Hosea Chapter 7 - Paipera Tapu 1868 | Te Paipera Tapu 1868

Hosea Chapter 7 - Paipera Tapu 1868

1
I te mea e rongoatia ana e ahau a Iharaira, katahi ka kitea te he o Eperaima, me nga kino ano a Hamaria: he kai mahi hoki ratou i te teka; e haere mai ana hoki te tahae ki roto, e pahua ana hoki te taua i waho.
2
Kahore ano hoki a ratou meatanga ake i roto i o ratou ngakau, kei te mahara tenei ahau ki to ratou kino katoa: kua karapotia ratou inaianei e a ratou mahi; tenei ano kei toku aroaro.
3
E mea ana ratou i to ratou kino hei whakahari i te kingi, i a ratou teka ano hoki hei whakahari i nga rangatira.
4
He hunga puremu ratou katoa, e rite ana ki te oumu kua oti te tahu e te kai pokepoke taro, a mutu ake tana whakaohooho i muri iho i tana pokepokenga i te paraoa, kia rewenatia ra ano.
5
I te rangi o to tatou kingi i mate nga rangatira i te ngaunga a te waina; tona ringa, maro tonu i roto i te hunga taunu.
6
Kua rite noa ake o ratou ngakau, me te mea he oumu, i a ratou e whanga ana: pau ake te po i ta ratou kai pokepoke taro e moe ana; i te ata kā tonu taua oumu, ano he mura ahi.
7
Werawera katoa ratou me he oumu, pau ake i a ratou o ratou kai whakarite whakawa; kua hinga katoa o ratou kingi: kahore tetahi i roto i a ratou e karanga ana ki a au.
8
A Eperaima, kua huihui atu ia ki roto ki nga iwi: he keke a Eperaima kihai i hurihia.
9
Kua pau tona kaha i nga tautangata, heoi kahore ia e mohio: ina, kua whakauruuru tona hina, a kahore ia e mohio.
10
E whakaaturia ana hoki ta Iharaira e tona whakapehapeha ki tona aroaro: heoi kahore ratou e hoki ki a Ihowa ki to ratou Atua, a ahakoa ko tenei katoa, kahore ratou e rapu i a ia.
11
E rite ana hoki a Eperaima ki te kukupa wairangi kahore nei ona ngakau: e karanga ana ratou ki Ihipa, e haere ana ki Ahiria.
12
Ka haere ratou, ka potaea e ahau taku kupenga ki runga ki a ratou: ka rite ratou ki nga manu o te rangi, i te mea ka riro ratou i a au ki raro; ka whiua ratou e ahau, ka peratia me ta o ratou whakaminenga i rongo ai.
13
Aue te mate mo ratou! kua rere atu nei hoki ratou i a au: mo ratou ko te whakangaromanga: mo ta ratou takahanga i taku: i hokona ano ratou e ahau, heoi kei te korero ratou i nga kupu teka moku.
14
Ehara ano hoki ta ratou tangi ki a au i te mea na o ratou ngakau, i te mea e aue ana ratou i runga i o ratou moenga; he whakaaro ki te witi, ki te waina, i huihui ai ratou; e whakakake ana ano ratou ki a au.
15
Whiu noa ahau, whakakaha noa i o ratou ringa, heoi kino tonu ta ratou whakaaro moku.
16
E hoki ana ratou, ehara ia i te mea ki a te Runga-rawa: to ratou rite kei te kopere tinihanga: ka hinga o ratou rangatira i te hoari, he mea hoki na te riri a to ratou arero: hei mea ano tenei e kataina ai ratou ki te whenua o Ihipa.