Jeremiah Chapter 18 - Paipera Tapu 1868 | Te Paipera Tapu 1868

Jeremiah Chapter 18 - Paipera Tapu 1868

1
Te kupu i puta mai ki a Heremaia, he mea na Ihowa; i ki ia,
2
Whakatika, haere ki raro ki te whare o te kai hanga rihi, a ka meinga koe e ahau i reira kia rongo i aku kupu.
3
Katahi ahau ka haere ki raro ki te whare o te kai hanga rihi, na, kei te mahi ia i tetahi mahi i runga i nga wīra.
4
Na, te oko i hangā nei e ia ki te paru kua he i roto i te ringa o te kai hanga rihi: katahi ka hangā ano e ia tetahi atu oko ki taua mea, ta te kai hanga rihi i kite ai e tika ana kia hangā.
5
Na, ko te putanga mai o te kupu a Ihowa ki a au; i mea ia,
6
E kore ianei e ahei i a au te mea i ta tenei kai hanga rihi ki a koutou, e te whare o Iharaira? e ai ta Ihowa. Nana, te paru i roto i te ringa o te kai hanga rihi, ko to koutou rite tena i roto i toku ringa, e te whare o Iharaira.
7
I te wa e korero ai ahau mo tetahi iwi, mo tetahi kingitanga, kia unuhia atu, kia wahia iho, kia whakangaromia;
8
Ki te tahuri mai taua iwi i korerotia ra e ahau i ta ratou kino, ka ripeneta ahau ki te kino i whakaaro ai ahau kia meatia ki a ratou.
9
Na, i te wa e korerotia ai e ahau tetahi iwi, tetahi kingitanga ranei, kia hangā, kia whakatokia,
10
Ki te mahi ratou i te kino ki taku titiro atu, a ka kore e whakarongo ki toku reo; ka ripeneta ahau ki te pai i mea nei ahau hei pai mo ratou.
11
Na, tena, korero atu ra ki nga tangata o Hura ki te hunga ano hoki e noho ana i Hiruharama; ki atu, Ko te kupu tenei a Ihowa; Nana, tenei ahau te hanga nei i te kino mo koutou, te whakatakoto whakaaro nei mo koutou. Tena ra, hoki mai koutou i tona ara kino, i tona ara kino, kia pai ano hoki a koutou ara, a koutou mahi.
12
Na, ko ta ratou kianga mai, Kua he; engari ka whaia e matou ta matou i whakaaro ai; ka mahia ano hoki e matou nga tikanga pakeke a tona ngakau kino, a tona ngakau kino.
13
No reira tenei kupu a Ihowa, Tena ra, ui atu ki nga iwi, Ko wai i rongo i nga mea penei? he hanga whakawehi rawa te mahi a te wahina a Iharaira.
14
E whakarerea ranei te hukarere o Repanona e puta mai ana i roto i te kohatu o te parae? e mahue ranei nga wai matao e rere mai ana i te wahi ke?
15
Kua wareware nei hoki toku iwi ki a au; kei te tahu whakakakara ratou ki te horihori; kua meinga ano e ratou kia tūtuki nga waewae i o ratou ara ehara nei i nga huarahi o mua; haere ana i nga huarahi, i te ara kihai i opehia ake;
16
A meinga iho e ratou to ratou whenua hei ururua, hei mea e whakahīa mai, a ake ake ake; ka miharo katoa nga tangata e tika ana na reira, oioi ana tona māhunga.
17
Me te mea na te hau ita taku titaritaringa atu i a ratou i te aroaro o te hoa riri; e kore e whakakitea atu e ahau te kanohi ki a ratou, engari te tuara i te ra o to ratou aitua.
18
Na, ko ta ratou kianga ake, Haere mai, tatou ka whakatakoto whakaaro mo Heremaia; e kore hoki e whakakahoretia rawatia he ture ma te tohunga, he whakaaro ma te tangata whakaaro nui, he kupu ranei ma te poropiti. Haere mai, tatou ka patu i a ia ki te arero; kaua hoki tatou e whakarongo atu ki tetahi o ana kupu.
19
Kia whai whakaaro mai koe ki a au, e Ihowa; whakarongo hoki ki te reo o to hunga e totohe ana ki a au.
20
E utua ranei te pai ki te kino? kua keria nei hoki e ratou he rua moku kia mate. Kia mahara, i tu ahau ki tou aroaro ki te korero i te pai mo ratou, ki te whakatahuri atu ano hoki i to riri i a ratou.
21
Mo reira hoatu a ratou tamariki ki te hemo-kai, kia whakahekea ano hoki o ratou toto e te mata o te hoari: a ratou wahine kia whakatamarikikoretia, kia tukitukia o ratou tangata, a mate rawa, kia patua ano o ratou taitamariki ki te hoari i te whawhaitanga.
22
Kia rangona he tangi i roto i o ratou whare, ina kawea mai e koe he ope ki a ratou, he mea huaki tata; mo ratou i keri i te rua hei hopu i a au, mo ratou i huna i nga rore mo oku waewae.
23
Na, kua mohio na koe, e Ihowa, ki ā ratou whakaaro katoa moku kia whakamatea; kaua he whakamarietanga e meatia mo to ratou he; kaua ano hoki to ratou hara e murua atu i to aroaro, kia whakatakā ano ratou i tou aroaro; ko tau tenei e mea ai ki a ratou i te wa e riri ai koe.