- 1
- Kia mau tonu te aroha ki nga teina.
- 2
- Kei wareware ki te atawhai manuhiri: na tenei hoki i whakamanuhiri anahera ai etahi, kihai ano i mātau atu.
- 3
- Maharatia nga herehere, no koutou tahi hoki te hereherenga; me te hunga hoki e whakatupuria kinotia ana, kei te tinana ano hoki koutou.
- 4
- He mea honore te marena ma te katoa, kahore hoki he poke o te moenga: te hunga moe puku ia, me te hunga puremu, e whakataua e te Atua te hē ki a ratou.
- 5
- Whakakahoretia atu te mahi apo taonga; a kāti ano nga mea ma koutou ko nga mea i a koutou na: kua mea mai hoki ia, E kore ahau e whakarere i a koe, e kore ano hoki e mawehe atu i a koe.
- 6
- Na, ka maia tatou ki te ki ake, Kei toku taha te Ariki, e kore ahau e mataku ki ta te tangata e mea ai ki a au.
- 7
- Kia mahara ki te hunga e tohutohu ana i a koutou, kua korero nei i te kupu a te Atua ki a koutou: tirohia atu te tukunga iho o ta ratou whakahaere, kia rite to koutou ki to ratou whakapono.
- 8
- Tūturu tonu a Ihu Karaiti inanahi, inaianei, a ake ake ake.
- 9
- Kei kahakihakina koutou e nga whakaakoranga maha e nga mea poka hou ake: he mea pai hoki kia whakaukia te ngakau ki runga i te aroha noa; ehara nga kai, kahore hoki he pai o ena mea ma te hunga na ratou nei tera mahi.
- 10
- He āta ano ta tatou, a e kore e tika kia kainga to tenei e te hunga e mahi ana i ta te tapenakara.
- 11
- Na, nga kararehe no ratou nei nga toto e mauria atu ana e te tohunga nui mo te hara ki roto ki te wahi tino tapu, e tahuna ana nga tinana o era ki waho o te puni.
- 12
- No reira hoki a Ihu, i tana whakatapunga i te iwi ki ona toto ake ano, i mamae ai ki waho o te kuwaha.
- 13
- Na, kia haere atu tatou ki a ia ki waho o te puni, me te mau ano tatou i tona tawainga:
- 14
- Kahore hoki he pa tumau mo tatou i konei, engari e rapu ana tatou i tetahi i roto i nga wa a muri nei.
- 15
- Na, kia tapaea atu e tatou ki runga ki a ia i nga wa katoa te whakamoemiti ki te Atua hei whakahere, ara, te hua o nga ngutu e whakawhetai ana ki tona ingoa.
- 16
- Kei wareware hoki ki te mahi pai, ki te atawhai: e manakohia ana hoki e te Atua nga patunga tapu pera.
- 17
- Kia ngohengohe ki o koutou kai tohutohu, whakanuia ta ratou kupu; e mataara ana hoki ratou ki o koutou wairua, a me korero ano e ratou a mua te tikanga o a ratou mahi: kia hari ai ratou ina mea i tenei, kia kaua hoki e pouri: kahore hoki he pai o tenei mo koutou.
- 18
- Inoi mo matou: u tonu hoki to matou whakaaro ki to matou hinengaro he pai, e hiahia ana hoki matou kia tika ta matou whakahaere i nga mea katoa.
- 19
- I hira rawa ai taku whakahau nei kia meatia tenei, he mea kia wawe ai ahau te whakahokia ki a koutou.
- 20
- Na, ma te Atua o te rangimarie, nāna nei i whakahoki mai i te mate to tatou Ariki a Ihu, taua Hepara nui o nga hipi, he meatanga na nga toto o te kawenata mutunga-kore,
- 21
- Māna koutou e mea kia tino tika i runga i nga mahi pai katoa, kia mahia ano e koutou tana i pai ai, māna e mahi i roto i a koutou te mea e ahuareka ana ki tana titiro iho, i roto ano i a Ihu Karaiti; waiho atu i a ia te kororia, ake ake ake. Amine.
- 22
- He kupu ano tenei naku ki a koutou, e aku teina, ata whakarangona mai te kupu whakahau: he torutoru nei hoki nga kupu kua tuhituhia atu nei e ahau ki a koutou.
- 23
- Kia mātau koutou kua tukua ki waiho te teina a Timoti. Ki te haere wawe mai ia, ko maua tahi e kite i a koutou.
- 24
- Oha atu ki te hunga katoa e tohutohu ana i a koutou, ki te hunga tapu katoa ano hoki. Tenei te oha atu ki a koutou te hunga i Itari.
- 25
- Kia tau te aroha noa ki a koutou katoa. Amine.
Address: 
Phone: 
Email: