki te hinu, ki runga ki nga mea e puta mai ana i roto i te whenua, ki runga ki te tangata, ki runga ki te kararehe, ki runga ki nga mahi katoa a nga ringaringa.
- 12
- A, te rongonga o Terupapere tama a Hearatiere raua ko te tino tohunga ko Hohua tama a Iohereke, ratou ko nga morehu katoa o te iwi, ki te reo o Ihowa o to ratou Atua, ki nga kupu ano hoki a Hakai poropiti, mo nga mea i ungā mai ai ia e Ihowa e to ratou Atua, na, ka wehi te iwi i te aroaro o Ihowa.
- 13
- Katahi a Hakai te karere a Ihowa, i a ia nei nga kupu a Ihowa, ka korero ki te iwi, ka mea, Ko ahau hei hoa mo koutou, e ai ta Ihowa.
- 14
- Na, ka whakaohokia e Ihowa te wairua o Terupapere tama a Hearatiere, kawana o Hura, me te wairua ano o te tino tohunga, o Hohua tama a Iohereke, me te wairua ano nga morehu katoa o te iwi, a haere mai ana ratou, mahia ana e ratou te mahi o te whare o Ihowa o nga mano, o to ratou Atua,
- 15
- I te rua tekau ma wha o nga ra o te ono o nga marama, i te rua o nga tau o Kingi Tariuha.
Address: 
Phone: 
Email: