- 1
- Te kupu i puta mai ki a Heremaia, he mea na Ihowa; i ki mai ia,
- 2
- Ko te kupu tenei a Ihowa Atua o Iharaira, e mea ana ia, Tuhituhia ki te pukapuka nga kupu katoa i korerotia e ahau ki a koe.
- 3
- No te mea, tenei te haere mai nei nga ra, e ai ta Ihowa, e whakahokia mai ai e ahau taku iwi a Iharaira raua ko Hura, i whakaraua nei, e ai ta Ihowa; ka whakahokia mai ano ki te whenua i hoatu e ahau ki o ratou mātua, a ka riro a reira i a ratou.
- 4
- Ko nga kupu ano enei i korerotia e Ihowa mo Iharaira raua ko Hura,
- 5
- Ko te kupu hoki tenei a Ihowa, Kua rongo tatou i te reo, he wiri, he wehi, ehara i te rongo mau.
- 6
- Tena ra, ui atu, kia kite ai koutou, e whanau tamariki ranei te tane? Na te aha ahau i kite ai i nga tangata katoa ko o ratou ringa kei o ratou hope, koia ano kei te wahine e whanau ana, kua puta ke ano hoki nga kanohi katoa, kua kōmā.
- 7
- Aue! he nui hoki taua rangi, kahore ona rite: he wa ngakau mamae mo Hakopa: otiia ka ora ano ia i taua mamae:
- 8
- Na, i taua rangi ano, e ai ta Ihowa o nga mano, ka wahia e ahau tana ioka i to kaki, ka motuhia ano hoki e ahau ou here, e kore ano ia e whakamahia e nga tangata ke i muri iho:
- 9
- A ka mahi ratou ki a Ihowa ki to ratou Atua, ki a Rawiri ano hoki ki to ratou kingi e whakaarahia ake e ahau mo ratou.
- 10
- Na, kaua e wehi, e taku pononga, e Hakopa, e ai ta Ihowa, kaua hoki e pawera, e Iharaira; no te mea tenei ahau te whakaora mai nei i a koe i tawhiti, i ou uri ano hoki i te whenua i whakaraua atu ai ratou, a ka hoki mai a Hakopa, ka ata noho, ka whai tānga manawa, tē ai he kai whakawehi.
- 11
- No te mea hei hoa ahau mou, e ai ta Ihowa, hei whakaora i a koe: ka poto rawa hoki i a au nga iwi katoa kua whakamararatia atu na koe ki reira, otiia e kore koe e poto rawa i a au; engari ka pakia koe e ahau, he mea whakarite marie atu, e kore ia koe e tino whakaharakoretia rawatia.
- 12
- Ko te kupu hoki tenei a Ihowa, E kore tou pakaru e mahu, mamae rawa tou marutanga.
- 13
- Kahore he kai tohe i tau, kia takaia ai koe: kahore ou rongoa whakamahu.
- 14
- Te hunga katoa i aroha ki a koe kua wareware ki a koe; kahore ratou e rapu i a koe; no te mea he patu na te hoa riri taku patunga i a koe; na te tangata nanakia ano hoki te whiu; he nui hoki no to kino; he maha no ou hara.
- 15
- He aha koe i tangi ai ki to pakaru? e kore to mamae e taea te rongoa, i te nui hoki o to kino: he maha no ou hara i meinga ai e ahau enei mea ki a koe.
- 16
- Na, te hunga katoa e kai ana i a koe, ka kainga ratou; ou hoa riri katoa ano hoki ka riro ratou katoa ki te whakaraunga; te hunga e pahua ana i a koe ka pahuatia ratou; ka tukua atu ano hoki e ahau hei taonga pārau te hunga katoa e muru ana i a koe.
- 17
- Ka whakanekehia ake hoki koe e ahau ki te ora, ka rongoatia ano e ahau ou marutanga, e ai ta Ihowa; mou i karangatia, He Peinga, mo te kupu nei, Ko Hiona tenei e kore nei e rapua e te tangata.
- 18
- Ko te kupu tenei a Ihowa, Nana, ka whakatahuritia atu e ahau te whakaraunga o nga teneti o Hakopa, ka aroha atu ano ahau ki ona nohoanga; a ka hangā te pa ki runga ki tona puranga, ka whakapumautia ano hoki nga tikanga o te whare kingi.
- 19
- Ka puta mai ano hoki i reira te whakamoemiti, me te reo kata, ka whakanuia ano hoki ratou e ahau, e kore ano ratou e torutoru: ka whakakororiatia ratou, e kore ano ratou e iti.
- 20
- Ka rite ano hoki a ratou tamariki ki o mua; ka whakapumautia ano to ratou whakaminenga ki toku aroaro; a ka whiua e ahau ona kai whakatupukino katoa.
- 21
- To ratou metararahi ano ko tetahi ano o ratou, ka puta ake ano to ratou kawana i roto i a ratou; ka meinga ano ia e ahau kia whakatata mai, a ka haere mai ia ki a au: ko wai hoki tenei kua whakatuturutia nei e ia tona ngakau ki te haere mai ki a au? e ai ta Ihowa.
- 22
- A hei iwi koutou moku, ko au hoki hei Atua mo koutou.
- 23
- Nana, te tukauati a Ihowa te puta mai nei i runga i te riri, he tukauati e mau tonu ana, aki pu atu ki runga ki te māhunga o te hunga kino.
- 24
- E kore e tahuri atu te riri a Ihowa e mura nei, kia oti ra ano i a ia, kia whakapumautia ra ano e ia nga whakaaro a tona ngakau; i nga ra whakamutunga ka whakaaroa e koutou.
Address: 
Phone: 
Email: