Numbers Chapter 12 - Paipera Tapu 1868 | Te Paipera Tapu 1868

Numbers Chapter 12 - Paipera Tapu 1868

1
Na, ka korero whakahe a Miriama raua ko Arona mo Mohi, mo te wahine Kuhi i marenatia e ia: he wahine Kuhi hoki tana i marena ai.
2
A ka mea raua, Koia ranei, i a Mohi anake nga korero a Ihowa, a kahore ano hoki ranei ana korero i a maua? A ka rongo a Ihowa.
3
(Na, he tangata mahaki rawa a Mohi i nga tangata katoa o runga o te mata o te whenua.)
4
Na, kihai i aha kua korero a Ihowa ki a Mohi, ratou ko Arona, ko Miriama, Puta mai koutou tokotoru ki te tapenakara o te whakaminenga. A ka puta atu ratou tokotoru.
5
Na, ko te heketanga iho o Ihowa i roto i te pou kapua, a ka tu ki te whatitoka o te tapenakara, ka karanga hoki ki a Arona raua ko Miriama: a ka puta mai raua.
6
A ka mea mai ia, Tena, whakarongo mai ki aku korero: Ki te mea he poropiti kei roto i a koutou, ka whakaatu atu ahau a Ihowa i a au ki ia, he mea whakakite atu, he mea korero moemoea ki a ia.
7
Ehara taku pononga a Mohi i te pera; e pono ana ia i roto i toku whare katoa.
8
Ka korero ahau ki a ia, he mangai he mangai, me te titiro mai ano ia, kahore hoki he kupu ngaro, a e kite ano ia i te ahua o Ihowa: na te aha ra korua tē wehi ai ki te korero whakahe mo taku pononga mo Mohi?
9
Na, ka mura te riri a Ihowa ki a raua, a haere ana ia.
10
Na, ka riro atu te kapua i runga te tapenakara; a kua reparatia a Miriama, kua rite ki te hukarere: a, te tirohanga mai a Arona ki a Miriama, e! kua reparatia.
11
Na, ko te meatanga mai a Arona ki a Mohi, Aue, e toku ariki, kaua e utaina ki runga ki a maua tenei hara i poauau nei, i hara nei maua.
12
Kei rite ia ki te mea kua mate, ki te mea kua pau tetahi wahi o ona kikokiko i tona putanga mai ano i te kopu o tona whaea.
13
Na, ka karanga atu a Mohi ki a Ihowa, ka mea, E te Atua, tena ra, whakaorangia ia.
14
Na, ko te meatanga a Ihowa, ki a Mohi, Me i tuwha kau atu tona papa ki tona mata e kore ianei ia e whakama, a whitu noa nga ra? kia whitu nga ra e tutakina atu ia ki waho o te puni, a, muri iho ka whakahokia mai ano.
15
Na, tutakina atu ana a Miriama ki waho o te puni, a e whitu nga ra; kihai ano hoki te iwi i haere, kia whakahokia mai ra ano a Miriama.
16
A, muri iho, ka turia e te iwi, a, Hateroto, a noho ana i te koraha o Parana.