- 1
- Na, he mea whakarite mai ia nga tohunga nui katoa e tangohia nei i roto i nga tāngata, mo nga mea a nga tāngata ki te Atua, hei tapae atu i nga whakahere i nga patunga tapu mo nga hara:
- 2
- E taea e ia te ata whakaaro ki te hunga e kuare ana, e hē ana; no te mea e muia ana ano ia e te ngoikore.
- 3
- Na konei ano hoki i tika ai kia tapaea atu e ia he whakahere mo ona hara ake, kia rite ki tana mo o te iwi.
- 4
- E kore ano hoki tetahi e tango i tenei honore ki a ia ano, engari te tangata e karangatia ana e te Atua, e peratia ana me Arona.
- 5
- Whaihoki ko te Karaiti kahore āna whakanui i a ia hei tohunga nui; na tera ke ia i ki mai ra ki a ia, Ko koe taku Tama, no naianei koe i whakatupuria ai e ahau.
- 6
- Pera hoki me tana i ki ai i tetahi atu wahi, Hei tohunga koe ake ake i runga i te ritenga o Merekihereke.
- 7
- I nga ra hoki o tona kikokiko, i tukua e ia nga inoi me nga karakia, i runga i te karangaranga kaha i nga roimata, ki te Mea kaha ki te whakaora i a ia i te mate, a whakarangona mai ana ia i a ia i wehi ra;
- 8
- Ahakoa he Tama ia, i whakaakona ia ki te ngohengohe e ona mamae:
- 9
- A ka meinga nei ia kia tino rite, ka waiho ia hei take mo te oranga tonutanga ki te hunga katoa e ngohengohe ana ki a ia;
- 10
- He mea karanga ano na te Atua hei tohunga nui i runga i te ritenga o Merekihereke.
- 11
- He maha nei a matou korero mo tenei, he pakeke ina korerotia, he puhoi hoki koutou ki te whakarongo.
- 12
- I te mea nei hoki ka tika kia waiho koutou hei kai whakaako no te mea ka roa nei, na, me tuarua te whakaako i a koutou ki nga timatanga rawatanga o nga kupu a te Atua; a, me waiu he kai ma koutou, kauaka te kai pakeke.
- 13
- Nga tāngata katoa hoki e kai ana i te waiu, e kuare ana ratou ki te kupu o te tika, he kohungahunga hoki.
- 14
- Ma te hunga tino tika ia te kai pakeke, kua taungatia nei o ratou hinengaro e nga meatanga maha, e mohio ai ki te wehe i te pai i te kino.
Address: 
Phone: 
Email: