- 1
- Te kupu a Ihowa i puta mai ki a Heremaia poropiti mo nga iwi;
- 2
- Mo Ihipa, mo te ope a Parao-neko kingi o Ihipa, mo tera i te awa i Uparati, i Karakemiki, i patua ra e Nepukararetara kingi o Papurona i te wha o nga tau o Iehoiakimi tama a Hohia kingi o Hura.
- 3
- Whakapaia te whakangungu rakau, te puapua, whakatata atu ki te whawhai.
- 4
- Whakanohoia nga hoiho, e eke, e nga kai eke hoiho; tu tonu koutou me o koutou potae ano; whakakanapatia nga tao, kakahuria nga pukupuku.
- 5
- He aha ahau i kite ai i a ratou e pawera tonu ana, e hoki ana ki muri? o ratou marohirohi, tukituki rawa; kua whati noa atu; kihai hoki i tahurihuri: kei nga taha katoa te wehi, e ai ta Ihowa.
- 6
- Kaua te mea tere e oma; kaua ano te marohirohi e mawhiti atu. Ka tūtuki o ratou waewae, ka hinga ratou ki te taha ki te nota, ki te taha o te awa o Uparati.
- 7
- Ko wai tenei e haere mai nei, ano he waipuke? oho ana ona wai, ano ko nga awa.
- 8
- I haere mai a Ihipa, ano he waipuke; oho ana ona wai, ano ko nga awa, tana ki, Ka haere atu ahau, ka taupokina te whenua; ka ngaro i a au te pa me ona tangata.
- 9
- Haere mai, e nga hoiho; e ngana, e nga hariata; kia puta mai nga marohirohi, nga Etiopiana, nga Ripiana e rahurahu nei i te whakangungu rakau; nga Ririana ano hoki e rahurahu nei, e whakapiko nei i te kopere.
- 10
- Na te Ariki hoki na Ihowa o nga mano tenei rangi, he rangi rapu utu, e whai utu ai ia i ona hoa; a ka kai te hoari, ka makona, makūkū rawa o ratou toto; no te mea he patunga tapu ta te Ariki ta Ihowa o nga mano i te whenua ki te nota, i te taha o te awa o Uparati.
- 11
- Haere ki runga ki Kireara, tikina he pama, e te wahina, e te tamahine a Ihipa: maumau whakamaha noa koe i nga rongoa; kahore hoki he oranga mou.
- 12
- Kua rongo nga iwi ki tou whakama, kua paku to karanga ki nga whenua: kua tūtuki nei hoki te waewae o te marohirohi ki te marohirohi, hinga ngatahi ana raua tokorua.
- 13
- Te kupu i korerotia e Ihowa ki a Heremaia poropiti, mo ta Nepukararetara kingi o Papurona haerenga mai ki te patu i te whenua o Ihipa.
- 14
- Kauwhautia atu ki Ihipa, korerotia ano ki Mikiroro, korerotia ano hoki ki Nopo, ki Tahapanehe: mea atu, E tu, kia tumatohi; no te mea ka kai te hoari i tetahi taha ou, i tetahi taha.
- 15
- He aha o maia i kahakina atu ai? kihai ratou i tu; na Ihowa hoki ratou i ā atu.
- 16
- Kua whakatokomahatia e ia te hunga e hinga ana, hinga ana ano ratou i tona hoa, i tona hoa: i ki ano ratou, Whakatika, tatou ka hoki ki to tatou iwi, ki te whenua i whanau ai tatou, i te wehi ki te hoari tukino.
- 17
- I karanga ratou i reira, He turituri kau a Parao kingi o Ihipa, kua pahemo te wa i whakaritea.
- 18
- E ora ana ahau, e ai ta te kingi, ko Ihowa nei o nga mano tona ingoa, Kei Taporo i roto i nga maunga, kei Karamere ano hoki i te moana te rite o tona haerenga mai.
- 19
- Mahia nga mea mou mo te whakaraunga, e te tamahine e noho ana i Ihipa; no te mea ka ururuatia a Nopo, ka wera, tē ai he tangata hei noho.
- 20
- He kuao kau, ataahua tonu, a Ihipa; otiia kei te haere mai te whakangaromanga, kei te haere mai i te nota.
- 21
- Ana tangata i utu ai ano hoki, rite tonu ratou i roto i a ia ki nga kau momona; ko ratou ano hoki kua tahuri atu; oma ngatahi ana ratou; kihai i tu; no te mea kua tae mai te ra o to ratou aitua ki a ratou, te wa e whiua ai.
- 22
- Tona reo, ka rite te puakanga atu ki to te nakahi; no te mea he taua ta ratou ina haere, ka haere mai ano ratou me nga titaha ano ki a ia, ka rite ki nga kai tapahi rakau.
- 23
- Ka tuakina ratou, e ai ta Ihowa, tona ngahere e kore nei te mutunga e taea te rapu atu; no te mea he tini ke ratou i te mawhitiwhiti, e kore e taea te tatau.
- 24
- Ka whakama te tamahine a Ihipa, ka tukua atu ki roto ki te ringaringa o te iwi ki te nota.
- 25
- E mea ana a Ihowa o nga mano, Atua o Iharaira; Nana, ka whiua e ahau te mano tini o No, a Parao, a Ihipa me o reira atua, me o reira kingi; a Parao ano, ratou ko te hunga e whakawhirinaki atu ana ki a ia:
- 26
- Ka hoatu ano ratou e ahau ki te ringaringa o te hunga e whai ana kia whakamatea ratou, ki te ringaringa ano o Nepukararetara kingi o Papurona, ki te ringaringa ano o ana tangata, a muri iho ka nohoia, ka pera ano me nga rangi o mua, e ai ta Ihowa.
- 27
- Ko koe ia, kaua e wehi, e taku pononga, e Hakopa, kaua ano e pawera, e Iharaira; no te mea tenei ahau te whakaora mai nei i a koe i tawhiti, i ou uri ano hoki i te whenua i whakaraua ai ratou, a ka hoki mai a Hakopa, ka ata noho, ka whai tānga manawa, tē ai he kai whakawehi.
- 28
- Kaua koe e wehi, e taku pononga, e Hakopa, e ai ta Ihowa: kei a koe nei hoki ahau; ka poto rawa hoki i a au nga iwi katoa kua peia atu nei koe e ahau ki reira, otiia e kore koe e poto rawa i a au, engari ka pakia koe e ahau, he mea whakarite marie atu, e kore ia koe e tino whakaharakoretia rawatia.
Address: 
Phone: 
Email: