- 1
- I te iwa o nga tau o Terekia kingi o Hura, i te tekau o nga marama, ka haere mai a Nepukararetara kingi o Papurona ratou ko tana ope katoa ki Hiruharama, a whakapaea ana a reira e ratou.
- 2
- I te tekau ma tahi o nga tau o Terekia, i te wha o nga marama, i te iwa o nga ra o te marama ka pakaru te pa.
- 3
- Na, ka haere mai nga rangatira katoa o te kingi o Papurona, a noho ana i to waenga kuwaha, a Nerekara-haretere, a Hamakara-nepo, a Harahekimi, a Rapa-hari, a Nerekara-haretere, a Rapa-maka, ratou ko era atu o nga rangatira o te kingi o Papurona.
- 4
- Na, ka kitea ratou e Terekia kingi o Hura ratou ko nga tangata whawhai katoa, na, rere ana ratou, puta atu ana i roto i te pa i te po, i te huarahi i te kāri a te kingi, i te kuwaha i waenganui i nga taiepa e rua: i te huarahi o te mānia tona putanga atu.
- 5
- Katahi ka whaia atu ratou e te ope, e nga Karari, a ka mau a Terekia ki nga mānia i Heriko. Na, hopukia atu ana ia e ratou, kawea atu ana ki a Nepukaneha kingi o Papurona ki Ripira i te whenua o Hamata: a korerotia ana e ia te tikanga mo tona whakawakanga.
- 6
- Katahi ka tukitukia e te kingi o Papurona nga tamariki a Terekia ki tona aroaro ki Ripira: i tukitukia ano hoki nga rangatira katoa o Hura e te kingi o Papurona.
- 7
- Nga kanohi ano hoki o Terekia whakamatapotia iho e ia, herea iho ia ki nga mekameka parahi, kawea atu ana ki Papurona.
- 8
- Na, te whare o te kingi, nga whare ano hoki o te iwi, tahuna ake e nga Karari ki te ahi, i wahia iho ano hoki e ratou nga taiepa o Hiruharama.
- 9
- Na, era atu o te iwi i mahue ki te pa, me te hunga ano i papahoro atu, i taka atu ra ki a ia, me era atu ano o te iwi i mahue, whakaraua atu ana ratou e Neputara-arana, rangatira o nga kai tiaki, ki Papurona.
- 10
- Otiia i mahue ano i a Neputara-arana, rangatira o nga kai tiaki, nga ware o te iwi, kahore nei o ratou rawa, ki te whenua o Hura, a hoatu ana e ia etahi mara waina, etahi mara ke ki a ratou i taua rangi.
- 11
- A i whakatakoto tikanga ano a Nepukararetara kingi o Papurona mo Heremaia ki a Neputara-arana rangatira o nga kai tiaki; i mea ia,
- 12
- Tikina atu ia; kia mau ano to tirotiro i a ia; kaua hoki tetahi kino e meatia ki a ia; engari ko tana e ki mai ai ki a koe, ko tau tena e mea ai ki a ia.
- 13
- Katahi ka unga tangata atu a Neputara-arana rangatira o nga kai tiaki, ratou ko Nepuhahapana, ko Rapa-hari, ko Nerekara-haretere, ko Rapa-maka, ratou ko nga rangatira katoa o te kingi o Papurona;
- 14
- Unga tangata atu ana ratou, a tikina atu ana e ratou a Heremaia i roto i te marae o te whare herehere. Na, tukua atu ana ia e ratou ki a Keraria tame a Akikama tama a Hapana kia kawea ki te whare: na, noho ana ia i waenganui i te iwi.
- 15
- Na, i puta mai te kupu a Ihowa ki a Heremaia, i a ia e here ana i roto i te marae o te whare herehere; i mea ia,
- 16
- Haere, korero atu ki a Epere-mereke Etiopiana, mea atu, Ko te kupu tenei a Ihowa o nga mano, Atua o Iharaira, Tenei au te taki mai nei i aku kupu ki runga ki tenei pa, hei kino, ehara ano hoki i te mea hei pai; ka tae atu ano ki tou aroaro i taua rangi.
- 17
- Otiia ka whakaorangia koe e ahau i taua ra, e ai ta Ihowa: e kore ano koe e tukua atu ki te ringaringa o te hunga e wehi na koe.
- 18
- Engari ka whakaorangia rawatia koe e ahau, e kore ano koe e hinga i te hoari, a hei taonga parakete tou wairua ki a koe; mou i whakawhirinaki ki a au, e ai ta Ihowa.
Address: 
Phone: 
Email: