- 1
- Na, ka rongo a Pahuru tama a Imere tohunga, tino kawana o te whare o Ihowa, kua poropititia enei kupu e Heremaia.
- 2
- Katahi a Pahuru ka patu i a Heremaia poropiti, makā ana ia e ia ki te here waewae i to runga kuwaha o Peniamine, ki tera i te whare o Ihowa.
- 3
- Na, i te aonga ake ka whakaputaina mai a Heremaia e Pahuru i roto i te here waewae. A ka mea a Heremaia ki a ia, Ehara a Pahuru i te ingoa i karangatia e Ihowa ki a koe; engari Ko Makoro-mihapipi.
- 4
- No te mea ko te kupu tenei a Ihowa, Nana, ka meinga koe e ahau hei whakawehi mou, mo te hunga katoa ano hoki e aroha ana ki a koe: ka hinga ratou i te hoari a o ratou hoa riri, me te titiro atu ano o kanohi: ka hoatu ano hoki e ahau a Hura katoa ki te ringaringa o te kingi o Papurona, a mana ratou e whakarau atu ki Papurona, mana hoki ratou e patu ki te hoari.
- 5
- Ka hoatu ano e ahau te kaha katoa o tenei pa, me ana mauiui katoa, me ana mea utu nui katoa, me nga taonga katoa o nga kingi o Hura, ka hoatu e ahau ki te ringaringa o o ratou hoa riri, a ka pahuatia e ratou, ka tangohia, ka maua ano ki Papurona.
- 6
- Na, ko koe, e Pahuru, koutou ko nga tangata katoa e noho ana i roto i to whare, ka riro koutou ki te whakaraunga: ka tae ano koe ki Papurona, mate atu ki reira, tanumia atu ki reira, koutou ko o hoa aroha katoa, i poropiti teka atu ai koe.
- 7
- E Ihowa, nau ahau i akiaki, a taea ana ahau e te akiaki: kua kaha rawa koe i a au, kua taea tau: kua waiho nei ahau hei whakakatanga i nga ra katoa; kei te whakahī mai te katoa ki a au.
- 8
- I te mea hoki ka korero nei ahau, ka hamama atu ahau, ka karangatia ano e ahau te mahi nanakia me te pahua; no te mea kua waiho nei te kupu a Ihowa hei tawainga moku, hei whakakatanga, i tenei ra, i tenei ra.
- 9
- Na, ko taku kianga ake, E kore ia e whakahuatia e ahau, e kore ano ahau e korero i runga i tona ingoa i nga wa e takoto ake nei. Heoi rite tonu tana kupu i roto i toku ngakau ki te ahi e ka ana, he mea tutaki iho ki roto ki oku wheua; ruha iho ahau i a au e pehi ana, kihai i taea.
- 10
- I rongo hoki ahau i te korero whakahe mai a nga tangata tokomaha, i nga taha katoa te wehi. Whakaaturia, e ai ta ratou, a ka whakaaturia atu e matou. Oku hoa ake ano kei te whanga katoa ratou ki a au kia totitoti, e mea ana, Tera pea ia e ahei te whakawai, a ka taea ia e tatou, ka whiwhi ano hoki tatou ki te utu i a ia.
- 11
- Kei a au ia a Ihowa, ano he marohirohi e nui rawa ana te kaha; no reira ka tūtuki nga waewae o oku kai tukino, e kore ano ta ratou e taea: nui whakaharahara to ratou whakama; e kore hoki ta ratou e oti pai; to ratou whakama, e mau tonu nei, e kore e wareware.
- 12
- Na, e Ihowa o nga mano, ko koe te kai whakamatautau o te tangata tika, e kite ana koe i nga whatumanawa, i te ngakau, kia kite ahau i to utu ki a ratou; kua whakakitea atu nei hoki e ahau ki a koe taku totohe.
- 13
- Waiata atu ki a Ihowa, whakamoemititia a Ihowa; kua whakaorangia nei hoki e ia te wairua o te rawa-kore i te ringaringa o nga kai mahi i te kino.
- 14
- Kia kangā te rangi i whanau ai ahau; kaua e whakapaingia te ra i puta mai ai ahau i roto i toku whaea.
- 15
- Kia kangā te tangata i korero ki toku pāpā, i mea, Kua whanau to tamaiti, he tane; a meinga ana e ia kia nui te koa.
- 16
- Kia rite taua tangata ki nga pa i hurihia e Ihowa, kihai ano hoki i ripenetatia atu e ia: kia rangona ano e ia te karanga i te ata, te hamamatanga i te wa o te poutumarotanga.
- 17
- No te mea kihai ahau i whakamatea e ia i te putanga mai ano i te kopu; ko toku whaea ranei hei urupa moku, kia mau tonu ranei te hapu o tona kopu.
- 18
- He aha ahau i puta mai ai i te kopu kia kite i te raruraru, i te mauiui, kia poto ano hoki oku rangi i runga i te whakama?
Address: 
Phone: 
Email: