Jeremiah Chapter 51 - Paipera Tapu 1868 | Te Paipera Tapu 1868

Jeremiah Chapter 51 - Paipera Tapu 1868

1
Ko te kupu tenei a Ihowa, Tena ka ara i a au he hau whakamoti mo Papurona, mo te hunga ano hoki e noho ana i roto i nga tangata e whakatika mai ana ki te ngangare ki a au.
2
Ka ungā ano e ahau nga kai titaritari ki Papurona, a ka titaritaria e ratou, ka meinga tana whenua kia takoto kau: no te mea ka tatau ratou ki a ia i tetahi taha, i tetahi taha, i te ra o te he.
3
Kia whakapikoa tana kopere e te kai kopere ki te tangata e kopere ana, ki te tangata ano hoki he pukupuku tona i tona aranga ki runga; kaua ano ana taitamariki e tohungia; whakangaromia rawatia tana ope katoa.
4
Na, ka hinga nga tupapaku ki te whenua o nga Karari, te hunga i werohia ki ona huarahi.
5
Kahore hoki he whakarerenga o Iharaira, o Hura ranei, e tona Atua, e Ihowa o nga mano; i kapi ano ia to ratou whenua i te hara ki te Mea Tapu o Iharaira.
6
Rere atu i roto i Papurona, kia mawhiti mai te wairua o ia tangata, o ia tangata; kei hatepea atu koutou i roto i tona he; no te mea ko te wa tenei o ta Ihowa rapu utu; ka rite tana utu ki a ia.
7
He kapa koura a Papurona i roto i te ringa o Ihowa, whakahaurangitia ana e ia te whenua katoa: kua inumia tona waina e nga iwi; na reira nga iwi i haurangi ai.
8
Kitea rawatia ake kua taka a Papurona, kua pakaru: e tangi ki a ia, e mau ki te pama mo tona mamae, me kahore ia e taea te rongoa.
9
He rongoa ta matou mo Papurona, heoi kihai ia i ora; kia whakarerea atu ia e tatou, kia haere tatou ki tona whenua, ki tona whenua; no te mea kua tutuki atu te whakaritenga o tona whakawakanga ki te rangi, kua neke ake ki nga kapua.
10
Kua whakaputaina ta tatou tika e Ihowa. Haere mai, kia korerotia e tatou ki Hiona te mahi a Ihowa a to tatou Atua.
11
Whakakanapatia nga pere, kia rite nga whakangungu rakau: kua oho i a Ihowa te wairua o nga kingi o nga Meri; he tikanga hoki tona mo Papurona kia whakangaromia; no te mea he rapunga utu tenei na Ihowa, he rapunga utu mo tona temepara.
12
Whakaarahia te kara ki nga taiepa o Papurona, whakakahangia nga kai tiaki, whakaritea nga kai tiaki, whakatakotoria nga pehipehi: no te mea kua whakaaroa e Ihowa, kua mahia ano hoki e ia tana i korero ai mo nga tangata o Papurona.
13
E te wahine e noho na i runga i nga wai maha, he maha nei o taonga, kua tae mai to whakamutunga, he ruri mo to apo taonga.
14
Kua oatitia tona oranga e Ihowa o nga mano, Ina, ka whakakīa koe e ahau ki te tangata, kei te tatarakihi te rite, a ka hamama ratou ki a koe.
15
Nāna i hanga te whenua, na tona kaha hoki; te ao he mea whakapumau na ona whakaaro nui; nga rangi he mea hora na tona matauranga.
16
Kia puaki tona reo, he haruru wai kei te rangi; e meinga ana e ia nga kohu kia pupu ake i nga pito o te whenua: e hangā ana e ia nga uira me te ua, e whakaputaina mai ana te hau i roto i ona taonga.
17
Poauau kau nga tangata katoa i ta ratou i mohio ai; nga kai whakarewa katoa whakama iho i te whakapakoko: he mea teka hoki tana i whakarewa ai, kahore he manawa i roto i a ratou.
18
He horihori kau ratou, he mahi pohehe; i te wa e pa atu ai ia ki a ratou, ka ngaro ratou.
19
Kahore e rite ki era te wahi i a Hakopa: ko ia hoki te kai whakaahua o nga mea katoa, ko Iharaira ano hoki te iwi o tona kāinga tupu; ko Ihowa o nga mano tona ingoa.
20
Hei patu wawahi koe maku, hei patu mo te whawhai: hei kai wawahi hoki koe maku mo nga iwi, hei kai whakamoti maku mo nga kingitanga;
21
Hei kai wawahi ano koe maku mo te hoiho, mo te tangata ano i runga i a ia: hei kai wawahi koe maku mo te hariata, mo te tangata ano e noho ana i runga.
22
Hei kai wawahi koe maku mo te tangata, mo te wahine; hei kai wawahi koe maku mo te koroheke, mo te tamariki; hei kai wawahi koe maku mo te taitamariki, mo te taitamahine;
23
Hei kai wawahi koe maku mo te hepara, mo tona kahui; hei kai wawahi koe maku mo te kai parau, mo ana kau ano hoki kua oti te ioka; hei kai wawahi koe maku mo nga rangatira, mo nga ariki.
24
Ka utua ano e ahau a Papurona, me nga tangata katoa o Karari mo ta ratou kino katoa i mea ai ratou ki Hiona i ta koutou tirohanga atu, e ai ta Ihowa.
25
Nana, hei hoa riri tenei ahau mou, e te maunga whakamoti, e ai ta Ihowa, i a koe e whakamoti na i nga whenua katoa, ka whakamarokia atu ano toku ringaringa ki a koe, ka hurihia atu ano hoki koe e ahau i runga i nga kamaka, a ka meinga koe e ahau hei maunga kua oti te tahu.
26
E kore tetahi kohatu e tangohia mai i a koe mo te kokonga, tetahi kohatu ranei hei turanga; engari mo te kahore noa iho koe, a ake, ake, ake, e ai ta Ihowa.
27
Whakaarahia te kara ki te whenua, whakatangihia te tētere i roto i nga iwi, kia rite mai nga iwi hei whawhai ki a ia, karangarangatia ki a ia nga kingitanga o Ararata, o Mini, o Ahakenaha: whakaritea he rangatira mona, meinga nga hoiho kia haere mai, ano he tatarakihi huruhuru.
28
Kia rite mai nga iwi, nga kingi ano hoki o nga Meri, hei whawhai ki a ia, o ratou rangatira, o ratou ariki, me te whenua katoa ano o tona kingitanga.
29
Ka wiri ano hoki te whenua, ka mamae; no te mea ka rite nga whakaaro katoa a Ihowa mo Papurona, ka meinga te whenua o Papurona hei ururua, tē ai he tangata hei noho.
30
Ka mutu te whawhai a nga marohirohi o Papurona; kei te noho ratou i roto i o ratou pourewa, kua kore to ratou kaha, kua rite ratou ki nga wahine: kua wera o reira nohoanga, kua whati o reira tutaki.
31
Kei te rere, tutaki pu tetahi kai korero ki tetahi kai korero, tutaki pu tetahi kai whakaatu ki tetahi kai whakaatu, hei whakaatu ki te kingi o Papurona kua horo tona pa i te pito.
32
Kua riro ano hoki nga whitinga, kua wera nga kakaho i te ahi, kua wehi noa iho nga tangata whawhai.
33
No te mea ko te kupu tenei a Ihowa o nga mano, Atua o Iharaira, E rite ana te tamahine a Papurona ki te patunga witi, ko te wa tenei e patua ai; kia iti ake te wahi, a ka taea te wa o tona kotinga witi.
34
Na Nepukararetara kingi o Papurona ahau i kai; mongamonga noa ahau i a ia, kua oti ahau te mea e ia hei oko takoto kau, horomia ake ahau e ia, rite tonu tana ki ta te tarakona; whakakīa ana e ia tona kopu ki aku mea ahuareka, peia ana ahau e ia.
35
Hei runga i Papurona te tukinotanga ki a au, ki oku kikokiko ano hoki, e ai ta te wahine o Hiona, hei runga i nga tangata o Karari oku toto, e ai ta Hiruharama.
36
Na, ko te kupu tenei a Ihowa, Tenei au te tohe nei i to tohe, te rapu nei i nga utu mou; ka maroke ano i a au tona moana, ka mimiti ona puna.
37
A ka waiho a Papurona hei puranga, hei nohoanga mo nga tarakona, hei miharotanga, hei whakahīnga atu, tē ai he tangata hei noho.
38
Ka hamama ngatahi ratou, ano he raiona, ano he kuao raiona, ratou e ngangara ana.
39
I to ratou weraweratanga ka takā e ahau nga hakari ma ratou, kia whakahaurangitia ano ratou e ahau, whakamanamana tonu iho ratou, moe tonu iho, he moe au tonu; e kore ano ratou e maranga, e ai ta Ihowa.
40
Ka riro iho ratou i a au ki raro, ano he reme e patua ana; ano he hipi toa i huihuia atu ki nga koati toa.
41
Taukiri e, kua horo a Hehaka! kua riro te whakamoemititanga o te whenua katoa. Taukiri e, kua waiho a Papurona hei miharotanga i roto i nga iwi!
42
Kua puta ake te moana ki Papurona, kua taupokina ia e ona ngaru maha.
43
Kua moti ona pa, he whenua wai-kore, he ururua, he whenua e kore e nohoia e tetahi tangata, e kore ano tetahi tama a te tangata e tika na reira.
44
Ka whiua ano e ahau a Pere i Papurona, ka whakaputaina mai ano e ahau i roto i tona mangai te mea i horomia e ia, e kore ano nga iwi e rere a wai mai ki a ia a mua, ka hinga ano hoki te taiepa o Papurona.
45
Puta mai, e toku iwi, i roto i a ia, kia kahakina atu koutou e tera tangata, e tera tangata, kei mate i te muranga o ta Ihowa riri.
46
Kei hopī ano hoki o koutou ngakau, kaua e wehi, ki te rongo ka rangona nei ki te whenua; no te mea ka tae mai he rongo i tetahi tau, a i muri i tena ko tetahi rongo i tetahi atu tau, me te tukino ano i te whenua, he rangatira e whakatika mai ana ki te rangatira.
47
Na, kei te haere mai nga ra e whiua ai e ahau nga whakapakoko o Papurona; a ka whakama katoa tona whenua, ka hinga ano hoki ona tupapaku i roto i a ia.
48
A ka waiata te rangi, te whenua, me nga mea katoa i reira ki Papurona: no te mea ka haere mai nga kai pahua i te nota ki a ia, e ai ta Ihowa.
49
Na Papurona hoki i mea nga tupapaku o Iharaira kia hinga, waihoki ka hinga ano ki Papurona nga tupapaku o te whenua katoa.
50
E te hunga kua mawhiti atu i te hoari, haere atu, kaua e tu: mahara ki a Ihowa i tawhiti; kia puta ake ano hoki a Hiruharama ki o koutou ngakau.
51
Porahurahu kau ana matou, mo matou i rongo i te tawai; kua taupokina o matou mata e te whakama: no te mea kua tae atu nga tautangata ki nga wahi tapu o te whare o Ihowa.
52
Mo reira kei te haere mai nga ra, e ai ta Ihowa, e whiua ai e ahau ona whakapakoko, a i tona whenua katoa ka aue te hunga i werohia.
53
Ahakoa i kake atu a Papurona ki runga ki te rangi, ahakoa i hangā e ia tona wahi tiketike kaha kia u rawa, e tae atu ano i a au nga kai pahua ki a ia, e ai ta Ihowa.
54
He reo te hamama mai nei i Papurona, he wawahanga nui kei te whenua o nga Karari:
55
No te mea kua oti a Papurona te pahua e Ihowa, kua whakakorea ano e ia te nge nui; ka hamama o ratou ngaru, ano he wai nui, ka puta te haruru o to ratou reo:
56
Kua tae mai nei hoki te kai pahua ki a ia, ki Papurona, kua mau ano hoki ona marohirohi, whati katoa a ratou kopere: no te mea ka tino takoto rawa te utu a Ihowa, a te Atua o te whakahoki utu.
57
Ka whakahaurangitia ano e ahau ona rangatira, ona mea whakaaro nui, ona ariki, ona kawana, ona marohirohi, a ka moe ratou, he moe au tonu, e kore ano e maranga, e ai ta te Kingi, tona ingoa nei, ko Ihowa o nga mano.
58
Ko te kupu tenei a Ihowa o nga mano, Ka tino pakaru rawa nga taiepa wharahi o Papurona, ka wera ano hoki ona kuwaha tiketike i te ahi; ka mauiui kau noa iho ano hoki nga iwi, nga tangata ano i roto i te ahi, ruha noa iho.
59
Te kupu i whakahaua e Heremaia poropiti ki a Heraia tama a Neria tama a Mahaheia i to raua haerenga tahitanga atu ko Terekia kingi o Hura ki Papurona i te wha o nga tau o tona kingitanga. He rangatira ata noho ano a Heraia.
60
Na, tuhituhia iho e Heremaia ki te pukapuka te kino katoa meake puta mai ki Papurona, enei kupu katoa kua tuhituhia nei mo Papurona.
61
I mea ano a Heremaia ki a Heraia, E tae koe ki Papurona, a ka kite, ka korero i enei kupu katoa;
62
Katahi koe ka ki ake, E Ihowa, kua korerotia tenei wahi e koe kia hatepea atu, kia kaua hoki tetahi e noho ki konei, tetahi tangata, tetahi kararehe; engari me waiho tonu hei ururua.
63
Na, ka poto tenei pukapuka te korero e koe, herea iho tetahi kohatu, ka makā atu ki waenganui o Uparati.
64
Mea atu hoki, Ka rite ki tenei te totohutanga o Papurona, e kore ano e puea i roto i te kino e takina mai e ahau ki runga ki a ia: a ka ruha ratou. I mutu ki konei nga kupu a Heremaia.