Jeremiah Chapter 23 - Paipera Tapu 1868 | Te Paipera Tapu 1868

Jeremiah Chapter 23 - Paipera Tapu 1868

1
Aue te mate mo nga hepara e whakakorekore nei, e whakamarara nei i nga hipi o taku parae, e ai ta Ihowa.
2
Mo reira ko te kupu tenei a Ihowa Atua o Iharaira mo nga hepara e whangai nei i taku iwi, Whakamararatia ana e koutou aku hipi, aia atu ana ratou, kihai hoki i tirotirohia e koutou. Tenei au te whiu nei i a koutou mo te kino o a koutou mahi, e ai ta Ihowa.
3
A ka huihuia mai e ahau nga toenga o aku hipi i nga whenua katoa i peia atu ai ratou e ahau, ka whakahokia mai ano ratou ki o ratou puninga, a ka hua ratou, ka tini.
4
Ka whakaarahia ano e ahau he hepara mo ratou hei whangai i a ratou, e kore ano ratou e wehi i nga wa i muri nei, e kore e pawera, e kore ano tetahi e ngaro atu, e ai ta Ihowa.
5
Nana, kei te haere mai nga ra, e ai ta Ihowa, e whakaarahia ai e ahau he Manga tika ma Rawiri, ka kingi ano tetahi kingi, ka kake ki runga, ka whakarite ano hoki i te whakawa i te tika ki runga ki te whenua.
6
I ona ra ka whakaorangia a Hura, ka noho humarie ano hoki a Iharaira, ko te ingoa ano tenei e karangatia ki a ia, Ko IHOWA, KO TO TATOU TIKA.
7
No reira, tenei nga ra te haere mai nei, e ai ta Ihowa, e kore ai e korerotia, E ora ana a Ihowa nana nei i kawe mai nga tamariki a Iharaira i te whenua o Ihipa;
8
Engari, E ora ana a Ihowa nana nei i kawe mai, nana nei i arahi mai nga uri o te whare o Iharaira i te whenua ki te nota, i nga whenua katoa ano hoki i peia atu ai ratou e ahau; ka noho ano hoki ratou ki to ratou oneone.
9
Maru noa iho toku ngakau i roto i a au, i te whakaaro hoki ki nga poropiti, wiri ana oku wheua katoa; kua rite ahau ki te tangata e haurangi ana, ki te tangata kua taea e te waina, he whakaaro hoki ki a Ihowa, he whakaaro ano hoki ki ana kupu tapu.
10
No te mea kua kapi te whenua i nga tangata puremu, no te mea e tangi ana te whenua i te kanga, kua maroke nga wahi kai o te koraha; ta ratou oma ano hoki he kino, to ratou kaha kahore i tika.
11
No te mea te poropiti, te tohunga, kua poke ngatahi raua: i roto ano hoki i toku whare kua kitea e ahau to ratou kino, e ai ta Ihowa.
12
Mo reira to ratou ara hei mea e pahekeheke ai ratou i roto i te pouri: ka aia atu ratou, hinga tonu atu ki reira; no te mea ka kawea atu e ahau he kino ki runga ki a ratou, ara, te tau e tirotirohia ai ratou, e ai ta Ihowa.
13
I kitea ano e ahau te mahi wairangi a nga poropiti o Hamaria; na Paara ta ratou poropititanga, a whakapohehetia ana e ratou toku iwi a Iharaira.
14
Kua kitea ano hoki e ahau te mahi whakawehi rawa a nga poropiti o Hiruharama, ara, te puremu, te haere i runga i te teka; e whakakahangia ana hoki e ratou nga ringaringa o nga kai mahi kino, tē tahuri mai ai tetahi i tana kino; ki a au rite tonu ratou katoa ki Horoma; nga tangata ano hoki o reira, koia ano kei o Komora.
15
Mo reira ko te kupu tenei a Ihowa o nga mano mo nga poropiti, Tenei au te whangai nei i a ratou ki te womawori, te whakainu nei i a ratou ki te wai kawa: no te mea no nga poropiti o Hiruharama te putanga atu o te tinihanga puta noa i te whenua.
16
Ko te kupu tenei a Ihowa o nga mano, Kei whakarongo koutou ki nga kupu a nga poropiti e poropiti na ki a koutou: e whakawairangitia ana koutou e ratou; he kitenga na o ratou ngakau ake ta ratou e korero na, ehara i te mea na te mangai o Ihowa.
17
E mea tonu ana ratou ki te hunga e whakahawea ana ki a au, Kua ki mai a Ihowa, Ka mau te rongo ki a koutou; ki te hunga katoa ano hoki e haere ana i runga i nga tikanga pakeke o o ratou ngakau, e mea ana ratou, E kore te kino e tae mai ki a koutou.
18
Ko wai hoki i tu i runga i to Ihowa whakaaro? ko wai i kite, i whakarongo ki tana kupu? ko wai i mahara atu, i whakarongo atu ki tana kupu?
19
Nana, kua puta atu te tukauati i a Ihowa, koia ano te riri! he tukauati kino whakaharahara, aki pu atu ki runga ki te mahunga o nga kai mahi i te kino.
20
E kore e hoki iho ta Ihowa riri, kia oti ra ano, kia whakapumautia ra ano e ia nga whakaaro a tona ngakau: i nga ra whakamutunga ka ata whakaaroa marietia e koutou.
21
Kihai ahau i unga atu i enei poropiti, heoi rere ana ratou; kihai ahau i korero ki a ratou, heoi kei te poropiti ratou.
22
Na, ki te mea i tu ratou i runga i taku whakaaro, a i mea i toku iwi kia whakarongo ki aku kupu, katahi ratou ka whakahokia mai e ratou i to ratou ara kino, i te kino ano o a ratou mahi.
23
He Atua tata ianei ahau, e ai ta Ihowa, a ehara i te Atua i tawhiti?
24
E huna ranei tetahi tangata i a ia ki nga wahi ngaro kia kore ai ia e kitea e ahau? e ai ta Ihowa. He teka ianei kapi tonu i a au te rangi me te whenua? e ai ta Ihowa.
25
Kua rongo ahau i nga kupu a nga poropiti e poropiti teka na i runga i toku ingoa, e mea na, He moe naku, he moe naku.
26
Kia pehea te roa o te mau o tenei i roto i te ngakau o nga poropiti e poropiti teka na? na, ko te tinihanga o to ratou ngakau ta ratou e poropiti ra.
27
Ki ta ratou e whakaaro nei, ma a ratou moe e korerotia nei e ratou ki tona hoa, ki tona hoa, ka meinga ai toku iwi kia wareware ki toku ingoa, kia pera ano me o ratou mātua i wareware nei ki toku ingoa, i mea nei ki a Paara.
28
Te poropiti he moe nei tana, kia korerotia mai e ia te moe; te tangata hoki i a ia taku kupu, kia pono tana korerotanga i taku kupu. He aha ta te papapa i roto i te witi? e ai ta Ihowa.
29
He teka ianei e rite ana taku kupu ki te ahi, e ai ta Ihowa; ki te hama ano hoki e wahi nei i te kamaka, a mongamonga noa?
30
Mo reira, na, hei hoa riri ahau mo nga poropiti, e ai ta Ihowa, e tahaetia ana hoki e ratou aku kupu i tona hoa, i tona hoa.
31
Nana, hei hoa riri ahau mo nga poropiti, e ai ta Ihowa, mo te hunga kua anga nei o ratou arero, kua ki nei, E mea ana ia.
32
Nana, hei hoa riri ahau, e ai ta Ihowa, mo te hunga e poropiti ana i nga moe teka, a korerotia mai ana e ratou, whakapohehetia ana e ratou toku iwi ki a ratou korero teka, ki a ratou mahi wairangi: kihai nei hoki ahau i unga i a ratou, kihai ano i whakahau i a ratou: mo reira hore rawa he painga a ratou mo tenei iwi, e ai ta Ihowa.
33
Ki te ui mai tenei iwi ki a koe, te poropiti, te tohunga ranei, ki te mea mai, Tena koa ta Ihowa pikaunga? katahi koe ka ki atu ki a ratou, Tehea pikaunga? ka mahue ra koutou i a au, e ai ta Ihowa.
34
Na, te poropiti, te tohunga, te iwi ranei, e mea ana, He pikaunga na Ihowa, ka whuia e ahau taua tangata, ratou ko tona whare.
35
Ko te kupu tenei ma koutou ki tona hoa, ki tona hoa, ki tona teina, ki tona tuakana, Tena koa te kupu i whakahokia mai e Ihowa? i pehea mai ano a Ihowa?
36
Kati ano ta koutou whakahua i te pikaunga a Ihowa; no te mea hei pikaunga tana kupu, tana kupu, ma tenei tangata, ma tenei tangata; mo koutou i whakaputa ke i nga kupu a te Atua ora, a Ihowa o nga mano, a to tatou Atua.
37
Ko tau tenei e korero ai ki te poropiti, Tena koa te kupu i whakahokia mai e Ihowa ki a koe? ko tenei ranei, I pehea mai a Ihowa?
38
Tena ko tenei ka ki mai na koutou, Te pikaunga a Ihowa; mo reira ko te kupu tenei a Ihowa; Mo ta koutou korerotanga i tena kupu, i Te pikaunga a Ihowa, i a au ra i unga tangata ki a koutou, i mea atu, Kaua e ki, Ko te pikaunga a Ihowa;
39
Mo reira, na, ka wareware rawa ahau, ae ra, ahau ki a koutou, ka whakarere ano hoki ahau i a koutou, i te pa ano hoki i hoatu e ahau ki a koutou ko o koutou mātua, ka akiritia atu ano koutou i toku aroaro.
40
Ka utaina ano e ahau he ingoa kino ki runga ki a koutou, he mea mau tonu, he whakama ano hoki e mau tonu ana, e kore e wareware.