- 1
- A i korero mai ano a Ihowa ki a Mohi raua ko Arona, i mea ki a raua,
- 2
- Korero atu ki nga tamariki a Iharaira, mea atu, Ko nga kirehe enei e kainga e koutou o nga kararehe katoa i runga i te whenua.
- 3
- Ko nga mea katoa i roto i nga kararehe e tararua ana te matimati, e tino mawehe ana hoki te titorehanga, a e whakahoki ake ana i te kai ko tena ta koutou e kai ai.
- 4
- Otiia kaua e kainga enei o nga mea e whakahoki ake ana i te kai, o nga mea hoki e tararua ana te matimati, ko te kamera, no te mea e whakahoki ake ana ano ia i te kai, otiia kahore i tararua te matimati; hei mea poke tena ki a koutou.
- 5
- Me te hawhana, no te mea e whakahoki ake ana ano ia i te kai, otiia kahore i tararua te matimati; hei mea poke ia ki a koutou.
- 6
- Me te hea, no te mea e whakahoki ake ana ano ia i te kai, otiia kahore i tararua te matimati; hei mea poke ia ki a koutou.
- 7
- Me te poaka, ahakoa e tararua ana tona matimati, a e tino mawehe ana te titorehanga, kahore e whakahokia ake te kai; hei mea poke ia ki a koutou.
- 8
- Kaua e kainga tetahi wahi o o ratou kikokiko, kaua ano hoki e pa atu ki o ratou tinana mate; hei mea poke ena ki a koutou.
- 9
- Ko enei a koutou e kai ai o nga mea katoa o roto o nga wai: ko nga mea katoa o nga wai, o nga moana, o nga awa, he tara o ratou, he unahi, ko ena a koutou e kai ai.
- 10
- A ko nga mea katoa, kahore he tara, kahore he unahi, o nga moana, o nga awa, o roto o nga mea katoa e tere ana i nga wai, o nga mea ora katoa o nga wai; hei mea whakarihariha ena ki a koutou:
- 11
- Ina, hei mea whakarihariha ano ena ki a koutou: kei kainga tetahi wahi o o ratou kikokiko e koutou; engari me whakarihariha atu ki o ratou tinana mate.
- 12
- Ko nga mea katoa o nga wai kahore he tara, kahore he unahi, hei mea whakarihariha ena ki a koutou.
- 13
- A ko enei o nga manu a koutou e whakarihariha ai; e kore e kainga, me whakarihariha atu: ko te ekara, ko te wawahi-iwi, ko te ahipare,
- 14
- Ko te whatura, ko te kaiaia, me nga mea pera;
- 15
- Ko nga raweni katoa, me nga mea pera:
- 16
- Me te ruru, me te kāhupo, me te kuko, me te kāhu, me nga mea pera,
- 17
- Me te ruru nohinohi, me te kawau, me te ruru nui,
- 18
- Me te wani, me te perikana, me te kia-ekara.
- 19
- Me te taaka, me te heroni, me nga mea pera, me te rapiwingi, me te pekapeka.
- 20
- Ko nga mea ngokingoki katoa e rere a manu ana, e wha nga waewae hei haere, me whakarihariha atu e koutou.
- 21
- Otiia me kai ano enei e koutou o nga mea ngokingoki katoa e rere a manu ana, e wha nei nga waewae hei haere, a he waewae ano o ratou kei runga ake i etahi waewae, hei mokowhiti i runga i te whenua;
- 22
- Ko enei o ratou e kainga e koutou; ko te mawhitiwhiti, me nga mea e rite ana ki a ia, me te tatarakihi, me nga mea e rite ana ki a ia, me te rokuta, me nga mea e rite ana ki a ia, me te koeke, me nga mea e rite ana ki a ia.
- 23
- Ko nga mea ngokingoki ke atu ia, nga mea rere a manu, e wha nei o ratou waewae, me whakarihariha atu e koutou.
- 24
- He mea hoki enei e poke ai koutou: ki te pa tetahi ki o ratou tinana mate, ka poke, a, ahiahi noa.
- 25
- A ki te mauria e te tangata tetahi wahi o o ratou tinana mate, me horoi e ia ona kakahu, ka poke hoki ia, a, ahiahi noa.
- 26
- Ko nga tinana mate o nga kararehe katoa e tararua ana te matimati, a kahore ano i tino mawehe te titorehanga, kahore ranei e whakahoki ake i te kai, hei mea poke ki a koutou: ka poke nga tangata katoa e pa ana ki a ratou.
- 27
- A ko nga mea katoa he mea tuaringaringa nei nga waewae e haere ai ratou, o roto o nga kirehe katoa e wha nei nga waewae hei haere, hei mea poke ena ki a koutou: ki te pa tetahi ki o ratou tinana mate, ka poke ia, a, ahiahi noa.
- 28
- A ki te mauria e tetahi te tinana mate o tetahi o ratou, me horoi e ia ona kakahu, ka poke hoki ia, a, ahiahi noa: kia poke ena ki a koutou.
- 29
- Ka poke ano hoki enei ki a koutou o nga mea ngokingoki katoa e ngokingoki ana i runga i te whenua; ko te witere, ko te kiore, me te tatiha, me nga mea e rite ana ki a ia,
- 30
- Me te wherete, me te kamereona, me te mokomoko, me te moeone, me te mooro.
- 31
- Kia poke enei ki a koutou o nga mea ngokingoki katoa: ki te pa atu tetahi ki a ratou, ina mate, ka poka ia, a, ahiahi noa.
- 32
- A ki te taka tetahi o ratou, ina mate, ki runga ki tetahi mea, ka poke taua mea; ahakoa he oko rakau, he mea kakahu, hiako ranei, pēke ranei; ahakoa he oko aha ranei aha ranei e meatia ai tetahi mea, me maka ki te wai, a ka poke, ia, a, ahiahi noa; katahi ka kore te poke.
- 33
- A ki te taka tetahi o ratou ki roto ki tetahi oko oneone, ahakoa he aha ranei he aha ranei kei roto, kua poke; a me wahi.
- 34
- Ki te maringi taua wai ki runga ki tetahi o nga kai e kainga ana, ka poke: ka poke ano hoki nga wai katoa e inumia ana i roto i aua oko katoa.
- 35
- Ka poke ano hoki nga mea katoa kua taka nei tetahi wahi o o ratou tinana mate ki runga: ahakoa oumu, turanga kohua ranei, me wahi iho: he mea poke hoki, a ka poke ano ki a koutou.
- 36
- Otiia, ki te mea he puna he poka ranei, e nui nei te wai, kahore ona poke: ki te pa ia tetahi ki o ratou tinana mate, ka poke.
- 37
- Ki te taka ano hoki tetahi wahi o o ratou tinana mate ki runga ki nga purapura e whakatokia ana, ekore e poke.
- 38
- Otiia ki te mea kua oti te purapura te mea ki te wai, a ka taka tetahi wahi o o ratou tinana mate ki runga, ka poke ena ki a koutou.
- 39
- A ki te mate maori tetahi o nga kararehe e kainga ana e koutou; ki te pa tetahi ki tona tinana mate, ka poke ia, a, ahiahi noa.
- 40
- A ki te kai tetahi i tetahi wahi o tona tinana, me horoi e ia ona kakahu, ka poke hoki ia, a, ahiahi noa; ki te mauria hoki e tetahi tona tinana, me horoi e ia ona kakahu, ka poke hoki ia, a, ahiahi noa.
- 41
- Hei mea whakarihariha ano hoki nga mea ngokingoki katoa e ngokingoki ana i runga i te whenua; e kore e kainga.
- 42
- Ko nga mea katoa ko te kopu hei haere, me nga mea e wha nga waewae hei haere, me nga mea he maha atu nga waewae, i roto i nga mea ngokingoki katoa e ngokingoki nei i runga i te whenua, kaua ena e kainga; he mea whakarihariha hoki.
- 43
- Kei waiho tetahi mea ngokingoki, e ngokingoki nei, hei mea e whakariharihangia ai koutou, hei mea ranei e poke ai, e noa ai.
- 44
- No te mea hoki ko Ihowa ahau ko to koutou Atua; mo reira me whakatapu koutou e koutou, a ka tapu; e tapu ana hoki ahau: kaua ano hoki e whakapokea koutou ki tetahi mea ngokingoki e ngokingoki ana i runga i te whenua.
- 45
- Ko ahau hoki a Ihowa nana koutou i kawe mai i te whenua o Ihipa, kia waiho ai ahau hei Atua mo koutou: mo reira ka tapu koutou, e tapu ana hoki ahau.
- 46
- Ko te ture tenei mo nga kararehe, mo te manu, mo nga mea ora katoa e tere ana i nga wai, mo nga mea katoa hoki e ngokingoki ana i runga i te whenua:
- 47
- Kia wehea ai te poke me te pokekore, te kararehe e kainga, me te kararehe e kore e kainga.
Address: 
Phone: 
Email: