Hosea Chapter 10 - Paipera Tapu 1868 | Te Paipera Tapu 1868

Hosea Chapter 10 - Paipera Tapu 1868

1
He waina a Iharaira e tu kau ana, nga hua e hua ai ia māna ake: tana whakamahatanga i nga aata rite tonu ki te maha o ona hua, ta ratou hanganga i nga whakapakoko kia pai, rite tonu ki te pai o tona whenua.
2
Kua wehea o ratou ngakau, akuanei ka kitea to ratou he: ka wahia e ia a ratou aata, ka pahuatia o ratou whakapakoko.
3
Akuanei hoki ratou ki ai, Kahore he kingi mo tatou, no tatou hoki kihai nei i wehi ki a Ihowa: te kingi hoki, ko te aha tana mo tatou?
4
Kua korerotia etahi korero e ratou, oati teka ana ratou i te mea e whakarite kawenata ana: na reira rite tonu te tupu o te whakarite whakawa ki to te hemeroke i nga moa o te mara.
5
Wehi tonu nga tangata o Hamaria, he whakaaro ki nga kuao kau o Pete-awene; ka tangihia tera e tona iwi, e ona tohunga ano hoki i whakamanamana nei ki a ia, ki tona kororia ano kua memeha atu nei i reira.
6
Ka kawea atu ano hoki taua mea ki Ahiria hei hakari ki a Kingi Iarepe: ka pa atu te whakama ki a Eperaima, ka whakama ano hoki a Iharaira ki tana whakaaro i whakatakoto ai.
7
A Hamaria, kua kore tona kingi, ano he huka i runga i te kare o te wai.
8
Ka whakakahoretia ano hoki nga wahi tiketike o Awene, te hara o Iharaira; ka puta ake te tataramoa me te tumatakuru ki runga ki o ratou aata, ka mea ano hoki ratou ki nga maunga, Taupokina matou; ki nga pukepuke ano hoki, E hinga ki runga ki a matou.
9
E Iharaira, he hara tau, nui atu i to nga rangi i Kipea: tu ana ratou i reira: kihai ratou i mau i te whawhaitanga i Kipea i tera ki nga tamariki o te kino.
10
Kei toku hiahia tenei, ara, kia whiua ratou e ahau; ka huihuia mai ano hoki nga iwi ki te whawhai ki a ratou, i te mea ka herea ratou ki a ratou parautanga e rua.
11
He kuao kau ano hoki a Eperaima kua oti te whakaako, pai tonu ia ki te takahi witi; ka tika atu ia ahau i runga i tona kaki pai: ka meinga e ahau he kai eke mo Eperaima; ko Hura ki te parau, ko Hakopa ki te wawahi i ana pokuru.
12
Whakatokia ta koutou i runga i te tika, tapahia i runga i te mahi tohu, mahia ta koutou patohe: ko te wa hoki tenei e rapua ai a Ihowa, kia tae mai ra ano ia, kia ringitia ano e ia te tika ki runga ki a koutou.
13
Ta koutou i parau ai ko te kino, ta koutou i kokoti ai ko te he, ta koutou kai ko nga hua o te teka: nau hoki i whakawhirinaki atu ki to ara, ki te tini o o tangata marohirohi.
14
Mo reira ka ara he ngangau i roto i o iwi, ka pahuatia ano hoki o pa taiepa katoa, ka rite ki ta Haramana pahuatanga i Pete-arapere i te ra o te whawhaitanga: te whaea, taia iho ki runga ki nga tamariki.
15
Ko ta Pete-ere tenei e mea ai ki a koutou, he nui hoki no to koutou kino: ka whakangaromia rawatia te kingi o Iharaira i te ata.