- 1
- A i puta mai ano te kupu a Ihowa ki a au, i mea ia,
- 2
- Kaua koe e moe hoa, me whakakahore ano hoki he tamariki, he tamahine mau i tenei wahi.
- 3
- Ko te kupu hoki tenei a Ihowa mo nga tamariki, mo nga tamahine ka whanau ki tenei wahi, mo o ratou whaea ano hoki i whanau ai ratou, mo o ratou pāpā ano, na ratou nei aua tamariki i tenei whenua;
- 4
- Kino rawa nga mate e mate ai ratou, e kore ratou e tangihia, e kore ano e tanumia; ka waiho ratou hei whakawairakau i runga i te mata o te oneone: ka poto atu ratou i te hoari, i te hemo-kai; o ratou tinana ano hoki hei kai ma nga manu o te rangi, ma nga kararehe o te whenua.
- 5
- Ko te kupu hoki tenei a Ihowa, Kaua e tomo ki roto ki te whare o te tangihanga, kaua hoki koe e haere atu ki te tangi, ki te uhunga i a ratou: no te mea kua kore i a au taku rangimarietanga mo tenei iwi, e ai ta Ihowa, ara, te aroha noa, me nga mahi atawhai.
- 6
- Ka mate ano hoki nga mea nui, ratou ko nga mea iti, ki tenei whenua; e kore ratou e tanumia, e kore ano ratou e tangihia; kahore hoki he haehaenga mo ratou, kahore he moremorenga māhunga:
- 7
- E kore ano e tuwhaina mai te taro ma ratou hei whakamarie i tetahi i te tangihanga mo te tupapaku; e kore ano e homai ki a ratou te kapa whakamarie kia inumia, ina mea ki tona pāpā, ki tona whaea.
- 8
- Kaua ano hoki koe e tomo ki roto ki te whare hakari noho tahi ai koutou, kai ai, inu ai ranei.
- 9
- No te mea ko te kupu tenei a Ihowa o nga mano, a te Atua o Iharaira, Nana, ka whakamutua e ahau i tenei wahi i to koutou tirohanga i o koutou ra, te reo koa, te reo hari, te reo o te tane marena hou, me te reo o te wahine marena hou.
- 10
- Na, korerotia atu e koe enei kupu katoa ki tenei iwi, a ka mea ratou ki a koe, Na te aha tenei kino nui katoa i korerotia mai ai e Ihowa ki a matou? he aha hoki to matou he? he aha ano hoki to matou hara i hara ai matou ki a Ihowa ki to matou Atua?
- 11
- Katahi koe ka mea ki a ratou, No te mea i whakarerea ahau e o koutou mātua, e ai ta Ihowa, a haere ana ratou ki te whai i nga atua ke, mahi tonu atu ki a ratou, koropiko atu ana ki a ratou; ko au hoki, whakarerea ake e ratou, kihai hoki taku ture i puritia e ratou.
- 12
- Ko koutou ano hoki, kino atu ta koutou mahi i ta o koutou mātua, kei te whai na hoki koutou i nga tikanga pakeke o tona ngakau kino, o tona ngakau kino, kore ake te rongo ki a au.
- 13
- Na, ka akiritia atu koutou e ahau i tenei whenua ki tetahi whenua kihai i mohiotia e koutou ko o koutou mātua, a ka mahi koutou ki reira ki nga atua ke i te ao, i te po, e kore ano e whakaputaina atu e ahau he aroha ki a koutou.
- 14
- Na, kei te haere ake nei nga ra, e ai ta Ihowa, e kore ai e korerotia, E ora ana a Ihowa nana nei i kawe mai nga tamariki a Iharaira i te whenua o Ihipa;
- 15
- Engari, E ora ana a Ihowa nana nei i kawe mai nga tamariki a Iharaira i te whenua ki te nota, i nga whenua katoa ano hoki i peia atu ai ratou e ia: ka whakahokia mai ano hoki ratou e ahau ki to ratou whenua i hoatu e ahau ki o ratou mātua.
- 16
- Nana, ka tikina atu e ahau nga kai hī ika, he tokomaha, e ai ta Ihowa, a ka hīa ratou e ratou; muri iho ka tikina e ahau nga kai whai mohoao, he tokomaha, a ka whaia ratou i runga i nga maunga katoa, i runga i nga pukepuke katoa, i roto ano hoki i nga rua o nga kamaka.
- 17
- No te mea kei runga oku kanohi i o ratou ara katoa; kahore e huna atu i toku mata, kahore ano hoki ta ratou he i ngaro atu i taku tirohanga.
- 18
- Na, ka matua rite i a au nga utu e rua mo to ratou he, mo to ratou hara; mo ratou i whakapoke i toku whenua, i whakaki ano hoki i toku wahi tupu ki nga tinana o a ratou mea whakarihariha, o a ratou mea anuanu.
- 19
- E Ihowa, e toku kaha, e toku whakapakari, e toku rerenga atu i te wa o te matenga, tera e haere mai nga Tauiwi i nga pito o te whenua ki a koe, a ka mea, He pono teka kau nga mea i whakarerea iho ma o tatou mātua, he horihori, he mea kahore nei he painga.
- 20
- E hanga ranei te tangata i etahi atua mona, ehara nei i te Atua?
- 21
- Mo reira ka meinga ratou e ahau kia mohio i tenei wa, ka meinga ratou e ahau kia mohio ki toku ringa, ki toku marohirohitanga; a ka mohio ratou, ko Ihowa toku ingoa.
Address: 
Phone: 
Email: