Joshua Chapter 3 - Paipera Tapu 1868 | Te Paipera Tapu 1868

Joshua Chapter 3 - Paipera Tapu 1868

1
Na, ka maranga wawe a Hohua i te ata; a ka turia mai e ratou i Hitimi, ka tae mai hoki ki Horano, a ia me nga tamariki katoa a Iharaira, a moe ana ratou ki reira, i te mea kiano i whiti noa.
2
A, no te mutunga o nga ra e toru, na, ka haere atu nga rangatira na waenganui o te ope;
3
Ka whakahau ano i te iwi, ka mea, E kite koutou i te aaka o te kawenata a Ihowa a to koutou Atua, me nga tohunga me nga Riwaiti e amo ana, hei kona ka whakatika atu koutou i o koutou nohoanga, ka haere atu hoki i muri.
4
Otiia kia whai takiwa ki waenganui o koutou o tena mea; kia rua mano whatianga, he mea whangāngā marie: kaua e whakatata atu ki tena mea, kia mohio ai koutou ki te huarahi e haere ai koutou: kahore nei hoki koutou i haere i tena huarahi i mua ake nei.
5
A i mea ano a Hohua ki te iwi, Whakatapua koutou: apopo hoki a Ihowa mahi ai i nga mea whakamiharo ki waenganui i a koutou.
6
A, i korero ano a Hohua ki nga tohunga, i mea, Hapainga ake te aaka o te kawenata, haere atu hoki i mua i te iwi. A hapainga ake ana e ratou te aaka o te kawenata, a haere ana i mua i te iwi.
7
A i mea ano a Ihowa ki a Hohua, Ko aianei ahau timata ai te whakanui i a koe ki te aroaro o Iharaira katoa, kia mohio ai ratou, na, i a Mohi ahau, ka pera ano ahau ki a koe.
8
A mau e whakahau nga tohunga e amo ana i te aaka o te kawenata, e mea, E tae koutou ki te taha o te wai o Horano, me tu i roto i Horano.
9
Na, ka mea atu a Hohua ki nga tamariki a Iharaira, Haere mai nei, whakarongo ki nga kupu a Ihowa a to koutou Atua.
10
Na, ka mea a Hohua, Ma konei koutou ka mohio ai kei roto i a koutou te Atua ora, ka panā rawatia e ia i to koutou aroaro nga Kanaani, nga Hiti, nga Hiwi, nga Perihi, nga Kirekahi, nga Amori, me nga Iepuhi.
11
Na, ko te aaka o te kawenata o te Ariki o te ao katoa te haere nei i mua i a koutou ki Horano.
12
Na, motuhaketia mai ki a koutou kia tekau ma rua nga tangata o nga iwi o Iharaira, kia kotahi te tangata o tenei iwi o tenei iwi.
13
A, ka tatu iho ki nga wai o Horano nga kapu o nga waewae o nga tohunga e amo ana i te aaka o Ihowa o te Ariki o te ao katoa, na, ka motuhia atu nga wai o Horano, nga wai e rere mai ana i runga; a ka tu ake, kotahi ano puranga.
14
A, te haerenga atu o te iwi i o ratou teneti, ki te whakawhiti i Horano, me nga tohunga hoki e amo ana i te aaka o te kawenata i mua i te iwi;
15
A, te taenga atu o nga kai amo i te aaka ki Horano, te tukunga atu hoki o nga waewae o nga tohunga e amo ana i te aaka ki te taha o te wai, (e ngawha ana hoki a Horano ki runga i ona pareparenga katoa i nga ra katoa o te kotinga,)
16
Ko te tino turanga o nga wai e rere iho ana i runga, ara ake ana kotahi ano puranga, i tawhiti noa atu i te pa i Arama, i te taha o Haretana: a ko nga wai e rere iho ana ki te moana o te mania, ki te moana tote, mimiti ake, motu ke atu ana: a whiti atu ana te iwi i te ritenga atu o Heriko.
17
A tu marie ana nga tohunga, i amo nei i te aaka o te kawenata a Ihowa, i te wahi maroke i waenganui o Horano, me te haere ano a Iharaira katoa ki tera taha na te wahi maroke, a, poto noa te iwi katoa te whiti i Horano.