Luke Chapter 7 - Paipera Tapu 1868 | Te Paipera Tapu 1868

Luke Chapter 7 - Paipera Tapu 1868

1
Ano ka mutu enei kupu katoa āna, me te whakarongo ano te iwi, ka tomo atu ia ki Kaperenauma.
2
Na, e mate ana te pononga a tetahi keneturio, meake marere, tana hoki i mate-nui ai.
3
A, tona rongonga ki a Ihu, ka tonoa ki a ia etahi kaumatua o nga Hurai, hei mea ki a ia kia haere mai ki te whakaora i tana pononga.
4
A, to ratou taenga mai ki a Ihu, he kaha ta ratou inoi, ka mea, he pai te tangata e meatia ai tenei e ia:
5
E aroha ana hoki ia ki to tatou iwi, nāna hoki i hanga te whare karakia mo matou.
6
Na, haere tahi ana a Ihu me ratou. A i a ia kahore nei i matara mai i te whare, ka tono te keneturio i etahi hoa ki a ia, ka mea ki a ia, E te Ariki, kei maumau ngenge noa koe: ehara hoki ahau i te tikanga tangata e haere ake ai koe ki raro i toku tuanui:
7
Koia tē tae ai taku aro ki te haere atu ki a koe: engari kia puaki mai tau kupu, a ka ora taku pononga.
8
He tangata hoki ahau e whakahaua ana, he hoia ano aku hei whakahaunga maku, na, ka mea ahau ki tenei, Haere, a ka haere; ki tetahi atu hoki, Haere mai, a ka haere mai; ki taku pononga ano hoki, Meatia tenei, a ka meatia e ia.
9
Te rongonga o Ihu ki enei mea, ka miharo ki a ia, a ka tahuri ka mea ki te mano e aru ana i a ia, Ko taku kupu tenei ki a koutou, kahore ano ahau i kite i roto i a Iharaira i te whakapono hei rite mo tenei te nui.
10
A, te hokinga atu ki te whare o te hunga i tonoa, rokohanga atu kua ora te pononga i mate.
11
A i te aonga ake, ka haere ia ki tetahi pa, ko Naina te ingoa; a he tokomaha o ana akonga i haere tahi me ia, he nui hoki te tangata.
12
A ka whakatata ia ki te kuwaha o te pa, na, he tupapaku tera e kauhoatia mai ana, he huatahi na tona whaea, a ko ia he pouaru: a he tokomaha nga tāngata o te pa e haere tahi ana me ia.
13
A, te kitenga o te Ariki i a ia, ka aroha ki a ia, ka mea ki a ia, Kaua e tangi.
14
Na, ka haere mai ia, ka pa ki te kauhoa: a, tu tonu nga kai kauhoa. Na, ko tana meatanga mai, E tama, ko taku kupu tenei ki a koe, E ara.
15
Na, ka noho te tupapaku ki runga, ka anga ka korero. A hoatu ana ia e ia ki tona whaea.
16
Na, ka tau te wehi ki a ratou katoa: a ka whakakororia i te Atua, ka mea, Kua puta ake i roto i a tatou he poropiti nui; a, Kua titiro mai te Atua ki tona iwi.
17
Na, haere ana tenei korero mona puta noa i Huria, i nga wahi patata katoa ano hoki.
18
A ka korerotia enei mea katoa ki a Hoani e ana akonga.
19
Na, ka karangatia e Hoani etahi o ana akonga tokorua, ka tonoa ki a Ihu, mea ai, Ko koe ranei tera e haere mai ana? me tatari ranei matou ki tetahi atu?
20
A, te taenga mai o aua tāngata ki a ia, ka mea, Kua tonoa mai maua e Hoani Kai iriiri ki a koe, mea ai, Ko koe ranei tera e haere mai ana? me tatari ranei matou ki tetahi atu?
21
I taua wa pu ano he tokomaha te hunga i whakaorangia e ia i nga turorotanga, i nga mate, i nga wairua kino; a he tokomaha nga matapo i meinga kia kite.
22
A ka whakahokia mai e Ihu, ka mea ki a raua, Haere korerotia atu ki a Hoani nga mea e kite nei e rongo nei korua; ko nga matapo e titiro ana, ko nga kopa e haereere ana, ko nga repera kua ma, ko nga turi e rongo ana, ko nga tupapaku e whakaarahia ana, e kauwhautia ana te rongo pai ki te hunga rawa-kore;
23
Na, ka koa te tangata e kore e hē ki a au.
24
A, te rironga o nga karere a Hoani, ka timata ia, a ka korerotia a Hoani ki te mano, I haere atu koutou ki te koraha kia kite i te aha? I te kakaho e whakangaueuetia ana e te hau?
25
Ano ra, i haere koutou kia kite i te aha? I te tangata he kakahu maeneene ona? Na, kei nga whare kingi te hunga i nga kakahu whakapaipai, i nga kai papai.
26
Ano ra, i haere koutou kia kite i te aha? I te poropiti? Ae ra, ko taku kupu tenei ki a koutou, tera atu i te poropiti.
27
Mona te mea kua tuhituhia nei, Na, ka tonoa e ahau taku karere ki mua i tou aroaro, māna e whakapai tou huarahi i mua i a koe.
28
Ko taku kupu hoki tenei ki a koutou, Kahore he poropiti nui atu i a Hoani Kai iriiri i roto i nga whanau a nga wāhine: heoi rahi ake i a ia te nohinohi rawa o te rangatiratanga o te Atua.
29
Na, i whakatikaia ta te Atua e te hunga katoa i rongo, e nga pupirikana ano hoki, i iriiria hoki ki te iriiringa a Hoani.
30
Ko nga Parihi ia, ratou ko nga kai whakaako o te ture, i whakakahore ki ta te Atua whakaaro ki a ratou, i a ratou kihai nei i iriiria e ia.
31
A ka mea mai te Ariki, Me whakarite e ahau nga tāngata o tenei whakapaparanga ki te aha? e rite ana ki te aha?
32
E rite ana ki nga tamariki e noho ana i te kāinga hoko, e karanga ana ki a ratou ano, e mea ana, Whakatangi noa matou i te putorino ki a koutou, a kahore koutou i kanikani mai; aue noa matou ki a koutou, na, kahore koutou i tangi.
33
I haere mai hoki a Hoani Kai iriiri, a kihai i kai taro, kihai i inu waina; heoi ka mea koutou, He rewera tona.
34
I haere mai te Tama a te tangata me te kai me te inu; a ka mea koutou, Na, he tangata kakai, he tangata inu waina, he hoa no nga pupirikana me nga tāngata hara!
35
Otira e whakatikaia ana te whakaaro nui e ana tamariki katoa.
36
Na, ka mea tetahi o nga Parihi ki a ia kia kai tahi raua. A ka tomo atu ia ki te whare o te Parihi, ka noho.
37
A ka mātau tetahi wahine hara o te pa, kei te whare o te Parihi ia e noho ana, na, ka kawea mai e ia tetahi pouaka kohatu e kī ana i te hinu kakara,
38
A ka tu tangi ki muri i ona waewae, ka anga ka whakamakuku i ona waewae ki nga roimata, ka muru ki nga makawe o tona mātenga, ka kihi i ona waewae, ka whakawahi ki te hinu kakara.
39
A, te kitenga o te Parihi i karangatia ai ia, ka korero i roto i a ia, ka mea, Me he poropiti tenei, kua mātau ia ki te wahine e pa nei ki a ia, tona peheatanga: he wahine hara hoki.
40
Na, ka korero a Ihu, ka mea ki a ia, E Haimona, he kupu taku ki a koe. Ka mea ia, Korero, e te Kai whakaako.
41
Na, tokorua nga tāngata i a raua te moni a tetahi kai tuku moni: e rima rau nga pene i tetahi, e rima tekau i tetahi.
42
A, tē whai mea raua hei whakautu mai, whakarerea noatia ana e ia ki a raua. Na, māu e korero mai, ko wai o raua e tino nui tona aroha ki a ia.
43
Na, ka whakahokia atu e Haimona, ka mea, Ki taku whakaaro, ko te tangata nāna te mea nui i whakarerea noatia atu. Na, ko tona meatanga mai ki a ia, Tika tonu tāu.
44
Na, ka tahuri ia ki te wahine, a ka mea ki a Haimona, E kite ana koe i tenei wahine? I haere mai ahau ki roto ki tou whare, kahore ano i homai e koe he wai mo oku waewae: nāna ia i whakamakuku oku waewae ki nga roimata, a murua iho ki nga makawe o tona mātenga.
45
Kihai koe i kihi i ahau: ko tenei ia kahore ano i mutumutu te kihi i oku waewae no taku taenga mai ra ano.
46
Kihai koe i whakawahi i toku mātenga ki te hinu: na, whakawahia ana e ia oku waewae ki te hinu kakara.
47
Koia ahau ka mea nei ki a koe, Kua murua ona tini hara; ina hoki he nui tana aroha: otira i iti nga mea o tetahi i murua, ka iti ano tona aroha.
48
A ka mea mai ia ki a ia, Kua murua ou hara.
49
Na, ka anga ka korero ona hoa noho ki a ratou ano, Ko wai tenei e muru nei ano hoki i nga hara?
50
Na, ko tana meatanga mai ki te wahine, Na to whakapono koe i ora ai; haere marie.