- 1
- I aua ra kahore o Iharaira kingi, i aua ra ano hoki e rapu ana te iwi o nga Rani i tetahi kāinga mo ratou hei nohoanga; kihai hoki tetahi kāinga tupu i taka mai mo ratou i roto i nga iwi o Iharaira, a tae noa iho ki taua ra.
- 2
- Katahi ka tono nga tamariki a Rana i etahi tangata tokorima o to ratou hapu, he hunga maia, i roto i o ratou rohe, i Toraha, i Ehetaoro, hei tutei i te whenua, hei titiro hoki: i mea hoki ki a ratou, Tikina, tirohia te whenua. Na, to ratou taenga mai ki Maunga Eperaima, ki te whare o Mika, noho ana i reira.
- 3
- I a ratou i te whare o Mika, ka mohiotia e ratou te reo o taua taitamariki o te Riwaiti: na, peka ana ki reira, a ka mea ki a ia, Na wai koe i kawe mai ki konei? e aha ana hoki koe i konei? he aha hoki tau i konei?
- 4
- Na, ko tana meatanga mai ki a ratou, Ko nga mea tenei i meatia e Mika ki a au; nāna hoki ahau i utu, a hei tohunga ahau ki a ia.
- 5
- Katahi ratou ka mea ki a ia, Tena, ui atu ki te Atua kia mohio ai matou ka tika ranei ta matou huarahi e haere nei matou.
- 6
- Na, ko te meatanga mai a te tohunga ki a ratou, Haere marie, kei te aroaro o Ihowa to koutou ara e haere na koutou.
- 7
- Katahi ka haere aua tangata tokorima, ka tae atu ki Raihi, a ka kite i nga tangata o roto e noho hu ana, e rite ana ki nga Haironi, tē ai he whakaoho, tē ai he wehi, kahore hoki o te whenua kai pehi e whakama ai ratou ki tetahi mea, e matara mai ana hoki ratou i nga Haironi, kahore hoki a ratou meatanga ki tetahi tangata.
- 8
- A, to ratou taenga mai ki o ratou tuakana ki Toraha, ki Ehetaoro: na, ka mea o ratou tuakana ki a ratou, Pehea ana ta koutou?
- 9
- Katahi ratou ka mea atu, Whakatika, kia whakaekea ratou e tatou; kua kite hoki matou i te whenua, a he pai whakaharahara; a me ata noho ano ranei koutou? kaua ra e mangere, whakatika, haere ki te tango i tera whenua:
- 10
- Ka haere koutou, he iwi e noho hu ana hei taenga atu mo koutou, he whenua whanui hoki; kua homai nei hoki e te Atua ki o koutou ringa he wahi kahore nei e hapa i tetahi mea o te whenua.
- 11
- Na, turia atu ana i reira o te hapu o nga Rani, i roto i Toraha, i Ehetaoro, e ono rau tāngata, whitiki rawa nga mea mo te whawhai.
- 12
- Na, ka haere ratou, ka noho ki Kiriata-tearimi, ki Hura; koia i karangatia ai te ingoa o tera wahi, Ko Mahane-rana, a mohoa noa nei: koia tena i tua atu o Kiriata-tearimi.
- 13
- I haere atu ano ratou i reira ki Maunga Eperaima, a tae noa ki te whare o Mika.
- 14
- Na, ko te ohonga mai o nga tangata tokorima i haere nei ki te tutei i te whenua o Raihi, ka mea ki o ratou tuakana, E mohio ana ranei koutou kei enei whare he epora, he terapimi, he whakapakoko, he mea whaowhao, he mea whakarewa? na, ma koutou te whakaaro ki ta koutou e mea ai.
- 15
- Katahi ratou ka peke atu ki reira, a ka tae ki te whare o taua taitamariki o te Riwaiti, ki te whare o Mika, a owha atu ana ki a ia.
- 16
- A tu tonu i te kuwaha o te keti nga tangata e ono rau o nga tamariki a Rana; whitiki tonu hoki a ratou mea mo te whawhai.
- 17
- Na, haere atu ana nga tangata tokorima i haere nei ki te tutei i te whenua. Kua tae ki reira; kei te tango i te whakapakoko, i te epora, i nga terapimi, i te mea hoki i whakarewaia: i te tu hoki te tohunga i te kuwaha o te keti ratou ko nga tangata e ono rau, a ratou mea mo te whawhai, whitiki tonu.
- 18
- Na, ko te haerenga o ena ki te whare o Mika; kei te tango i te whakapakoko, i te epora, i nga terapimi, i te mea hoki i whakarewaia. Na, ka mea te tohunga ki a ratou, E aha ana koutou?
- 19
- Ano ra ko ratou ki a ia, Whakarongoa, kopania atu tou ringa ki tou mangai, a haere mai tatou; hei matua hoki koe mo matou, hei tohunga. Ko tehea te mea pai? kia waiho koe hei tohunga mo te whare o te tangata kotahi, kia waiho ranei hei tohunga mo tetahi iwi, mo tetahi hapu hoki o Iharaira?
- 20
- A pai tonu te ngakau o te tohunga. Na, ka mau ia ki te epora, ki nga terapimi, ki te whakapakoko, a haere ana i roto i taua hunga.
- 21
- Katahi ratou ka tahuri, ka haere; a makā ana e ratou nga tamariki, nga kararehe, me nga mea taimaha ki mua i a ratou.
- 22
- Ka matara mai ratou i te whare o Mika, na, ka huihuia nga tangata o nga whare i tata ki te whare o Mika, a ka mau i a ratou nga tamariki a Rana.
- 23
- A ta ratou karangatanga mai ki nga tamariki a Rana, na, ka tahuri o ratou aroaro, a ka mea ki a Mika, He aha kei a koe i huihui tangata mai ai koe?
- 24
- Na, ko tana meatanga atu, Kua tangohia atu e koutou aku atua i hanga ai, me te tohunga, a haere ana; a he aha ake taku inaianei? he aha hoki tena i kiia mai na e koutou ki a au, He aha kei a koe?
- 25
- Katahi ka mea atu nga tamariki a Rana ki a ia, Kei rangona tou reo e matou, kei torere atu ki a koe te hunga ngakau aritarita, a ka riro koutou ko tou whare i te matemate.
- 26
- Heoi haere ana nga tamariki a Rana i ta ratou ara, a, te kitenga o Mika e kaha ana ratou i a ia, na, ka tahuri ia, a hoki ana ki tona whare.
- 27
- Heoi maua atu ana e ratou nga mea i hangā e Mika, me te tohunga i noho ki a ia, a haere ana ki Raihi, ki tetahi iwi e noho hu ana, kahore ona whakaohooho; na, patua iho e ratou ki te mata o te hoari, tahuna ake hoki te pa ki te ahi.
- 28
- Kahore ano hoki he tangata hei whakaora; no te mea i matara mai a reira i Hairona, kahore ano hoki a ratou meatanga ki tetahi tangata, na, i te raorao a reira, i Pete-rehopo. Heoi hangā ana e ratou te pa, a noho ana i reira.
- 29
- A huaina ana e ratou te ingoa o tena pa ko Rana, ko te ingoa o to ratou matua o Rana; he uri ia no Iharaira: ko Raihi ia te ingoa o tera pa i mua.
- 30
- Katahi ka whakaturia to ratou whakapakoko e nga tamariki a Rana, a ko Honatana tama a Kerehoma, tama a Manahe, te tohunga, ratou ko ana tamariki, mo te iwi o nga Rani, a, tae noa ki te ra i whakaraua ai te whenua.
- 31
- A tu tonu ta ratou whakapakoko, ta Mika i hanga ai, i nga ra katoa o te whare o te Atua i Hiro.
Address: 
Phone: 
Email: