- 1
- Na, he tokomaha kua anga nei ki te whakahaere i te korero o nga mea kua tino whakaaetia nei i roto i a tatou,
- 2
- He mea whakarite tonu ki nga tukunga mai ki ā tatou a nga kai titiro, ā nga kai mahi i te kupu, o te timatanga iho ano;
- 3
- Koia ahau i mea ai kia ata whakatakina iho nga mea katoa i nga take mai ano, a kia tuhituhi whakatepe atu ki a koe, e Tiopira, e te tangata pai rawa,
- 4
- Kia mātau ai koe ki te tūturutanga o nga mea i whakaakona ai koe.
- 5
- No mua, no nga ra o Herora kingi o Huria, tetahi tohunga, ko Hakaraia te ingoa, no te wiki o Apia: ko tana wahine hoki no nga tamahine a Arona, tona ingoa ko Erihapeti.
- 6
- A he hunga tika raua i te aroaro o te Atua, kahore he hē o ta raua haere i runga i nga kupu ako katoa me nga tikanga a te Ariki.
- 7
- Na, kahore ā raua tamariki, he pākoko hoki a Erihapeti, a kua maha haere nga ra o tetahi o tetahi.
- 8
- A kei nga mahi tohunga ia i te aroaro o te Atua i te takanga mai o tana wiki,
- 9
- E whakarite ana i nga ritenga a nga tohunga; ka taka mai mana te haere ki roto ki te whare tapu o te Ariki, tahu ai i te whakakakara.
- 10
- Na, i waho te nuinga katoa o te iwi e karakia ana, i te haora o te tahunga i te whakakakara.
- 11
- A ka kitea e ia tetahi anahera a te Ariki, e tu ana ki matau o te āta whakakakara.
- 12
- Na, ka ohorere a Hakaraia i tona kitenga ai, a tau ana te wehi ki a ia.
- 13
- Na, ka mea mai te anahera ki a ia, Kaua e mataku, e Hakaraia: kua rangona hoki to inoi; a ka whanau ta korua tamaiti ko tāu wahine ko Erihapeti; me hua ano hoki e koe tona ingoa ko Hoani.
- 14
- A ka hari, ka whakamanamana koe; he tokomaha hoki e hari ki tona whanautanga.
- 15
- E nui hoki ia ki te aroaro o te Ariki; kaua ano hoki ia e inu i te waina, i te wai whakahaurangi ranei; a ka kī ano ia i te Wairua Tapu, no te kopu mai ano o tona whaea.
- 16
- He tokomaha ano hoki o nga tamariki a Iharaira ka whakatahuritia e ia ki te Ariki ki to ratou Atua.
- 17
- A ka haere ano ia i tona aroaro i runga i te wairua i te mana o Iraia, hei whakatahuri i nga ngakau o nga mātua ki nga tamariki, i te hunga turi ki nga whakaaro o te hunga tika; kia rite ai i a ia he hunga e ata rite ana mo te Ariki.
- 18
- Na, ko te meatanga atu a Hakaraia ki te anahera, Ma te aha ka mātau ai ahau ki tenei mea? he koroheke nei hoki ahau, kua maha haere hoki nga ra o taku wahine.
- 19
- Na, ka whakahokia mai e te anahera, ka mea ki a ia, Ko Kapariera ahau, kei te aroaro o te Atua toku turanga; a kua tonoa mai nei ahau ki te korero ki a koe, ki te whakapuaki i tenei rongo pai ki a koe.
- 20
- Nana, ka reo-koretia koe, e kore ano hoki e taea te whakapuaki kupu, kia tae mai ra ano te ra e meatia ai enei mea, mou kihai i whakapono ki aku kupu, ka mana nei i te wa e rite ai.
- 21
- A tatari tonu te iwi ki a Hakaraia, me te miharo ano ki tona roa ki roto ki te whare tapu.
- 22
- A, tona putanga mai, kihai ia i ahei te korero ki a ratou: a ka mahara ratou, kua kite ia i tetahi putanga atua i roto i te whare tapu: na, ka tungou ia ki a ratou, a mau tonu iho tona wahangu.
- 23
- A ka rite nga ra hei minitatanga māna, ka hoki atu ia ki tona whare.
- 24
- Na, muri iho i aua ra ka hapū tana wahine a Erihapeti, a e rima nga marama i whakangaro ai ia i a ia, i mea ia,
- 25
- Ko ta te Ariki tenei i mea ai ki a au, i nga ra i titiro mai ai ia, ki te whakamutu i toku tawainga i roto i nga tāngata.
- 26
- Na, i te ono o nga marama ka tonoa a Kapariera te anahera e te Atua ki tetahi pa o Kariri, ko Nahareta te ingoa,
- 27
- Ki tetahi wahina i taumautia ma tetahi tangata ko Hohepa te ingoa, no te whare o Rawiri; te ingoa o te wahina ko Meri.
- 28
- Na, te haerenga o te anahera ki roto ki a ia, ka mea mai, Tena koe, e te wahine kua manakohia nei; kei a koe te Ariki: ko koe te manaakitia i roto i nga wāhine.
- 29
- A, tona kitenga i a ia, ka oho ki tana kupu, ka whakaaroaro ki te tikanga o tenei ohatanga.
- 30
- Na, ka mea te anahera ki a ia, Kei mataku koe, e Meri: kua paingia hoki koe e te Atua.
- 31
- Na, ka hapū tena koe, a ka whanau he tamaiti, a me hua tona ingoa ko IHU.
- 32
- Ka nui ia, ka karangatia hoki ko te Tama a te Runga Rawa: a ka hoatu ki a ia e te Ariki e te Atua te torona o Rawiri o tona pāpā:
- 33
- A hei kingi ia mo te whare o Hakopa ake ake ake; e kore ano hoki e mutu tona rangatiratanga.
- 34
- Na, ka mea a Meri ki te anahera, E peheatia tenei, kahore nei hoki ahau e mohio ki te tāne?
- 35
- Na, ka whakahokia mai e te anahera, a ka mea ki a ia, Ka tae mai te Wairua Tapu ki runga ki a koe, a ka taumarumaru iho te kaha o te Runga Rawa ki runga ki a koe: mo reira ano hoki ka karangatia tou whanau tapu, Ko te Tama a te Atua.
- 36
- Na, kua hapū ano hoki tena a Erihapeti tou teina he tamaiti, i tona ruruhitanga; a ko te ono tenei o nga marama ona i karangatia nei he pākoko.
- 37
- Kahore hoki he mea e kore te taea e te Atua.
- 38
- Ano ra ko Meri, Na, ko te pononga a te Ariki; kia peratia ano ahau me tau i korero ai. A mawehe atu ana te anahera i a ia.
- 39
- Na, ka whakatika a Meri i aua ra, a haere kaika ana ki te whenua pukepuke, ki tetahi pa o Hura;
- 40
- A ka tomo atu ki te whare o Hakaraia, ka oha atu ki a Erihapeti.
- 41
- A, te rongonga o Erihapeti i te ohatanga a Meri, ka oho te tamaiti i roto i tona kopū: na, kua kī a Erihapeti i te Wairua Tapu;
- 42
- A he nui tona reo ki te karanga, ka mea, Ka manaakitia koe i roto i nga wāhine, ka manaakitia ano hoki te hua o tou kopū.
- 43
- No hea hoki tenei ki a au, kia haere mai te whaea o taku Ariki ki a au?
- 44
- Na, pa kau mai te reo o to ohatanga ki oku taringa, ka oho te tamaiti i taku kopū i te hari.
- 45
- A ka koa ano ia e whakapono ana: ka whakaritea hoki nga mea i korerotia ki a ia e te Ariki.
- 46
- Ka mea a Meri, Ka whakanui toku wairua i te Ariki,
- 47
- A e hari ana toku wairua ki te Atua ki toku Kai whakaora;
- 48
- Mona i titiro ki te iti o tana pononga: ta te mea hoki katahi ahau ka kiia e nga whakatupuranga katoa e haere ake nei, he wahine hari.
- 49
- He nui hoki nga mahi a te Mea Kaha ki ahau; a e tapu ana tona ingoa.
- 50
- He mahi tohu tana ki te hunga e wehi ana ki a ia, ki tenei whakatupuranga ki tenei whakatupuranga.
- 51
- Kua whakaputaina he kaha e ia, ara, e tona ringaringa; nāna te hunga whakakake i marara ai i te whakaaro o o ratou ngakau.
- 52
- Kua whakatakā e ia te hunga kaha i nga nohoanga, a whakateiteitia ake ana te hunga iti.
- 53
- Kua whakakiia e ia te hunga mate hiakai ki nga mea pai; a tonoa kautia atu ana te hunga taonga.
- 54
- Kua tautokona e ia a Iharaira tana pononga, he whakamaharatanga hoki ki tana mahi tohu;
- 55
- Ki a Aperahama, ratou ko tona whanau ake tonu atu, pera hoki me tana i korero ai ki o tatou mātua.
- 56
- A tata tonu ki te toru o nga marama i noho ai a Meri ki a ia, a hoki ana ki tona whare.
- 57
- A ka rite te taima o Erihapeti e whanau ai; na, ka whanau he tamaiti.
- 58
- A, te rongonga o te hunga e noho tata ana, me ona whanaunga, kua whakanuia e te Ariki tona aroha ki a ia; na, ka hari tahi me ia.
- 59
- A i te waru o nga ra ka haere mai ratou ki te kokoti i te tamaiti; a huaina ana e ratou, ko Hakaraia, ko te ingoa hoki o tona pāpā.
- 60
- Na, ka whakahokia mai e tona whaea, ka mea, Kahore; engari me hua ia ko Hoani.
- 61
- Na, ko ta ratou meatanga ki a ia, Ara, kahore tenei ingoa i huaina ki tetahi o ou whanaunga.
- 62
- Na, ka tungou ratou ki tona pāpā, ko wai tana e pai ai kia huaina ki a ia.
- 63
- A ka mea ia ki tetahi papa tuhituhi, a ka tuhituhi, ka mea, Ko Hoani hei ingoa mona. A miharo ana ratou katoa.
- 64
- Na, ka whai reo tonu iho tona mangai, me tona arero, a ka korero ia, ka whakapai atu ki te Atua.
- 65
- A tau ana te wehi ki te hunga katoa e noho tata ana ki a ratou: a ka korerotia enei mea katoa puta noa i te whenua pukepuke katoa o Huria.
- 66
- Na, ka rongoatia enei mea ki roto ki o ratou ngakau e te hunga katoa i rangona ai, ka mea, He tamaiti aha ianei tenei! I a ia ano hoki te ringaringa o te Ariki.
- 67
- Na, kua kī a Hakaraia tona pāpā i te Wairua Tapu, a ka poropiti, ka mea,
- 68
- Kia whakapaingia te Ariki te Atua o Iharaira; kua titiro mai hoki ia, kua hoko i tona iwi,
- 69
- A kua whakaarahia ake e ia he haona whakaora mo tatou, i roto i te whare o Rawiri o tana pononga;
- 70
- Ko tana hoki ia i korerotia e te mangai o ana poropiti tapu, no te timatanga iho ano o te ao:
- 71
- Hei whakaora i a tatou i o tatou hoa whawai, i te ringaringa ano hoki o te hunga katoa e kino ana ki a tatou;
- 72
- Hei whakaputanga mo te mahi tohu ki o tatou tupuna, hei whakamaharatanga ki tana kawenata tapu;
- 73
- Ki te oati i oati ai ia ki a Aperahama, ki to tatou tupuna,
- 74
- Kia tukua mai e ia ki a tatou he oranga i te ringaringa o o tatou hoa whawhai; a kia mahi wehi kore atu ki a ia,
- 75
- I runga i te tapu, i te tika, ki tona aroaro, i nga ra katoa e ora ai tatou.
- 76
- A ko koe, e tama, ka karangatia ko te poropiti a te Runga Rama: e haere hoki koe i te aroaro o te Ariki, hei whakapai i ona ara;
- 77
- Hei whakamatau i tona iwi ki te whakaoranga, i o ratou hara e murua ana;
- 78
- He mea hoki na te aroha na te mahi tohu a to tatou Atua; na reira hoki i puta mai ai te puaotanga o runga ki a tatou,
- 79
- Hei whakamārama i te hunga e noho ana i te pouri, i te atarangi hoki o te mate, hei whakatika i o tatou waewae ki te huarahi o te rangimarie.
- 80
- Na, ka tupu taua tamaiti, a ka kaha haere tona wairua; a noho ana ia i nga koraha, taea noatia te ra e whakakitea ai ia ki a Iharaira.
Address: 
Phone: 
Email: